Vidjokonferenza tal-ministri għall-affarijiet barranin, 15 ta' Ġunju 2020

Riżultati ewlenin

Il-ministri għall-affarijiet barranin tal-UE kellhom vidjokonferenza, preseduta mir-Rappreżentant Għoli tal-UE għall-Affarijiet Barranin u l-Politika ta' Sigurtà, Josep Borrell, biex jiddiskutu r-relazzjonijiet transatlantiċi.

Is-sħubija transatlantika hija waħda mill-pilastri ewlenin tal-ordni dinji u l-vidjokonferenza tal-lum tenniet l-impenn tal-istati membri tal-Unjoni Ewropea li jkomplu din il-kooperazzjoni mill-qrib. Josep Borrell, Rappreżentant Għoli tal-UE għall-Affarijiet Barranin u l-Politika ta' Sigurtà

Il-ministri pparteċipaw fi djalogu strateġiku mas-Segretarju tal-Istat tal-Istati Uniti, is-Sur Mike Pompeo, dwar ir-relazzjonijiet bilaterali bejn l-UE u l-Istati Uniti u kwistjonijiet ewlenin ta' politika barranija.

Il-suġġetti ewlenin li ġew indirizzati kienu: ir-relazzjonijiet maċ-Ċina, inkluż is-sitwazzjoni f'Hong Kong, il-Proċess ta' Paċi fil-Lvant Nofsani, is-Sħubija tal-Lvant b'enfasi fuq l-Ukrajna, u l-problema orizzontali tad-diżinformazzjoni.

Dwar iċ-Ċina, ir-Rappreżentant Għoli ssuġġerixxa li jitnieda djalogu bilaterali għalih li jiffoka fuq l-isfidi li jġibu magħhom ir-relazzjonijiet ma' Beijing. Dwar il-Proċess ta' Paċi fil-Lvant Nofsani, il-ministri ssottolinjaw l-importanza li l-Iżraeljani u l-Palestinjani jiġu mħeġġa li jinvolvu ruħhom fi proċess politiku kredibbli u sinifikattiv, u esprimew ir-rieda tagħhom li jgħinu u jiffaċilitaw tali proċess.

Id-diskussjoni dwar il-Viċinat tal-Lvant ikkonfermat li sħubija b'saħħitha bejn l-UE u l-Istati Uniti ser tibqa' kruċjali – b'mod partikolari fir-rigward tal-Ukrajna.

Suġġetti oħra li ssemmew matul id-diskussjoni jinkludu l-kriżi globali marbuta mal-pandemija tal-Covid-19, is-sitwazzjoni fil-Lvant tal-Mediterran, u l-konferenza ta' Brussell IV dwar l-appoġġ lis-Sirja li ser issir fit-30 ta' Ġunju 2020.

Taħt ġrajjiet kurrenti, il-ministri ġew infurmati dwar il-Konferenza li ġejja tas-Sħubija tas-Sudan ippjanata għall-25 ta' Ġunju 2020 f'format virtwali.