Kunsill Affarijiet Barranin, 25/06/2018, 25 ta' Ġunju 2018

Riżultati ewlenin

Kooperazzjoni fil-qasam tas-sigurtà u d-difiża

Illum, flimkien mal-ministri għall-affarijiet barranin u l-ministri għad-difiża, aħna ħadna deċiżjonijiet importanti biex navvanzaw il-ħidma tagħna dwar id-difiża fl-UE bi tħejjija għall-Kunsill Ewropew. Aħna ddeċidejna wkoll li nżidu saħansitra aktar il-kooperazzjoni tagħna man-NATO. Aħna ddeterminati li nkomplu din il-kooperazzjoni eċċellenti, għaliex l-isfidi tas-siġurtà li naffaċċaw huma kbar ħafna u jeħtieġu d-determinazzjoni sħiħa tagħna li naħdmu flimkien. Federica Mogherini, Rappreżentant Għoli għall-Affarijiet Barranin u l-Politika ta’ Sigurtà

Fid-diskussjoni tagħhom dwar il-kooperazzjoni fil-qasam tas-sigurtà u d-difiża, il-ministri għall-affarijiet barranin u għad-difiża tkellmu dwar inizjattivi ewlenin tad-difiża, inkluż dwar il-kooperazzjoni strutturata permanenti (PESCO), il-mobilità militari, l-inizjattivi proposti fil-qafas tal-qafas finanzjarju pluriennali (il-Fond Ewropew għad-Difiża u l-Faċilità Ewropea għall-Paċi), il-ġlieda kontra t-theddid ibridu u l-importanza tat-tisħiħ tar-reżiljenza tal-UE għal theddid simili, u l-iżvilupp tal-kapaċità ċivili.

Il-Kunsill adotta konklużjonijiet dwar is-sigurtà u d-difiża. Huwa adotta wkoll deċiżjoni li tistabbilixxi regoli ta' governanza għal proġetti li jsiru taħt il-PESCO, u approva l-parti ġenerali ta' livell għoli tar-rekwiżiti militari għall-mobilità militari fl-UE u lil hinn minnha.

• Konklużjonijiet tal-Kunsill dwar il-kooperazzjoni dwar is-sigurtà u d-difiża, (stqarrija għall-istampa, 25/06/2018)
• Kooperazzjoni tal-UE dwar is-sigurtà u d-difiża (informazzjoni ġenerali)

Qabel is-Summit tan-Nato li jmiss (11-12 ta' Lulju), il-ministri għall-affarijiet barranin u l-ministri għad-difiża kellhom ukoll skambju ta’ fehmiet dwar il-kooperazzjoni bejn l-UE u n-NATO mas-Segretarju Ġenerali tan-NATO Jens Stoltenberg. Fil-kuntest ta' sfidi reċenti fir-relazzjoni transatlantika, huma ssottolinjaw il-kollaborazzjoni tajba kontinwa dwar is-sigurtà u d-difiża bejn iż-żewġ organizzazzjonijiet, b'komplementarjetà sħiħa. Huma enfasizzaw il-progress importanti li sar rigward 74 azzjoni konkreta li jimplimentaw id-Dikjarazzjoni Konġunta ta' Lulju 2016 bejn il-President tal-Kunsill Ewropew, il-President tal-Kummissjoni Ewropea u s-Segretarju Ġenerali tan-NATO. Huma ħeġġew aktar kooperazzjoni, b'mod partikolari dwar il-mobilità militari u dwar il-ġlieda kontra t-theddid ibridu.

• Skeda informattiva dwar il-kooperazzjoni bejn l-UE u n-NATO (EEAS)

Il-Jemen

Il-ministri għall-affarijiet barranin tal-UE ddiskutew l-aktar żviluppi reċenti fil-Jemen flimkien mal-Mibgħut Speċjali tan-NU (UNSE) Martin Griffiths, li infurmahom dwar il-pjan ta' paċi tiegħu. Il-Ministri skambjaw il-fehmiet dwar l-isforzi li għaddejjin tal-UE, inkluż is-sensibilizzazzjoni politika, u b'mod partikolari d-djalogu reġjonali mal-Iran dwar il-Jemen, kif ukoll l-appoġġ umanitarju u għall-iżvilupp. Huma esploraw modi biex jissaħħaħ il-proċess immexxi min-NU. Il-Kunsill adotta konklużjonijiet dwar il-Jemen.

• Konklużjonijiet tal-Kunsill dwar il-Jemen (stqarrija għall-istampa, 25/06/2018)

Il-Myanmar / Burma

Il-Kunsill qiegħed 7 individwi taħt miżuri restrittivi fid-dawl tas-sitwazzjoni fil-Myanmar/Burma. L-individwi soġġetti għas-sanzjonijiet huma uffiċjali tal-armata (Tatmadaw), tal-gwardja tal-fruntiera u tal-pulizija tal-Myanmar/Burma, u ġew elenkati minħabba l-involviment jew l-assoċjazzjoni tagħhom ma' atroċitajiet u ksur serju tad-drittijiet tal-bniedem imwettqa kontra l-popolazzjoni Rohingya fl-Istat ta' Rakhine fit-tieni nofs tal-2017. Din id-deċiżjoni ġiet adottata mingħajr dibattitu.

• Il-Myanmar/Burma: L-UE tissanzjona 7 uffiċjali għolja tal-militar, tal-gwardja tal-fruntiera u tal-pulizija għal ksur serju tad-drittijiet tal-bniedem jew l-assoċjazzjoni tagħhom miegħu, kontra l-popolazzjoni Rohingya (stqarrija għall-istampa 25/06/2018)

Venezwela:

Il-Kunsill iddeċieda li jqiegħed 11-il individwu b'pożizzjonijiet uffiċjali taħt miżuri restrittivi. Il-persuni elenkati huma responsabbli għal ksur tad-drittijiet tal-bniedem u li dgħajfu d-demokrazija u l-istat tad-dritt fil-Venezwela. Din id-deċiżjoni ġiet adottata mingħajr dibattitu.

• Il-Venezwela: l-UE żżid ħdax-il uffiċjal mal-lista tas-sanzjonijiet (stqarrija għall-istampa, 25/06/2018)

Il-Qarn tal-Afrika u l-Baħar l-Aħmar

Il-Kunsill iddiskuta u adotta konklużjonijiet dwar il-Qarn tal-Afrika u l-Baħar l-Aħmar. Il-ministri għall-affarijiet barranin enfasizzaw l-importanza strateġika tar-reġjun għall-UE. Huma esprimew l-appoġġ tagħhom għal sforzi mmirati lejn il-ħolqien ta' forum reġjonali organizzat u inklużiv għal djalogu u kooperazzjoni madwar il-Baħar l-Aħmar.

• Konklużjonijiet tal-Kunsill dwar il-Qarn tal-Afrika u l-Baħar l-Aħmar (stqarrija għall-istampa 25/06/2018)

Strateġija Globali tal-UE

Il-Kunsill irrieżamina l-implimentazzjoni tal-Istrateġija Globali tal-UE abbażi tat-tieni rapport ta’ progress. Il-ministri laqgħu l-progress importanti li sar u appellaw għal implimentazzjoni kontinwa fl-oqsma ta' prijorità kollha identifikati fl-istrateġija.

• Implementing the EU Global Strategy - Year 2 (pdf)
• Strateġija Globali tal-UE (sit web)