Kunsill Affarijiet Barranin, 21/01/2019, 21 ta' Jannar 2019

Riżultati ewlenin

Ġrajjiet kurrenti

Il-Kunsill Affarijiet Barranin beda b'diskussjoni dwar il-ġrajjiet kurrenti. Il-ministri għall-affarijiet barranin analizzaw fil-qosor il-kwistjonijiet pressanti ewlenin fuq l-aġenda internazzjonali, inkluż is-sitwazzjoni fir-Repubblika Demokratika tal-Kongo, fil-Venezwela u fis-Sirja. L-adozzjoni ta' konklużjonijiet tal-Kunsill dwar is-sitwazzjoni fin-Nikaragwa ssemmiet ukoll, kif ukoll l-ewwel deżinjazzjonijiet taħt ir-reġim ta' sanzjonijiet il-ġdid tal-UE kontra l-użu u l-proliferazzjoni ta' armi kimiċi. Ir-Rappreżentant Għoli u l-ministri għall-affarijiet barranin irreferew ukoll għall-attakk bil-bombi tas-17 ta' Jannar 2019, f'Bogotá, il-Kolombja, kif ukoll għall-iżviluppi reċenti dwar il-Jemen.

Diżinformazzjoni

Iddiskutejna d-diżinformazzjoni, b'mod partikolari bil-ħsieb tal-elezzjonijiet Ewropej. Kien hemm fokus b'saħħtu ħafna fuq il-ħtieġa li jiġu ttrattati t-tipi differenti kollha ta' diżinformazzjoni, li ġejjin kemm minn ġewwa kif ukoll minn barra l-UE, u li jieħdu diversi forom. Iddeċidejna li nimxu 'l quddiem b'mod rapidu flimkien fuq din il-kwistjoni, b'ħafna determinazzjoni biex nimplimentaw il-pjan ta' azzjoni. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Il-Kunsill iddiskuta l-pjan ta' azzjoni kontra d-diżinformazzjoni ppreżentat mir-Rappreżentanti Għoli u l-Kummissjoni Ewropea fil-5 ta' Diċembru 2018. Il-ministri għall-affarijiet barranin esprimew appoġġ qawwi għall-pjan ta' azzjoni konġunt.

Huma kellhom skambju ta' fehmiet dwar l-implimentazzjoni tal-pjan ta' azzjoni, filwaqt li ffukaw fuq l-aspetti esterni tiegħu. Huma ssottolinjaw il-ħtieġa li jinbena rispons komuni u olistiku għall-isfidi tas-sigurtà li jirriżultaw mill-interferenza barranija, filwaqt li jiġu rispettati l-approċċi nazzjonali u tiġi protetta l-libertà tal-espressjoni u tal-media.

Huma enfasizzaw il-ħolqien ta' ''Sistema ta' Twissija Rapida'' tal-UE biex jiġu kondiviżi l-għarfien espert u l-aqwa prattiki, kif ukoll biex tiġi promossa azzjoni koordinata, b'mod partikolari permezz ta' kampanji ta' sensibilizzazzjoni. Il-ministri saħqu fuq il-ħtieġa li jkun hemm involviment mas-soċjetà ċivili biex tiġi ttrattata d-diżinformazzjoni, inkluż ma' organizzazzjonijiet tas-soċjetà ċivili (OSĊ), NGOs, in-negozji u d-dinja akkademika, kif ukoll li titwettaq ħidma mas-sħab internazzjonali, b'mod partikolari n-NATO u l-G7, biex tiġi indirizzata d-diżinformazzjoni b'mod aktar effiċjenti. Huma ssottolinjaw ukoll l-importanza ta' kontribut għat-tisħiħ tar-reżiljenza ta' pajjiżi ġirien.

Il-Kunsill ikkonkluda li d-diżinformazzjoni għandha tiġi indirizzata fil-kuntest aktar ġenerali ta' interferenza barranija, theddid ibridu u komunikazzjoni strateġika, b'kapaċitajiet operazzjonali msaħħa tal-UE. Dan jinkludi t-tisħiħ tat-tliet task forces dwar il-komunikazzjoni strateġika tas-Servizz Ewropew għall-Azzjoni Esterna, li ġew stabbiliti sabiex jippromwovu narrattivi bbażati fuq il-fatti dwar l-UE fil-viċinat tal-Lvant, il-viċinat tan-Nofsinhar u l-Balkani tal-Punent.

Ir-relazzjonijiet bejn l-UE u l-Lega tal-Istati Għarab

Il-ministri għall-affarijiet barranin kellhom diskussjoni ta' tħejjija għal-laqgħa ministerjali bejn l-UE u l-Lega tal-Istati Għarab (LAS) li għandha ssir fi Brussell fl-4 ta' Frar 2019, qabel l-ewwel summit bejn l-UE u l-LAS skedat fl-24 u l-25 ta' Frar 2019 f'Sharm el-Sheik, l-Eġittu.

Il-Kunsill afferma mill-ġdid l-importanza ta' sħubija b'saħħitha bejn l-UE u l-LAS. Il-ministri għall-affarijiet barranin iddiskutew il-ħtieġa ta' kooperazzjoni mal-LAS fl-indirizzar ta' firxa wiesgħa ta' kwistjonijiet u sfidi komuni bħall-multilateraliżmu, il-kummerċ u l-investiment, il-ġlieda kontra t-terroriżmu, il-migrazzjoni, u tibdil fil-klima, kif ukoll kwistjonijiet reġjonali.

Ir-relazzjonijiet bejn l-UE u l-ASEAN

Il-Kunsill iddiskuta t-22 laqgħa ministerjali bejn l-UE u l-ASEAN, li saret fl-istess jum fi Brussell. Il-Kunsill adotta konklużjonijiet dwar ir-relazzjonijiet bejn l-UE u l-ASEAN.

• Konklużjonijiet tal-Kunsill dwar ir-relazzjonijiet bejn l-UE u l-ASEAN
• Laqgħa ministerjali bejn l-UE u l-ASEAN, 21/01/2019