Kunsill Affarijiet Barranin (Kummerċ), 22/05/2018, 22 ta' Mejju 2018

Riżultati ewlenin

Relazzjonijiet mas-sħab kummerċjali ewlenin

Illum eżaminajna s-sitwazzjoni attwali ta' xi wħud min-negozjati ewlenin għal kummerċ ħieles. L-aġenda mimlija li għandna turi kemm il-kummerċ dinji huwa importanti għall-UE. Huwa assolutament kruċjali li nżommu djalogu miftuħ kostruttiv mas-sħab tagħna. Il-kummerċ ħieles huwa strument essenzjali għall-kisba tat-tkabbir globali, il-ħolqien ta' opportunitajiet ekonomiċi ġodda u t-tisħiħ tal-kooperazzjoni strateġika. Emil Karanikolov, Ministru għall-ekonomija tal-Bulgarija

Awstralja u New Zealand

Il-Kunsill awtorizza lill-Kummissjoni tiftaħ negozjati kummerċjali mal-Awstralja u New Zealand. Il-ministri adottaw direttivi ta' negozjati għan-negozjati ma' kull wieħed minnhom.

Il-ftehimiet kummerċjali maż-żewġ pajjiżi, primarjament, għandhom l-għan li jkomplu jnaqqsu l-ostakli eżistenti għall-kummerċ, jeliminaw dazji doganali fuq il-merkanzija u jagħtu aċċess aħjar għas-servizzi u l-akkwist pubbliku fl-Awstralja u New Zealand.

• Il-Kunsill jagħti l-kunsens tiegħu għal negozjati kummerċjali mal-Awstralja u New Zealand (stqarrija għall-istampa, 22/05/2018)

Il-Ġappun u Singapore

Il-Kunsill kellu skambju ta' fehmiet dwar il-ftehimiet ta' kummerċ ħieles (FTA) mal-Ġappun u Singapore, kif ukoll ftehim dwar il-protezzjoni tal-investimenti (IPA) ma' Singapore, abbażi tal-proposti adottati mill-Kummissjoni fit-18 ta' April 2018.

Il-ministri saħqu fuq l-importanza ekonomika u strateġika tal-ftehimiet maż-żewġt isħab u ħeġġew it-tkomplija tal-ħidma intensiva għall-iffirmar u l-konklużjoni tagħhom. L-għan huwa li ż-żewġ FTAs jiġu implimentati matul l-2019.

Il-Kummissjoni infurmat ukoll lill-Kunsill dwar il-progress ta' negozjati kummerċjali oħra, b'mod partikolari mal-Messiku, il-Mercosur, iċ-Ċilì u l-Vjetnam.

Waqt l-ikel, il-ministri ddiskutew l-iżviluppi reċenti fir-relazzjonijiet kummerċjali tal-UE mal-Istati Uniti.

Arkitettura ġdida tal-ftehimiet kummerċjali

Il-Kunsill adotta konklużjonijiet dwar in-negozjati għall-ftehimiet kummerċjali tal-UE u l-konklużjoni tagħhom. Il-konklużjonijiet jistabbilixxu l-prinċipji ewlenin li jirfdu l-approċċ tal-Kunsill għan-negozjati kummerċjali minn issa 'l quddiem.

Il-konklużjonijiet jiffukaw b'mod partikolari fuq l-intenzjoni tal-Kummissjoni li tirrakkomanda li ftehimiet separati jifirdu d-dispożizzjonijiet marbuta mal-investiment mid-dispożizzjonijiet kummerċjali l-oħra, kif ukoll fuq ir-rwol tal-Kunsill f'negozjati kummerċjali.

• Il-Kunsill jadotta approċċ ġdid dwar in-negozjar u l-konklużjoni tal-ftehimiet kummerċjali tal-UE (stqarrija għall-istampa, 22/05/2018)