Kunsill Affarijiet Barranin (Difiża), 19-20/11/2018, 19 u 20 ta' Novembru 2018

Riżultati ewlenin

Sigurtà u difiża

It-Tnejn 19 ta' Novembru, il-ministri għad-difiża u għall-affarijiet barranin kellhom diskussjoni dwar il-kooperazzjoni tal-UE fis-sigurtà u d-difiża. Huma rrieżaminaw l-implimentazzjoni tal-Istrateġija Globali tal-UE f'dan il-qasam, inkluż il-kooperazzjoni strutturata permanenti (PESCO), ir-rieżami annwali koordinat dwar id-difiża (CARD), il-Fond Ewropew għad-Difiża, il-mobbiltà militari, il-kapaċità militari tal-ippjanar u t-tmexxija (MPCC), il-patt dwar id-dimensjoni ċivili tal-PSDK u l-proposta għal Faċilità Ewropea għall-Paċi.

Il-Kunsill adotta konklużjonijiet dwar is-sigurtà u d-difiża.

Kooperazzjoni bejn l-UE u n-NATO

It-Tlieta 20 ta' Novembru, il-ministri għad-difiża ddiskutew il-kooperazzjoni bejn l-UE u n-NATO flimkien mas-Segretarju Ġenerali tan-NATO Jens Stoltenberg. Id-dibattitu kien l-opportunità biex tiġi affermata mill-ġdid ir-rabta transatlantika qawwija u l-impenn kontinwu taż-żewġ organizzazzjonijiet biex jaħdmu flimkien.

Hekk kif insaħħu l-ħidma tal-UE fuq id-difiża, saħħaħna wkoll b'mod mingħajr preċedent il-kooperazzjoni tagħna man-NATO. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Il-ministri enfasizzaw b'mod partikolari il-kooperazzjoni dwar il-mobbiltà militari kif ukoll dwar il-ġlieda kontra t-theddid ibridu, inkluż id-diżinformazzjoni. Id-diskussjoni seħħet hekk kif l-UE u n-NATO qed iwettqu eżerċizzju parallel u kkoordinat, eżempju tanġibbli tal-ħidma tagħhom.

• Skeda informattiva dwar il-kooperazzjoni bejn l-UE u n-NATO (SEAE)
• Tħejjija għall-kriżijiet: L-UE tniedi eżerċizzju ta' maniġġar ta' kriżijiet ċivili-militari (stqarrija għall-istampa, 16/11/18)

Missjonijiet u operazzjonijiet tal-PSDK

Il-ministri għad-difiża rrieżaminaw ukoll il-missjonijiet u l-operazzjonijiet tal-PSDK. Huma faħħru l-ħidma tal-missjonijiet u l-operazzjonijiet tal-UE fis-Saħel (EUTM Mali, EUCAP Sahel Mali, EUCAP Sahel Niger) u l-isforzi li għaddejjin biex din il-ħidma tiġi reġjonalizzata. Il-ministri fakkru wkoll fl-importanza tal-isforzi tal-PSDK fil-Balkani tal-Punent, fejn l-UE hija preżenti mal-operazzjoni militari EUFOR Althea u l-missjoni ċivili EULEX Kosovo. Il-Kunsill iddiskuta wkoll il-passi li jmiss fid-dawl tat-tiġdid tal-EUNAVFOR MED Operazzjoni Sophia. Il-ministri affermaw mill-ġdid l-appoġġ sħiħ tagħhom għall-operazzjoni, waqt li nnotaw il-ħidma importanti li l-operazzjoni setgħet twettaq mindu tnediet fl-2015.

L-Operazzjoni SOPHIA qed tikseb riżultati tajbin, qed tnaqqas l-għadd ta' wasliet illegali, tarresta faċilitaturi ta' dħul klandestin ta' bnedmin, tħarreġ lill-gwardji tal-kosta Libjani u timplimenta r-Riżoluzzjoni r-riżoluzzjoni tal-Kunsill tas-Sigurtà tan-NU dwar l-embargo fuq l-armi. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Punti oħra

Il-Kunsill adotta għadd ta' deċiżjonijiet u konklużjonijiet mingħajr dibattitu, inkluż:

• Kooperazzjoni fil-qasam tad-difiża: Il-Kunsill iniedi 17-il proġett ġdid tal-PESCO (stqarrija għall-istampa, 19/11/2018)
• Fond Ewropew għad-Difiża: Il-Kunsill jadotta l-pożizzjoni tiegħu (stqarrija għall-istampa, 19/11/2018)
• Id-dimensjoni ċivili tal-Politika ta' Sigurtà u ta' Difiża Komuni: L-UE ssaħħaħ il-kapaċitajiet tagħha li taġixxi (stqarrija għall-istampa, 19/11/2018)
• Aktar sigurtà fuq l-armi biex nipproteġu liċ-ċittadini: Il-Kunsill jadotta strateġija ġdida tal-UE kontra l-armi tan-nar, l-armi ħfief u ta' kalibru żgħir illeċiti u l-munizzjon tagħhom (stqarrija għall-istampa, 19/11/2018)
• Ċiberdifiża: Il-Kunsill jaġġorna l-qafas ta' politika