Kumitat Militari tal-Unjoni Ewropea (EUMC), kapijiet tad-difiża tal-UE, 18 ta' Mejju 2022

Riżultati ewlenin

Illum, il-Kapijiet tad-Difiża tal-UE (CHODs) iltaqgħu għal-laqgħa tal-Kumitat Militari fil-livell tas-CHODs fi Brussell.

Il-laqgħa serviet bħala l-opportunità biex jiġu diskussi l-implikazzjonijiet tas-sitwazzjoni ġeopolitika attwali u l-attivitajiet militari ewlenin tal-Politika ta' Sigurtà u ta' Difiża Komuni, b'enfasi speċjali fuq l-implimentazzjoni kruċjali tal-Boxxla Strateġika, u b'mod partikolari fuq il-kisba tal-kapaċità tal-UE li tipproġetta s-sigurtà, permezz tal-Kapaċità ġdida ta' Skjerament Rapidu tal-UE (EU RDC), sal-2025.

Fix-xenarju globali li diġà ntlaqat b'mod sever minn kriżijiet differenti madwar id-dinja, bit-terroriżmu, il-migrazzjonijiet mhux ikkontrollati, it-theddid ċibernetiku u ibridu, aggravati mill-pandemija, l-invażjoni mhux ġustifikata u mhux provokata tal-Ukrajna mir-Russja reġgħet ġabet gwerra konvenzjonali fit-territorju Ewropew, b'konsegwenzi imprevedibbli fuq is-sigurtà tagħna. Aħna, is-CHODs tal-UE, irridu nimpenjaw ruħna bis-sħiħ biex nimplimentaw b'mod rapidu l-għodod il-ġodda li l-Boxxla Strateġika tindika, għall-benefiċċju tal-UE u s-sigurtà taċ-ċittadini Ewropej. F'dan ir-rigward u fid-dawl tal-predeċessuri kollha tiegħi, nista' biss inġedded l-impenn l-aktar qawwi tiegħi f'dan l-isforz ukoll.

Il-Ġeneral Robert Brieger, li ppresieda din il-laqgħa għall-ewwel darba

Rigward il-kriżi li tinsab għaddejja fl-Ukrajna, is-CHODs apprezzaw il-ħidma eċċezzjonali li saret mill-Persunal Militari tal-UE u ċ-Ċellula tal-Mekkaniżmu ta' Koordinament tiegħu fil-monitoraġġ tat-konsenja ta' tagħmir militari mill-Istati Membri tal-UE, li kkontribwixxa għad-dikjarazzjoni tal-eliġibbiltà tagħhom għal rimborż, skont il-mekkaniżmu tal-Faċilità Ewropea għall-Paċi.

Is-CHODs tennew l-importanza fl-istabbiliment u t-trawwim ta' relazzjonijiet b'saħħithom mas-sħab li jikkondividu l-valuri u l-prinċipji tal-UE. F'dan ir-rigward, il-laqgħa kienet ukoll possibbiltà tajba biex tiġi diskussa l-kooperazzjoni man-NATO u s-sħab, li bħalissa qed jikkontribwixxu għall-Missjonijiet u l-Operazzjonijiet ta' Taħriġ tal-UE. Is-CHODs mill-Bożnija-Ħerzegovina, il-Georgia, il-Maċedonja ta' Fuq, il-Montenegro, il-Moldova u l-Viċi CHOD tas-Serbja attendew il-laqgħa.

Matul il-laqgħa, is-CHODs għażlu l-Logutenent Ġeneral Michiel Van Der Laan (in-Netherlands) bħala d-Direttur Ġenerali l-ġdid tal-Persunal Militari tal-UE / Direttur tal-Kapaċità Militari tal-Ippjanar u t-Tmexxija, biex jissostitwixxi lill-Viċi Ammirall Hervé Blejean, fi tmiem il-mandat tiegħu, fl-2023.

L-EUMC hu magħmul mis-CHODs tas-27 Stat Membru, li huma rappreżentati regolarment mir-Rappreżentanti Militari permanenti (MilReps) tagħhom. L-EUMC jipprovdi pariri u rakkomandazzjonijiet lill-Kumitat Politiku u ta' Sigurtà (KPS) dwar il-kwistjonijiet militari rilevanti kollha.

L-EUMC għandu President permanenti, magħżul mill-Kapijiet tad-Difiża tal-Istati Membri u maħtur mill-Kunsill għal tliet snin.