"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Kunsill Affarijiet Barranin (Żvilupp), 20 ta' Mejju 2022
Riżultati ewlenin
Il-Kunsill Affarijiet Barranin, fil-konfigurazzjoni tiegħu tal-iżvilupp, iddiskuta l-kriżi globali tas-sigurtà tal-ikel imminenti iġġenerata mill-aggressjoni militari mhux provokata u mhux ġustifikata tal-Federazzjoni Russa kontra l-Ukrajna, u r-rispons multilaterali għal dik il-kriżi.
Is-suq tal-ikel kien diġà taħt stress qabel il-gwerra, iżda wara l-attakk Russu kontra l-Ukrajna, din il-kriżi marret għall-agħar ħafna. Illum dan jipperikola s-sigurtà tal-ikel ta' miljuni ta' nies f'ħafna partijiet tad-dinja. It-truppi Russi qed jibbumbardjaw l-għelieqi Ukreni, ma jippermettux iż-żrigħ tal-għelejjel, jisirqu l-ħażniet tal-ikel, jimblukkaw il-portijiet Ukreni, u b'hekk qed jiżdiedu l-prezzijiet tal-ikel u l-fertilizzant li żdiedu f'daqqa f'ħafna partijiet tad-dinja. Għalhekk il-provvista dinjija tal-ikel tinsab fil-periklu, l-aktar minħabba l-invażjoni Russa tal-Ukrajna.
Josep Borrell, ir-Rappreżentant Għoli tal-Unjoni Ewropea għall-Affarijiet Barranin u l-Politika ta' Sigurtà
Il-ministri ġew infurmati dwar il-gravità tas-sitwazzjoni u l-implikazzjonijiet tagħha madwar id-dinja. Fl-2021, ir-Russja u l-Ukrajna kienu fost l-akbar esportaturi dinjija taċ-ċereali u ż-żrieragħ u ż-żejt tal-ġirasol, bl-Ukrajna responsabbli għal aktar minn 50% tal-kummerċ dinji taż-żejt tal-ġirasol. Huwa stmat li bejn 20% u 30% taż-żoni tal-produzzjoni taċ-ċereali tax-xitwa, il-qamħirrum u ż-żerriegħa tal-ġirasol fl-Ukrajna ser jibqgħu ma jinħasdux jew ma jiġux imħawla din ir-rebbiegħa minħabba l-kunflitt li għaddej. Dan ser ikollu impatt qawwi fuq il-popolazzjonijiet vulnerabbli madwar id-dinja, b'mod partikolari f'pajjiżi bi dħul baxx li jiddependu fuq l-importazzjonijiet tal-ikel u tal-fertilizzanti.
Il-Kunsill imbagħad iddiskuta diversi linji ta' azzjoni li l-UE ser tmexxi 'l quddiem fi spirtu ta' Tim Ewropa.
L-ewwel nett, l-UE ser tipprovdi assistenza ta' emerġenza lill-popolazzjonijiet vulnerabbli u ser tgħin biex tittejjeb l-affordabbiltà tal-ikel u l-istabbiltà makroekonomika fuq perjodu qasir. It-tieni nett, l-UE ser tappoġġa aktar minn 70 pajjiż sieħeb biex tingħata spinta lill-output u lir-reżiljenza u s-sostenibbiltà tas-sistemi tal-ikel tagħhom, biex tiżdied is-sigurtà tal-ikel fuq terminu medju. It-tielet nett, l-UE hija impenjata li tiżgura r-rilaxx ta' 20 miljun tunnellata ta' ċereali li attwalment jinsabu imblukkati fis-sajlos tal-Ukrajna mill-gwerra ta' Putin, u tpoġġihom fis-swieq globali malajr kemm jista' jkun permezz tal-hekk imsejħa "korsiji ta' solidarjetà", li ġew proposti reċentement mill-Kummissjoni Ewropea. Fl-aħħar nett, l-UE ser taħdem saħansitra aktar fil-qrib u fi ħdan in-Nazzjonijiet Uniti, il-G7, l-inizjattiva tal-Missjoni ta' Reżiljenza Alimentari u Agrikola (FARM), u formati oħra għall-kooperazzjoni globali dwar din il-kriżi.
Il-ministri għall-iżvilupp kellhom skambju informali ta' fehmiet mal-Kummissarju Għoli tan-NU għar-Refuġjati Filippo Grandi, li pprovda ħarsa ġenerali lejn is-sitwazzjoni globali u l-ħidma mwettqa mill-UNHCR. Id-diskussjoni ffukat fuq l-Ukrajna, is-Saħel, l-Afganistan u l-Myanmar, fost l-oħrajn. Bħalissa hemm aktar minn 100 miljun persuna spostata bil-forza madwar id-dinja.
Il-UNHCR huwa sieħeb ewlieni għall-UE li, flimkien mal-istati membri tagħha, hija t-tieni l-akbar donatur għall-UNHCR. L-UE qed taħdem mill-qrib mal-istati membri tagħha fuq rispons konġunt ta' Tim Ewropa biex jiġu indirizzati l-konsegwenzi tal-kriżi u jiġu żgurati finanzjament u appoġġ adegwati għall-popolazzjonijiet l-aktar milquta u vulnerabbli madwar id-dinja.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Is-suq tal-ikel kien diġà taħt stress qabel il-gwerra, iżda wara l-attakk Russu kontra l-Ukrajna, din il-kriżi marret għall-agħar ħafna. Illum dan jipperikola s-sigurtà tal-ikel ta' miljuni ta' nies f'ħafna partijiet tad-dinja. It-truppi Russi qed jibbumbardjaw l-għelieqi Ukreni, ma jippermettux iż-żrigħ tal-għelejjel, jisirqu l-ħażniet tal-ikel, jimblukkaw il-portijiet Ukreni, u b'hekk qed jiżdiedu l-prezzijiet tal-ikel u l-fertilizzant li żdiedu f'daqqa f'ħafna partijiet tad-dinja. Għalhekk il-provvista dinjija tal-ikel tinsab fil-periklu, l-aktar minħabba l-invażjoni Russa tal-Ukrajna.