Kunsill Affarijiet Barranin (Żvilupp), 22/05/2018, 22 ta' Mejju 2018

Riżultati ewlenin

Ir-relazzjonijiet bejn l-UE u l-AKP wara l-2020

Il-ministri evalwaw il-progress li sar fit-tħejjijiet ta’ deċiżjoni tal-Kunsill li tawtorizza lill-Kummissjoni biex tiftaħ negozjati dwar is-sħubija futura bejn l-UE u l-pajjiżi Afrikani, tal-Karibew u tal-Paċifiku (AKP).

Il-Kunsill faħħar lill-Presidenza Bulgara għall-ħidma intensa mwettqa fil-korpi preparatorji rilevanti tal-Kunsill mill-pubblikazzjoni f’Diċembru 2017 tar-rakkomandazzjoni tal-Kummissjoni għal aġġornament tal-qafas eżistenti għall-kooperazzjoni mal-pajjiżi tal-AKP.

Il-Kunsill ikkonferma l-objettiv tiegħu li jiffinalizza d-direttivi ta’ negozjati malajr kemm jista’ jkun, sabiex ikun lest biex iniedi negozjati mal-pajjiżi sħab tal-AKP sal-aħħar ta’ Awwissu 2018, kif previst fil-ftehim attwali, il ftehim ta' Cotonou.

• Ftehim ta' Cotonou (informazzjoni ġenerali)
• Il-Kummissjoni Ewropea tirrakkomanda abbozz ta' direttivi ta' negozjati għal Sħubija modernizzata mal-pajjiżi Afrikani, tal-Karibew u tal-Paċifiku, 12 ta’ Diċembru 2017

Fond fiduċjarju ta’ emerġenza tal-UE għall-Afrika

Il-Kunsill iddiskuta l-fond fiduċjarju ta’ emerġenza tal-UE (EUTF) għall-Afrika. Il-ministri analizzaw l-implimentazzjoni tal-fond, il-kisbiet prinċipali tiegħu u s-sitwazzjoni attwali dwar l-aspetti finanzjarji abbażi ta’ preżentazzjoni mill-Kummissjoni.

Sat-8 ta’ Mejju 2018, kien intlaħaq qbil dwar 147 programm għal ammont totali ta’ madwar EUR 2.59 biljun maqsum bejn it-tliet żoni ġeografiċi tas-Saħel u l-Lag Chad, il-Qarn tal-Afrika u r-reġjun tal-Afrika ta’ Fuq. Il-fond hu ffinanzjat kemm mill-UE kif ukoll minn stati membri individwali. B'kollox, ir-riżorsi tal-EUTF kienu laħqu EUR 3.39 biljun sal-aħħar tal-2017.

Użu ta' strumenti finanzjarji esterni

Il-ministri kellhom skambju ta’ opinjonijiet dwar il-baġit għall-għajnuna barranija għall-perjodu 2021-2027, fuq il-bażi tal-proposti tal-Kummissjoni għall-qafas finanzjarju pluriennali (QFP) futur ippreżentat fit-2 ta' Mejju.

Il-Kummissjoni tipproponi li jitwarrab pakkett ta’ €123 biljun fil-QFP li jmiss għall-finanzjament tal-politika esterna tagħha. Dan jirrappreżenta żieda ta’ 26% mqabbel mal-perjodu attwali.

Il-Kunsill adotta wkoll konklużjonijiet dwar l-implimentazzjoni tal-istrumenti tal-UE għall-finanzjament tal-azzjonijiet esterni fl-2016, kif ukoll dwar l-użu effettiv tas-sorsi kollha ta’ finanzjament u mezzi oħra ta' implimentazzjoni biex jitrawwem l-iżvilupp sostenibbli.

• Skeda informattiva tal-Kummissjoni dwar il-QFP u l-azzjoni esterna - "il-viċinat u d-dinja"
• Konklużjonijiet tal-Kunsill dwar l-implimentazzjoni tal-istrumenti ta’ azzjoni esterna tal-UE fl-2016
• Konklużjonijiet tal-Kunsill dwar l-investiment fl-iżvilupp sostenibbli

Enerġija u żvilupp

Il-Kunsill adotta konklużjonijiet dwar kif il-kooperazzjoni għall-enerġija sostenibbli tista’ tikkontribwixxi għat-twettiq tal-aġenda għall-iżvilupp sostenibbli 2030.

Il-konklużjonijiet jenfasizzaw tliet objettivi ewlenin fil-qasam tal-enerġija u l-iżvilupp: l-indirizzar tan-nuqqas ta' aċċess għall-enerġija; iż-żieda tal-effiċjenza fl-enerġija u l-ġenerazzjoni tal-enerġija rinnovabbli; u l-kontribut għall-ġlieda globali kontra t-tibdil fil-klima, f’konformità mal-ftehim ta’ Pariġi.