"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Kunsill Affarijiet Barranin (Żvilupp), 26 ta' Mejju 2025
Riżultati ewlenin
Finanzjament għall-iżvilupp
Il-Kunsill Affarijiet Barranin (Żvilupp); l-ewwel wieħed għar-Rappreżentant Għoli Kaja Kallas, kellu skambju ta' fehmiet dwar il-finanzjament għall-iżvilupp qabel ir-raba' Konferenza Internazzjonali dwar il-Finanzjament u l-Iżvilupp (FfD4), skedata mit-30 ta' Ġunju sat-3 ta' Lulju 2025 f'Sivilja fi Spanja.
Il-ministri appellaw għal riforma tal-arkitettura finanzjarja internazzjonali għall-iżvilupp u ssottolinjaw il-ħtieġa urġenti li jiġu implimentati bis-sħiħ l-Għanijiet ta' Żvilupp Sostenibbli (SDGs).
Din il-konferenza ser tiffoka fuq kwistjonijiet ġodda li qed ifiġġu f'ambjent globali li qed jinbidel malajr, ikkaratterizzat minn tensjonijiet ġeopolitiċi li qed jiżdiedu u aggravat mit-tnaqqis fl-għajnuna esterna mill-Istati Uniti, li poġġew pressjoni konsiderevoli fuq il-finanzjament tal-iżvilupp globali.
L-UE hija impenjata li tibqa' sieħeb affidabbli fl-iżvilupp internazzjonali, b'enfasi partikolari biex tiżgura li ħadd ma jitħalla jibqa' lura fil-mixja globali lejn il-prosperità sostenibbli. Il-konklużjonijiet approvati llum jaffermaw mill-ġdid ir-rwol tal-UE fit-tiswir ta' sistema finanzjarja globali aktar ġusta u aktar inklużiva.
Il-Kunsill kellu wkoll skambju ta' fehmiet dwar ir-relazzjonijiet bejn l-UE u l-Afrika bħala segwitu għas-suċċess tat-tielet laqgħa ministerjali bejn l-UE u l-Unjoni Afrikana li saret fil-21 ta' Mejju 2025.
Il-ministri rriflettew dwar kif jistgħu jsaħħu s-sħubija tal-UE mal-Afrika u ddiskutew il-ħtieġa li jidentifikaw eżiti konkreti qabel is-7 Summit bejn l-Unjoni Afrikana u l-UE aktar tard din is-sena, waqt li saħqu fuq l-importanza li tiżdied il-viżibbiltà tal-investimenti tal-UE fl-Afrika, speċjalment il-proġetti tal-Global Gateway, li jiġu esplorati toroq lejn allinjament aktar profond bejn l-Ewropej u l-Afrikani f'fora multilaterali, u li tissaħħaħ l-azzjoni konġunta fi kwistjonijiet dinjija.
Taħt ġrajjiet kurrenti, il-Kunsill irrieżamina wkoll l-iżviluppi reċenti rigward l-Ukrajna u l-Pjan għall-Ukrajna, u tkellem dwar kif jista' jiġi żgurat appoġġ ikkoordinat minn Tim Ewropa.
Ir-Rappreżentant Għoli Kallas enfasizzat li l-ħtiġijiet umanitarji għadhom enormi, inkluż fir-rigward tal-akkomodazzjoni u l-enerġija. April 2025 kien wieħed mill-aktar xhur imdemmija għaċ-ċivili mill-invażjoni Russa fuq skala sħiħa fi Frar 2022.
Mill-2022 'l hawn, l-Istati Membri u l-Kummissjoni pprovdew total ta' €4.2 biljun f'għajnuna umanitarja lill-Ukrajna, li minnhom il-Kummissjoni kkontribwiet €1.1 biljun. Aktar minn 155 000 tunnellata ta' assistenza twasslet lejn l-Ukrajna miċ-ċentri loġistiċi tal-UCPM.
Azzjoni esterna wara l-2027
Waqt ikla informali, il-ministri kellhom skambju ta' fehmiet dwar l-azzjoni esterna wara l-2027, fejn iffukaw fuq diversi elementi bħal: l-iżgurar li l-UE tibqa' sieħeb affidabbli u kredibbli, it-tfittxija ta' bilanċ tajjeb bejn il-prevedibbiltà u l-flessibbiltà, l-aċċertazzjoni li l-azzjoni esterna tal-UE tkun konsistenti u taqdi l-prijoritajiet politiċi u l-interessi strateġiċi tagħha, u ż-żamma tal-appoġġ lill-Ukrajna.
Affarijiet oħra
Taħt affarijiet oħra, il-ministri ġew infurmati dwar ir-riżultati tas-summit dwar in-Nutrizzjoni għat-Tkabbir, li sar f'Pariġi fis-27 u t-28 ta' Marzu 2025, bl-għan li jiġu kkoordinati azzjonijiet biex tintemm il-malnutrizzjoni. Il-ministri ġew infurmati wkoll dwar ittra mressqa minn xi wħud mill-kollegi tagħhom dwar it-tisħiħ tar-rwol tal-intrapriżi żgħar u ta' daqs medju (SMEs) fl-implimentazzjoni tal-istrateġija Global Gateway.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
