Kunsill Affarijiet Barranin, 16/07/2018, 16 ta' Lulju 2018

Riżultati ewlenin

Libja

Il-Kunsill iddiskuta l-Libja wara ż-żjara mir-Rappreżentant Għoli Federica Mogherini fil-pajjiż fl-14 ta' Lulju, fejn inawgurat il-bini tad-Delegazzjoni tal-Unjoni Ewropea fi Tripli. Il-ministri għall-affarijiet barranin tal-UE laqgħu r-ritorn ta' preżenza fiżika permanenti tal-UE fil-Libja, li jenfasizza l-importanza tal-ħidma tal-UE għall-istabbiltà, is-sigurtà u l-prosperità tal-pajjiż.

Dwar il-proċess politiku, nemmnu li l-ħidma lejn l-elezzjonijiet għandha tiġi aċċellerata, u aħna qegħdin nappoġġawha. Nemmnu wkoll li għandu jkun lest qafas kostituzzjonali u legali xieraq qabel isiru l-elezzjonijiet. Fuq il-front ekonomiku, qbilna li għandna nżidu l-ħidma tagħna man-Nazzjonijiet Uniti biex jiġi żgurat li d-dħul miż-żejt ikun jista' jiġi distribwit b'mod trasparenti. Dwar il-migrazzjoni, qbilna li nżommu l-attenzjoni tagħna fuq il-kooperazzjoni u s-sħubija mal-Libja, iżda l-ewwel u qabel kollox mal-aġenziji tan-Nazzjonijiet Uniti u l-Unjoni Afrikana. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Il-ministri għall-affarijiet barranin tennew l-appoġġ tagħhom lir-Rappreżentant Speċjali tas-Segretarju Ġenerali tan-NU Ghassan Salamé. Huma nnutaw b'sodisfazzjoni li l-kriżi reċenti fir-reġjun tan-Nofs Qamar taż-Żejt kienet ġiet solvuta, filwaqt li ssottolinjaw l-importanza li jiġu indirizzati l-kawżi tagħha. Huma enfasizzaw ukoll ir-riżultati tal-ħidma tal-UE fuq il-post dwar il-migrazzjoni, b'mod partikolari l-appoġġ għall-IOM u l-UNHCR, li, pereżempju, ippermettiet ir-ritorn volontarju ta' 28 000 migrant lejn il-pajjiż ta' oriġini tagħhom.

• Ir-Rappreżentant Għoli Federica Mogherini żżur il-Libja, 14 ta' Lulju 2018

Sħubija tal-Lvant

Il-Kunsill iddiskuta s-Sħubija tal-Lvant, qabel il-laqgħa ministerjali tas-Sħubija tal-Lvant f'Ottubru. Il-ministri għall-affarijiet barranin tennew mill-ġdid l-impenn tal-UE lejn ir-reġjun, l-aġenda ta' riforma u l-prijoritajiet identifikati bħala "20 riżultat għall-2020", biex tinkiseb ekonomija governanza, konnettività u soċjetà aktar b'saħħithom. Il-Kunsill ikkonferma r-rilevanza kontinwa tal-approċċ imfassal apposta u differenzjat, li jippermetti lil kull wieħed mis-sitt pajjiżi (l-Armenja, l-Ażerbajġan, il-Belarussja, il-Georgia, ir-Repubblika tal-Moldova u l-Ukrajna) li jagħżlu l-livell ta' ambizzjoni li jaspiraw għalih fir-relazzjonijiet tagħhom mal-UE.

Il-ministri nnotaw il-progress li sar fis-sitt pajjiżi. Huma saħqu wkoll dwar il-ħtieġa li jissaħħu r-riformi f'oqsma bħall-governanza, il-ġustizzja, il-ġlieda kontra l-korruzzjoni, ir-riforma ekonomika u l-ambjent tan-negozju. Huma esprimew tħassib partikolari dwar is-sitwazzjoni fir-Repubblika tal-Moldova.

Fl-aħħar nett, il-ministri enfasizzaw l-importanza li jużaw l-opportunità tal-10 anniversarju tas-sħubija fl-2019 biex jenfasizzaw l-impenn tal-UE lejn ir-reġjun.

• Sħubija tal-Lvant (informazzjoni ġenerali)
• Sħubija tal-Lvant - 20 Riżultat għall-2020

Korea ta' Fuq

Waqt l-ikla ta' nofsinhar, il-ministri għall-affarijiet barranin iddiskutew ir-Repubblika Demokratika tal-Poplu tal-Korea (RDPK). Huma tennew l-impenn sħiħ tagħhom biex jappoġġaw l-isforzi lejn id-denuklearizzazzjoni sħiħa, verifikabbli u irreversibbli tal-peniżola Koreana u r-rieda tal-UE li tiffaċilita passi lejn dan l-objettiv. F'konformità mal-politika tal-UE ta' impenn kritiku, issottolinjaw ukoll l-importanza li tkompli tinżamm pressjoni permezz ta' sanzjonijiet, filwaqt li jżommu miftuħin il-mezzi tal-komunikazzjoni. Huma qablu wkoll li jħeġġu lir-RDPK biex tiffirma u tirratifika t-Trattat dwar il-Projbizzjoni Totali tal-Provi Nukleari bħala pass loġiku biex id-dikjarazzjonijiet politiċi pożittivi reċenti jinbidlu f'impenji verifikabbli u legalment vinkolanti.

• Skeda informattiva dwar l-UE u r-RDPK (SEAE)
• Miżuri restrittivi tal-UE kontra l-Korea ta' Fuq (informazzjoni ġenerali)

Qorti Kriminali Internazzjonali

Il-Kunsill adotta konklużjonijiet dwar il-Qorti Kriminali Internazzjonali (QKI) fl-okkażjoni tal-20 anniversarju tal-adozzjoni tal-Istatut ta' Ruma (17 ta' Lulju). Il-Kunsill jenfasizza l-kontribut siewi tal-QKI fil-ġlieda kontra l-impunità. Fi żmien meta l-ordni internazzjonali bbażat fuq ir-regoli qed jiffaċċa dejjem aktar pressjoni, it-tisħiħ tas-sistema tal-ġustizzja kriminali tiegħu hu aktar importanti minn qatt qabel. Il-Kunsill ifakkar li l-UE ilha sostenitur qawwi tal-Qorti sa mill-ħolqien tagħha u użat l-istrumenti għad-dispożizzjoni tagħha biex tgħin iżżid l-appoġġ għall-Qorti. Dawn il-konklużjonijiet ġew adottati mingħajr dibattitu.

• Council conclusions on the International Criminal Court on the occasion of the 20th anniversary of the adoption of the Rome Statute