"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.

Żur il-paġna tal-politika tal-cookies tagħna għal aktar informazzjoni u biex tibdel is-settings tiegħek.

български español čeština dansk Deutsch eesti Ελληνικά English français Gaeilge hrvatski italiano latviešu lietuvių magyar Malti Nederlands polski português română slovenčina slovenščina suomi svenska
Skip to content

Kunsill Affarijiet Barranin

Kunsill Affarijiet Barranin, 18/02/2019, 18 ta' Frar 2019

Punti ewlenin tal-Kunsill Affarijiet Barranin tat-18 ta' Frar 2019

Riżultati ewlenin

Ukrajna

Ħames snin wara l-avvenimenti ta’ Maidan, kellna diskussjoni wiesgħa dwar l-isforzi biex jiġi appoġġat il-pajjiż. Meta niġu għall-proċess ta’ riforma, jekk titqabbel ma' ħames snin ilu, l-Ukrajna hija pajjiż differenti. Għad fadal ħafna xi jsir, f’termini ta’ riformi soċjoekonomiċi u l-ġlieda kontra l-korruzzjoni, iżda huwa ċar li l-Ukrajna għamlet passi ta’ ġgant’ il quddiem, u dan huwa l-aktar bis-saħħa tal-Ftehim ta’ Assoċjazzjoni, iż-Żoni ta’ Kummerċ Ħieles Approfonditi u Komprensivi u l-ftehim ta’ liberalizzazzjoni tal-viżi tagħna li daħħalna fis-seħħ li kienu ta’ benefiċċju għaċ-ċittadini tal-Ukrajna li jimxu f’din id-direzzjoni. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Il-Kunsill kellu diskussjoni komprensiva dwar l-Ukrajna, li kopriet il-proċess ta’ riforma kif ukoll is-sitwazzjoni umanitarja u ta’ sigurtà, b’mod partikolari fil-Lvant tal-Ukrajna u l-Baħar ta' Azov. Il-Kunsill tenna l-appoġġ sħiħ tiegħu għall-indipendenza, l-integrità territorjali u s-sovranità tal-Ukrajna u kompla jikkundanna l-annessjoni illegali mir-Russja tal-Krimea u Sevastopol.

Il-ministri għall-affarijiet barranin irrikonoxxew il-progress importanti li wettqet l-Ukrajna f’oqsma ewlenin matul dawn l-aħħar ħames snin. Huma enfasizzaw il-ħtieġa li jinżamm il-momentum tar-riforma sabiex tiġi żgurata s-sostenibbiltà fit-tul tar-riżultati miksuba, b’mod partikolari fil-kuntest tal-elezzjonijiet parlamentari u presidenzjali li ġejjin.

Il-Kunsill esprima wkoll l-importanza li jiġi żgurat li l-elezzjonijiet fl-Ukrajna jitmexxew sew. Il-ministri enfasizzaw l-importanza li jiġi żgurat li l-missjoni tal-OSKE għall-osservazzjoni tal-elezzjonijiet tkun tista’ twettaq il-ħidma tagħha u tkun tista’ tosserva l-elezzjonijiet f’konformità sħiħa mal-prassi tas-soltu tagħha.

Il-ministri kellhom skambju ta’ fehmiet dwar kif l-UE tista’ tgħin, wara l-iżviluppi fil-Baħar ta' Azov u fir-reġjun tal-istrett ta’ Kerch, partikolarment permezz ta’ appoġġ imsaħħaħ fiż-żoni affettwati, inkluż f’setturi bħalma huma l-konnessjonijiet ferrovjarji u tat-toroq, it-taħriġ, u l-appoġġ għall-SMEs. Tennew l-appell tal-UE għall-ħelsien immedjat tal-baħrin Ukreni kollha miżmuma kif ukoll għar-ritorn tal-bastimenti maħtufa u l-passaġġ ħieles għall-vapuri kollha mill-Istrett ta' Kerch.

Sirja

Il-Kunsill iddiskuta s-sitwazzjoni fis-Sirja. Il-ministri għall-affarijiet barranin tennew l-appoġġ sħiħ u kontinwu tal-UE għall-isforzi tal-Mibgħut Speċjali tan-NU Geir Pedersen u l-proċess ta’ paċi ta' Ġinevra għas-Sirja mmexxi min-NU, li jibqa’ fundamentali għall-implimentazzjoni tar-Riżoluzzjoni 2254 tal-Kunsill tas-Sigurtà tan-NU, għal transizzjoni politika kredibbli fis-Sirja bħala l-unika soluzzjoni sostenibbli fit-tul għall-kunflitt. Il-ministri tennew li l-UE mhux ser tkun lesta li tassisti fir-rikostruzzjoni tas-Sirja qabel ma tkun qed titwettaq b’mod deċiżiv transizzjoni politika komprensiva, ġenwina u inklużiva.

Il-ministri ddiskutew it-tħejjijiet għall-konferenza "Brussell 3: Appoġġ għall-futur tas-Sirja u r-reġjun", li ser isseħħ mit-12 sal-14 ta’ Marzu, u li tibqa’ kruċjali biex il-komunità internazzjonali tkompli tiġi mobilizzata favur l-isforzi umanitarji u ta' reżiljenza għall-poplu Sirjan u l-komunitajiet ospitanti. Ir-Rappreżentant Għoli enfasizzat li l-konferenza ser tkun saħansitra aktar iffokata fuq ir-rwol tas-soċjetà ċivili u n-nisa, u li l-kwistjonijiet ta’ responsabbiltà u l-ġlieda kontra l-impunità ser ikunu prominenti.

Venezwela

Il-ministri għall-affarijiet barranin iddiskutew is-sitwazzjoni fil-Venezwela, wara l-ewwel laqgħa tal-Grupp ta’ Kuntatt Internazzjonali f’Montevideo fis-7 ta’ Frar u qabel il-missjoni teknika għal Caracas immexxija mill-UE u l-Urugwaj. Il-missjoni ser taħdem fuq l-evalwazzjoni tal-appoġġ li jista’ jingħata biex titwitta t-triq għal eżitu demokratiku u paċifiku għall-kriżi u, b’mod partikolari, għaż-żamma ta’ elezzjonijiet presidenzjali bikrija.

Il-ministri għall-affarijiet barranin enfasizzaw ukoll li l-għajnuna umanitarja għandha titwassal lin-nies fil-bżonn u ma tistax tintuża għal skopijiet politiċi li jkunu differenti minn dawk tad-dritt umanitarju internazzjonali.

L-għajnuna umanitarja ma għandha qatt tintuża għal skopijiet oħra għajr dak li tintlaħaq il-popolazzjoni fil-bżonn. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Qarn tal-Afrika

Il-Kunsill iddiskuta l-Qarn tal-Afrika. Ir-Rappreżentant Għoli infurmat lill-ministri dwar iż-żjara tagħha fir-reġjun il-ġimgħa ta’ qabel. Il-ministri għall-affarijiet barranin laqgħu l-ftehim ta’ paċi storiku bejn l-Etjopja u l-Eritrea. Huma ddiskutew dwar kif l-UE tista’ tappoġġa din l-opportunità mingħajr preċedent li titħaffef ir-rikonċiljazzjoni u l-integrazzjoni ekonomika fil-Qarn tal-Afrika. Huma affermaw mill-ġdid l-impenn tal-UE fir-reġjun, li għadu qed iħabbat wiċċu ma’ sfidi importanti, mhux l-inqas is-sitwazzjoni tas-sigurtà fis-Somalja. Huma enfasizzaw ukoll il-ħtieġa li tinżamm enfasi qawwija fuq ir-rispett għad-drittijiet tal-bniedem, kif ukoll fuq is-sitwazzjoni tal-migranti li jimbarkaw fuq vjaġġi perikolużi, xi kultant minn età żgħira ħafna.

Ġrajjiet kurrenti

Fil-bidu tal-laqgħa tal-Kunsill, il-ministri għall-affarijiet barranin laqgħu d-dħul fis-seħħ tal-Ftehim ta’ Prespa li jippermetti l-bidla fl-isem tal-Maċedonja ta’ Fuq. Huma ddiskutew fil-qosor is-sitwazzjoni fir-Repubblika Demokratika tal-Kongo.

Dokumenti tal-laqgħat

Stqarrijiet għall-istampa

Tagħrif għall-istampa

Kuntatti għall-istampa

Jekk m'intix ġurnalist(a), jekk jogħġbok ibgħat it-talba tiegħek lis-servizz għall-informazzjoni tal-pubbliku.

Akkreditazzjoni u avvenimenti għall-istampa

Għal informazzjoni ġenerali dwar l-akkreditazzjoni, jekk jogħġbok żur din il-paġna.

L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.

Kompli segwina

Laqgħat oħra: Kunsill Affarijiet Barranin

Ara laqgħat oħrajn

L-aħħar reviżjoni: 6 ta' Frar 2025