"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Ġimagħtejn wara li ġew adottati s-sanzjonijiet tal-UE b'rabta mal-każ Navalny, il-Kunsill iddeċieda li jimponi miżuri restrittivi fuq ħdax-il individwu u erba' entitajiet responsabbli għal ksur u abbużi serji tad-drittijiet tal-bniedem fiċ-Ċina, il-Korea ta' Fuq, il-Libja, is-Sudan t'Isfel, l-Eritrea u r-Russja.
Is-sanzjonijiet jolqtu ksur u abbużi serji ħafna tad-drittijiet tal-bniedem, indipendentement mill-post fejn qed jitwettqu. Il-miżuri restrittivi kollha tal-Unjoni Ewropea jikkonformaw mad-dritt internazzjonali u huma soġġetti għall-ogħla standards tal-istat tad-dritt.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Il-Kunsill iddeċieda wkoll li jissanzjona ħdax-il individwu responsabbli għall-kolp ta' stat militari li twettaq fil-Myanmar/Burma fl-1 ta' Frar 2021, u r-repressjoni sussegwenti mill-militar u l-pulizija kontra d-dimostranti paċifiċi.
Il-Kunsill ivvaluta r-relazzjonijiet bejn l-UE u t-Turkija bil-ħsieb ta' rapport konġunt tar-Rappreżentant Għoli u l-Kummissjoni mħejji qabel il-vidjokonferenza tal-membri tal-Kunsill Ewropew fil-25 u s-26 ta' Marzu.
Il-ministri ġeneralment ikkunsidraw ir-rapport bħala bażi tajba għad-diskussjonijiet fil-Kunsill Ewropew.
Waqt li kien qed jiġbor id-diskussjoni fil-qosor, ir-Rappreżentant Għoli ssottolinja li mill-konklużjonijiet tal-Kunsill Ewropew ta' Diċembru 2020 'l hawn, kien hemm sinjali pożittivi mit-tmexxija Torka. Għalkemm ittieħdu passi fid-direzzjoni tat-tnaqqis tat-tensjoni fil-Lvant tal-Mediterran, il-proċess baqa' fraġli u jeħtieġ li jiġu sostnuti l-isforzi ta' tnaqqis fit-tensjoni.
Il-ministri qablu li huwa importanti li jinżamm ir-ritmu f'din id-direzzjoni u li dan jiġi kkonsolidat, iżda wkoll li jinżammu l-għażliet kollha disponibbli f'każ li l-iżviluppi tal-każ jirrikjedu dan.
Viċinat tan-Nofsinhar
Il-Kunsill imbagħad kellu skambju ta' fehmiet dwar il-Viċinat tan-Nofsinhar.
Id-dibattitu enfasizza l-ħtieġa għal sħubija aktar b'saħħitha, aktar mill-qrib u aktar effettiva, u li l-UE taħdem flimkien mas-sħab tagħha biex issolvi problemi komuni fosthom: il-COVID, il-konflitti, il-migrazzjoni, it-tibdil fil-klima u t-terroriżmu.
Il-ministri ffukaw b'mod partikolari fuq kif għandha tiġi implimentata l-komunikazzjoni konġunta dwar Sħubija Mġedda għall-Viċinat tan-Nofsinhar tad-9 ta' Frar 2021, u ssir operazzjonali. Fl-interventi tagħhom semmew diversi aspetti bħall-promozzjoni tar-riformi, il-ħidma mas-soċjetà ċivili, l-użu tal-potenzjal tat-tranżizzjoni ekoloġika u dik diġitali, fost affarijiet oħra.
Il-konklużjonijiet tal-Kunsill dwar il-Viċinat tan-Nofsinhar ser jiġu adottati fil-Kunsill Affarijiet Barranin li jmiss.
Il-ministri kellhom l-opportunità ta' skambju ta' fehmiet mal-Kummissarju Għoli tan-Nazzjonijiet Uniti għad-Drittijiet tal-Bniedem Michelle Bachelet rigward is-sitwazzjoni tad-drittijiet tal-bniedem madwar id-dinja, u l-iżviluppi reċenti f'dan ir-rigward.
Il-vidjokonferenza niedet ukoll id-Djalogu Strateġiku bejn l-UE u l-Kummissarju Għoli, li hija inizjattiva ġdida stabbilita fl-istrateġija dwar it-tisħiħ tal-kontribut tal-UE għall-multilateraliżmu bbażat fuq ir-regoli.
Ġrajjiet Kurrenti
Il-Kunsill qies is-sitwazzjoni fil-Myanmar, li għadha sejra għall-agħar wara l-kolp ta' stat militari fl-1 ta' Frar 2021. Meta informa lill-ministri, ir-Rappreżentant Għoli Borrell saħaq li l-UE ser tkompli bl-isforzi diplomatiċi tagħha biex tgħin tikkalma s-sitwazzjoni, u taħdem biex jitreġġgħu lura d-demokrazija u l-gvern ċivili leġittimu.
Il-ministri mbagħad ġew aġġornati dwar il-Balkani tal-Punent u, b'mod partikolari, l-avvenimenti reċenti u fil-futur qrib bħall-Kunsilli ta' Stabbilizzazzjoni u Assoċjazzjoni u ż-żjara reċenti fir-reġjun mir-Rappreżentant Speċjali tal-UE għad-Djalogu bejn Belgrad u Pristina u kwistjonijiet reġjonali oħra tal-Balkani tal-Punent, Miroslav Lajčák.
Il-Kunsill kellu wkoll diskussjoni qasira dwar ir-Russja, li matulha l-ministri kkonfermaw li l-ħames prinċipji gwida baqgħu rilevanti ħafna, u li f'dawk il-prinċipji, l-UE ser topponi, tillimita, jew tiddjaloga mar-Russja, skont is-sitwazzjoni. Il-mexxejja tal-UE ser ikollhom diskussjoni dwar ir-relazzjoni mar-Russja fil-vidjokonferenza tagħhom fil-25 u s-26 ta' Marzu.
Ir-Rappreżentant Għoli informa lill-ministri dwar il-Kunsill ta' Assoċjazzjoni UE-Georgia li sar fis-16 ta' Marzu, u dwar l-isforzi ta' medjazzjoni tal-UE matul dawn l-aħħar ġimgħat biex tingħeleb il-kriżi politika fil-pajjiż. Ir-Rappreżentant Għoli tenna l-ħtieġa li l-mexxejja kollha tal-partiti politiċi tal-Georgia jpoġġu l-interessi tal-poplu Georgjan qabel kollox, jagħmlu l-kompromessi meħtieġa, u jdawru l-attenzjoni tagħhom fuq kwistjonijiet urġenti oħra bħall-pandemija tal-coronavirus, l-irkupru ekonomiku, u s-sigurtà nazzjonali tal-Georgia.
Il-Venezwela ġiet ukoll diskussa fid-dawl ta' avvenimenti reċenti bħat-tkeċċija mill-pajjiż tal-Kap tad-Delegazzjoni tal-UE għall-Venezwela, u d-dikjarazzjoni tal-UE li l-ambaxxatur tal-Venezwela għall-UE hija persona non grata. Id-dibattitu enfasizza li l-istabbilizzazzjoni u d-demokratizzazzjoni mill-ġdid tal-pajjiż huma possibbli, iżda dan jeħtieġ sforz konsistenti.
Fl-aħħar nett, ir-Rappreżentant Għoli informa lill-ministri dwar is-sitwazzjoni fl-Etjopja u r-rapporti ta' kuljum mill-pajjiż dwar ksur tad-drittijiet tal-bniedem fuq skala massiva. L-UE ser tkompli żżid il-pressjoni biex ikun permess l-aċċess umanitarju, biex jitniedu investigazzjonijiet indipendenti dwar abbużi tad-drittijiet tal-bniedem, u biex jiġu rtirati truppi tal-Eritrea. Ir-Rappreżentant Għoli saħaq li l-UE tinsab lesta li tattiva l-għodod kollha tal-politika barranija tagħha kontra dawk responsabbli għall-ksur tad-drittijiet tal-bniedem, u li kien ta mandat lill-Ministru għall-Affarijiet Barranin Finlandiż Pekka Haavisto biex imur lura fir-reġjun għat-tieni missjoni.
Affarijiet oħra
Il-Kunsill adotta deċiżjoni li tistabbilixxi l-Faċilità Ewropea għall-Paċi.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Is-sanzjonijiet jolqtu ksur u abbużi serji ħafna tad-drittijiet tal-bniedem, indipendentement mill-post fejn qed jitwettqu. Il-miżuri restrittivi kollha tal-Unjoni Ewropea jikkonformaw mad-dritt internazzjonali u huma soġġetti għall-ogħla standards tal-istat tad-dritt.
