Kunsill Affarijiet Barranin, 28/05/2018, 28 ta' Mejju 2018

Riżultati ewlenin

Iran

Il-Kunsill Affarijiet Barranin kellu dibattitu dwar l-Iran, b'mod partikolari l-ftehim nukleari mal-Iran, il-Pjan ta' Azzjoni Komprensiv Konġunt (PAKK), wara l-irtirar tal-Istati Uniti mill-ftehim kif imħabbar fit-8 ta' Mejju. Id-dibattitu ta segwitu lid-diskussjoni tal-mexxejja tal-UE f'Sofija fis-16 ta' Mejju, meta huma qablu b'mod unanimu li l-UE ser tibqa' fil-ftehim sakemm l-Iran jibqa' impenjat bis-sħiħ lejh, u ta l-approvazzjoni lill-Kummissjoni biex tkun lesta taġixxi kull meta jiġu affettwati interessi Ewropej.

Il-ministri ssottolinjaw l-importanza tal-preservazzjoni tal-PAKK, li hija ċentrali għas-sigurtà tar-reġjun, u min-naħa l-oħra, għall-Ewropa u lil hinn minnha. Huma laqgħu wkoll il-passi diġà meħuda mill-Kummissjoni Ewropea biex tipproteġi lil kumpaniji Ewropej li involvew ruħhom mal-Iran wara t-tneħħija tas-sanzjonijiet b'rabta mas-sanzjonijiet nukleari. Huma faħħru l-isforzi kollha, b'mod partikolari dawk tar-Rappreżentant Għoli u tal-ministri għall-affarijiet barranin tal-E3 (Franza, il-Ġermanja, ir-Renju Unit) biex jiżguraw li l-Iran ikompli jimplimenta l-ftehim, li l-għan tiegħu huwa li jipprevjeni lill-pajjiż milli jiżviluppa arma nukleari.

Aħna kkonfermajna mill-ġdid il-messaġġ politiku qawwi ta' unità fir-rigward tal-ftehim nukleari mal-Iran. Għall-Unjoni Ewropea, dan ma għandux x'jaqsam mal-interessi ekonomiċi, dan huwa dwar sigurtà. Billi fin-nuqqas tal-ftehim nukleari mal-Iran, aħna nemmnu li s-sigurtà tar-reġjun u tal-Ewropa tkun fil-periklu. Federica Mogherini, Rappreżentant Għoli għall-Affarijiet Barranin u l-Politika ta’ Sigurtà

Il-ministri ttrattaw ukoll kwistjonijiet oħra barra mill-ambitu tal-PAKK, b’mod partikolari it-tħassib tal-UE dwar il-programm tal-missili ballistiċi tal-Iran u r-rwol tal-Iran f’konflitti reġjonali, mhux lanqas is-Sirja u l-Jemen, kif ukoll is-sitwazzjoni tad-drittijiet tal-bniedem. Dawn il-kwistjonijiet qed jiġu indirizzati barra l-PAKK. Reċentement, l-UE mexxiet sforz li kien jinvolvi bosta stati membri biex jimpenjaw ruħhom mal-Iran fuq il-Jemen, b’laqgħa li seħħet fil-livell diplomatiku f’Ruma fit-3 ta’ Mejju biex jiddiskutu passi konkreti biex tinbena l-fiduċja.

Il-ministri għall-affarijiet barranin enfasizzaw ukoll l-importanza tal-UE għar-relazzjoni transatlantika, u l-ħtieġa li jkompli jkun impenn mal-Istati Uniti, sieħeb u alleat għal ħafna żmien, dwar il-kwistjonijiet kollha, inkluż l-Iran.

• Dikjarazzjoni mir-Rappreżentant Għoli f’isem l-UE wara t-tħabbira tal-President tal-Istati Uniti Trump fir-rigward tal-ftehim mal-Iran dwar il-qasam nukleari (PAKK) (stqarrija għall-istampa, 09/05/2018)
• Il-Kummissjoni Ewropea tieħu passi biex tipproteġi l-interessi tal-impriżi tal-UE li jinvestu fl-Iran bħala parti mill-impenn kontinwu tal-UE għall-PAKK (stqarrija għall-istampa, 18/05/2018)

Venezwela

Il-ministri għall-affarijiet barranin kellhom skambju ta’ fehmiet dwar il-Venezwela, wara l-elezzjonijiet presidenzjali u l-elezzjonijiet reġjonali fl-20 ta’ Mejju u l-elezzjoni mill-ġdid ta’ Nicolás Maduro għat-tieni terminu ta’ sitt snin. Il-Kunsill adotta konklużjonijiet dwar il-Venezwela, filwaqt li enfasizza li l-elezzjonijiet u l-eżitu kellhom nuqqas ta' kredibbiltà minħabba li l-proċess elettorali ma pprovdiex il-garanziji meħtieġa għal elezzjonijiet demokratiċi u inklużivi. F'dan l-isfond, l-UE tappella biex isiru elezzjonijiet presidenzjali ġodda f'konformità ma' standards demokratiċi rikonoxxuti f'livell internazzjonali u l-ordni kostituzzjonali tal-Venezwela.

Il-konklużjonijiet jistqarru li f'dan il-kuntest, l-UE ser taġixxi b'mod rapidu, f'konformità ma' proċeduri stabbiliti, bil-għan li timponi miżuri restrittivi addizzjonali mmirati u reversibbli li ma jagħmlux ħsara lill-popolazzjoni tal-Venezwela, li l-UE tixtieq li ttaffi s-sitwazzjoni tagħhom.

• Konklużjonijiet tal-Kunsill dwar il-Venezwela, (stqarrija għall-istampa, 28/05/2018)

Gaża

Waqt l-ikla ta' nofsinhar, il-ministri għall-affarijiet barranin iddiskutew is-sitwazzjoni f’Gaża wara l-iżviluppi reċenti, inkluż fir-rigward tar-rilokazzjoni tal-Ambaxxata tal-Istati Uniti f’Iżrael għal Ġerusalemm. Huma qablu dwar il-ħtieġa li jaġixxu immedjatament biex jiġi evitat aktar telf ta’ ħajja, inkluż billi jittejjeb l-aċċess umanitarju. Huma enfasizzaw ukoll l-importanza li terġa’ tingħata l-ħajja lil proċess politiku, u ikkonfermaw mill-ġdid il-pożizzjoni magħquda tal-UE dwar il-ħtieġa li tinstab soluzzjoni ta’ żewġ stati, b’Ġerusalemm bħala l-kapitali taż-żewġ stati.

• Dikjarazzjoni mir-Rappreżentant Għoli Federica Mogherini dwar il-vjolenza f’Gaża u l-aħħar żviluppi, 14 ta’ Mejju 2018 (SEAE)

Repubblika Demokratika tal-Kongo

Il-Kunsill iddiskuta s-sitwazzjoni fir-Repubblika Demokratika tal-Kongo (RDK). Il-ministri għall-affarijiet barranin enfasizzaw l-importanza li jsegwu l-proċess elettorali li mistenni jwassal għall-elezzjonijiet ġenerali ppjanati għat-23 ta’ Diċembru 2018 b’mod kredibbli, leġittimu, kunsenswali u inklużiv. Il-ministri esprimew ukoll it-tħassib tagħhom dwar is-sitwazzjoni umanitarja diżastruża, fid-dawl tat-tifqigħa reċenti tal-Ebola.

• Repubblika Demokratika tal-Kongo: Il-Kunsill jadotta konklużjonijiet (stqarrija għall-istampa, 11/12/2017)
• Ir-Repubblika Demokratika tal-Kongo u l-UE (sit web tas-SEAE)

Ftehim ta' wara Cotonou

Il-ministri għall-affarijiet barranin evalwaw il-progress li sar fit-tħejjijiet ta' deċiżjoni tal-Kunsill li tawtorizza lill-Kummissjoni biex tiftaħ negozjati dwar is-sħubija futura bejn l-UE u l-pajjiżi Afrikani, tal-Karibew u tal-Paċifiku (AKP) (ftehim ta' wara Cotonou).

Il-Kunsill talab l-Ambaxxaturi tal-UE (COREPER) biex ikomplu, fil-jiem li ġejjin, bil-ħidma mmirata għall-finalizzazzjoni u l-adozzjoni tal-mandat ta' negozjar taħt it-tmexxija tal-Presidenza Bulgara.

• Ftehim ta' Cotonou (informazzjoni ġenerali)