"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.

Żur il-paġna tal-politika tal-cookies tagħna għal aktar informazzjoni u biex tibdel is-settings tiegħek.

български español čeština dansk Deutsch eesti Ελληνικά English français Gaeilge hrvatski italiano latviešu lietuvių magyar Malti Nederlands polski português română slovenčina slovenščina suomi svenska
Skip to content

Kunsill Affarijiet Barranin

Kunsill Affarijiet Barranin, 19/11/2018, 19 ta' Novembru 2018

Riżultati ewlenin

Ġrajjiet kurrenti

Il-ministri għall-affarijiet barranin iddiskutew l-aktar kwistjonijiet urġenti fuq l-aġenda internazzjonali. Huma enfasizzaw l-appoġġ sħiħ u kontinwu tagħhom favur il-ftehim nukleari mal-Iran (PAKK), wara d-dħul fis-seħħ tas-sanzjonijiet tal-Istati Uniti fil-5 ta' Novembru 2018. Huma nnutaw li dan il-ftehim qed ikompli jiġi implimentat mill-Iran, kif iċċertifikat għat-13-il darba mill-Aġenzija Internazzjonali tal-Enerġija Atomika (IAEA). Fl-istess ħin, huma esprimew is-solidarjetà sħiħa tagħhom ma' dawk l-istati membri li kienu xhieda ta' mġiba inaċċettabbli minn atturi Iranjani fit-territorju Ewropew, u affermaw li kienu lesti jikkunsidraw rispons immirat xieraq.

Il-ministri għall-affarijiet barranin għamlu referenza wkoll għall-eżitu tal-konferenza internazzjonali għal-Libja ospitata mill-Gvern Taljan f'Palermo fit-12-13 ta' Novembru u għas-sitwazzjoni f'Gaża, wara l-aħħar eskalazzjoni ta' vjolenza.

Asja Ċentrali

Il-ministri għall-affarijiet barranin kellhom diskussjoni dwar l-Asja Ċentrali (il-Każakistan, ir-Repubblika Kirgiża, it-Taġikistan, it-Turkmenistan u l-Użbekistan) qabel l-14-il laqgħa ministerjali UE-Asja Ċentrali li ser issir fit-23 ta' Novembru fi Brussell. Il-ministri għall-affarijiet barranin innutaw il-bidliet sinifikanti reċenti fir-reġjun u l-momentum il-ġdid fil-kooperazzjoni bilaterali u reġjonali. Huma esprimew interess qawwi li l-UE żżid l-involviment tagħha fl-Asja Ċentrali f'oqsma bħall-appoġġ għar-riformi u l-iżvilupp ekonomiku, kif ukoll għall-promozzjoni ta' konnettività sostenibbli u l-kondizzjonijiet reġjonali għall-paċi u l-istabbiltà fl-Afganistan.

Din id-diskussjoni ser tikkontribwixxi għat-tħejjija tal-istrateġija l-ġdida tal-UE dwar l-Asja Ċentrali li mistennija tiġi adottata fl-2019.

Bożnija-Ħerzegovina

Il-Kunsill iddiskuta l-Bożnija-Ħerzegovina wara l-elezzjonijiet li saru fis-7 ta' Ottubru. Il-ministri għall-affarijiet barranin issottolinja l-importanza li jiġu ffurmati gvernijiet fil-livelli kollha malajr kemm jista' jkun. Dan jippermetti lill-mexxejja politiċi biex jerġgħu jiffukaw bis-sħiħ fuq l-aġenda ta' riforma. Il-Kunsill insista li t-tkomplija tal-proċess ta' riforma għadu essenzjali sabiex jirrispondi għall-aspirazzjonijiet taċ-ċittadini, b'mod partikolari taż-żgħażagħ. Il-ministri nnutaw ukoll li għandha titwettaq ir-riforma tal-liġi elettorali.

Highlights of the Foreign Affairs Council of 19 November 2018, held in Brussels.

Jemen

Il-ministri għall-affarijiet barranin iddiskutew is-sitwazzjoni fil-Jemen. Il-ministri kellhom skambju ta' fehmiet dwar l-isforzi li għaddejjin tal-UE, b'mod partikolari fir-rigward tal-appoġġ politiku u umanitarju. Huma affermaw mill-ġdid l-appoġġ qawwi tagħhom għall-proċess immexxi min-NU u għall-Mibgħut Speċjali tan-NU Martin Griffith.

F'mument meta qed naraw xi passi inkoraġġanti fid-direzzjoni ta' tnaqqis tat-tensjoni, nemmen li dan huwa l-waqt li jintbagħat messaġġ ċar u qawwi lil dawk kollha involuti fil-konflitt, sabiex jikkonsolidaw dawn il-passi, jaslu għal waqfien mill-ġlied, u jimpenjaw ruħhom f'taħdidiet politiċi mmexxija mill-Mibgħut Speċjali tan-NU Martin Griffiths. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Mill-2015 'l hawn, l-UE kkontribwixxiet aktar minn €234 miljun f'finanzjament umanitarju lill-Jemen. L-UE tibqa' l-ikbar donatur umanitarju fil-Jemen.

Ukrajna

Il-Kunsill kellu skambju ta' fehmiet dwar l-aħħar żviluppi fl-Ukrajna, b'mod partikolari s-sitwazzjoni fil-Baħar Azov u l-"elezzjonijiet" tal-hekk imsejħa "Repubblika tal-Poplu ta' Luhansk" u tar-"Repubblika tal-Poplu ta' Donetsk" fil-11 ta' Novembru 2018.

Il-ministri għall-affarijiet barranin tennew l-appoġġ u l-impenn sod tagħhom għall-indipendenza, is-sovranità u l-integrità territorjali tal-Ukrajna. F'dan il-kuntest, huma fakkru li l-UE ma tirrikonoxxix l-"elezzjonijiet" tal-11 ta' Novembru 2018 li hija tikkunsidra bħala illegali u illeġittimi. Huma affermaw li lesti jikkunsidraw miżuri mmirati xierqa b'reazzjoni għal dan. Il-ministri għall-affarijiet barranin fakkru li l-implimentazzjoni sħiħa tal-ftehimiet ta' Minsk tibqa' essenzjali. Huma enfasizzaw ukoll l-impenn umanitarju kontinwu tal-UE fil-Lvant tal-Ukrajna, li jindirizza l-ħtiġijiet ta' dawk l-aktar milquta mill-konflitt.

Il-ministri ttrattaw l-appoġġ tal-UE għall-proċess ta' riforma fl-Ukrajna. L-UE u l-Ukrajna ser ikollhom l-opportunità li jirrieżaminaw il-progress tar-riformi, kif ukoll bosta kwistjonijiet oħra ta' rilevanza għall-kooperazzjoni bilaterali u globali, fil-laqgħa tagħhom tal-Kunsill ta' Assoċjazzjoni li jmiss skedata għas-17 ta' Diċembru 2018.

Sigurtà u difiża

Il-ministri għad-difiża ngħaqdu mal-ministri għall-affarijiet barranin għal diskussjoni dwar il-kooperazzjoni tal-UE fis-sigurtà u d-difiża. Huma rrieżaminaw l-implimentazzjoni tal-Istrateġija Globali tal-UE f'dan il-qasam, inkluż il-kooperazzjoni strutturata permanenti (PESCO), ir-rieżami annwali koordinat dwar id-difiża (CARD), il-Fond Ewropew għad-Difiża, il-mobbiltà militari, il-kapaċità militari tal-ippjanar u t-tmexxija (MPCC), il-patt dwar id-dimensjoni ċivili tal-PSDK u l-proposta għal Faċilità Ewropea għall-Paċi.

Il-Kunsill adotta konklużjonijiet dwar is-sigurtà u d-difiża.

Dokumenti tal-laqgħat

Stqarrijiet għall-istampa

Tagħrif għall-istampa

Kuntatti għall-istampa

Jekk m'intix ġurnalist(a), jekk jogħġbok ibgħat it-talba tiegħek lis-servizz għall-informazzjoni tal-pubbliku.

Akkreditazzjoni u avvenimenti għall-istampa

Għal informazzjoni ġenerali dwar l-akkreditazzjoni, jekk jogħġbok żur din il-paġna.

L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.

Kompli segwina

Laqgħat oħra: Kunsill Affarijiet Barranin

Ara laqgħat oħrajn

L-aħħar reviżjoni: 16 ta' Jannar 2025