Vidjokonferenza informali tal-ministri għall-affarijiet barranin (Żvilupp), 29 ta' April 2021

Riżultati ewlenin

Il-ministri tal-UE għall-iżvilupp kellhom dibattitu ta' orjentazzjoni dwar l-Arkitettura Finanzjarja Ewropea għall-Iżvilupp (EFAD) futura, bil-parteċipazzjoni tal-Bank Ewropew tal-Investiment (BEI) u l-Bank Ewropew għar-Rikostruzzjoni u l-Iżvilupp (BERŻ).

Il-ministri ddiskutew b'mod partikolari l-konklużjonijiet u s-sejbiet tal-''Istudju tal-fattibbiltà dwar l-għażliet għat-tisħiħ tal-Arkitettura Finanzjarja Ewropea futura għall-Iżvilupp", u pprovdew gwida politika dwar it-triq 'il quddiem.

F'konformità mal-eżitu tal-Istudju tal-Fattibbiltà, il-ministri esprimew appoġġ ċar għal approċċ imsaħħaħ ta' Tim Ewropa, li jkollu l-benefiċċju li jevita l-frammentazzjoni, iżid is-sinerġiji, u jsaħħaħ l-impatt kollettiv tal-appoġġ tal-UE għall-iżvilupp.

Il-ministri enfasizzaw ukoll li l-azzjoni tal-UE għandha tkun iggwidata minn direzzjoni politika b'saħħitha, u li koordinazzjoni mingħajr xkiel u governanza b'saħħitha huma essenzjali għas-suċċess ta' dan l-approċċ.

Fil-vidjokonferenza informali tal-lum mal-ministri għall-iżvilupp, għamilna pass importanti 'l quddiem lejn arkitettura finanzjarja Ewropea għall-iżvilupp (EFAD) u ħarisna lejn is-sejbiet u l-għażliet ippreżentati mill-Istudju tal-Fattibbiltà. Biex nilqgħu l-isfidi globali attwali u futuri u nistabbilixxu t-tmexxija tal-UE biex "nibnu mil-ġdid aħjar", jeħtieġ li nisfruttaw il-potenzjal sħiħ tal-EFAD billi nibnu fuq il-punti b'saħħithom u l-komplementarjetajiet tal-atturi kollha tagħha. Aħna impenjati li niżviluppaw miżuri konkreti għal titjib sinifikanti tal-arkitettura attwali, b'mod partikolari billi nsaħħu l-koordinazzjoni u niżviluppaw investimenti konġunti u komplementari fost l-istituzzjonijiet finanzjarji Ewropej għall-iżvilupp, fost l-oħrajn. Naturalment, it-Tim Ewropa ser ikollu rwol sinifikanti f'dan l-approċċ, b'mod partikolari billi jiżviluppa azzjonijiet konġunti innovattivi u jiżgura l-viżibbiltà tal-finanzjament estern tal-UE.

Josep Borrell, Rappreżentant Għoli għall-Affarijiet Barranin u l-Politika ta' Sigurtà

L-istudju indipendenti "Fattibbiltà dwar għażliet għat-tisħiħ tal-Arkitettura Finanzjarja Ewropea għall-Iżvilupp futura" jipprovdi analiżi komprensiva ta' tliet għażliet għall-futur tal-EFAD bil-għan li jiġi żgurat approċċ Ewropew b'saħħtu u koerenti li jista' jwettaq bl-aħjar mod possibbli l-objettivi tal-politika esterna u l-interessi ġeopolitiċi tal-UE.

B'mod ġenerali, l-istudju jikkonkludi li "il-bini fuq riżorsi u komplementarjetajiet diġà eżistenti jidher li huwa l-aktar xenarju xieraq biex jiġi żgurat approċċ b'saħħtu u koerenti biex jiġu indirizzati l-isfidi ewlenin attwali tal-iżvilupp (l-hekk imsejjaħ xenarju Status Quo +)".

Id-diskussjoni ser tikkontribwixxi għat-tħejjija tal-konklużjonijiet tal-Kunsill dwar it-tisħiħ tal-EFAD, li l-presidenza Portugiża qed tippjana li tipproponi għall-approvazzjoni f'Mejju 2021.