"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Barranin (Kummerċ), 15 ta' Mejju 2025
Riżultati ewlenin
Relazzjonijiet kummerċjali bejn l-UE u l-Istati Uniti
Il-Kunsill kellu dibattitu ta' orjentazzjoni dwar ir-relazzjonijiet kummerċjali bejn l-UE u l-Istati Uniti. Il-ministri kkonfermaw mill-ġdid il-pożizzjoni ġenerali tal-UE dwar il-politika kummerċjali l-ġdida tal-Istati Uniti u affermaw mill-ġdid l-unità tal-UE fir-rigward tar-relazzjonijiet kummerċjali trans-Atlantiċi. Soluzzjoni bbilanċjata u aċċettabbli b'mod reċiproku fi żmien is-sospensjoni parzjali ta' 90 jum tal-miżuri tal-Istati Uniti u s-sospensjoni tal-ewwel sett (limitat) ta' kontromiżuri tal-UE tibqa' l-għażla ppreferuta tal-UE.
Sadanittant, l-UE qed tieħu l-passi meħtieġa biex tkun lesta jekk ikunu meħtieġa aktar kontromiżuri. Barra minn hekk, ir-riskji relatati mad-devjazzjoni tat-traffiku kummerċjali ser jiġu mmonitorjati u indirizzati bir-reqqa kif meħtieġ. Għaddejjin sforzi biex jiġu diversifikati l-flussi kummerċjali tal-UE, flimkien ma' żieda fir-ritmu tal-ħidma biex jiġi sfruttat il-potenzjal sħiħ tas-suq uniku għall-promozzjoni u l-faċilitazzjoni tan-negozju fl-UE.
Qed niltaqgħu f'nofs triq mill-mument li kemm l-UE kif ukoll l-Istati Uniti ssospendew l-aspetti potenzjalment diffiċli tar-relazzjonijiet kummerċjali tagħna. Ninsabu determinati li nagħmlu l-aħjar użu mill-ħin li fadal. L-Ewropa hija dwar il-bini ta' pontijiet, mhux ħitan. L-approċċ tagħna huwa li ninnegozjaw, iżda wkoll li nħejju għall-pjan B.
Michał Baranowski, Sottosegretarju tal-Istat fil-Ministeru għall-Iżvilupp Ekonomiku u t-Teknoloġija tal-Polonja, responsabbli għall-Kummerċ
L-amministrazzjoni tal-Istati Uniti introduċiet diversi tariffi, inkluż 25% fuq l-azzar, l-aluminju, u d-derivattivi tagħhom, 25% fuq il-karozzi, it-trakkijiet ħfief, u l-parts awtomobilistiċi, u tariffa ta' "linja bażi" ta' 10% fuq is-sħab kummerċjali kollha. Il-parti speċifika għall-pajjiż tal-hekk imsejħa tariffi ta' "riekwilibriju" (universali) tal-Istati Uniti hija sospiża sad-9 ta' Lulju. Bi tweġiba għat-tariffi tal-Istati Uniti fuq l-azzar u l-aluminju, u d-derivattivi tagħhom, l-UE ddeċidiet timponi kontromiżuri iżda ssospendiethom sal-14 ta' Lulju biex tipprovdi ż-żmien għal aktar diskussjonijiet.
Kummerċ UE-Stati Uniti: fatti u ċifri (Infografika)
Sigurtà ekonomika Ewropea
Il-Kunsill kellu skambju ta' fehmiet dwar is-sigurtà ekonomika Ewropea, inkluż ir-rieżami tar-Regolament dwar l-Iskrinjar tal-IDB, il-kontrolli tal-esportazzjoni u l-kontrolli tal-investiment 'il barra, kif ukoll dwar il-governanza tas-sigurtà ekonomika fil-Kunsill.
Il-presidenza infurmat lill-Kunsill dwar il-passi li jmiss fil-ħidma dwar ir-rieżami tar-Regolament dwar l-Iskrinjar tal-IDB. Irrapportat ukoll dwar il-progress fil-koordinazzjoni tal-kontrolli tal-esportazzjoni u ħadet nota tar-rakkomandazzjoni tal-Kummissjoni dwar l-investimenti 'l barra.
Il-Kummissjoni aġġornat lill-Kunsill dwar il-ħidma li għaddejja tagħha fit-tliet pilastri tas-sigurtà ekonomika - il-promozzjoni, il-protezzjoni u s-sħubija - u dwar il-governanza tas-sigurtà ekonomika fil-Kummissjoni.
Il-ministri tennew l-appelli għal koordinazzjoni akbar fil-Kunsill, u fakkru fl-importanza ta' approċċ ibbilanċjat għas-sigurtà ekonomika.
Il-ministri ddedikaw l-ikla ta' ħidma għan-negozjati kummerċjali li għaddejjin. Id-diskussjoni indirizzat in-negozjati li għaddejjin mal-Indja, l-Awstralja, l-Indoneżja, it-Tajlandja, il-Filippini, il-Malażja, u l-Kunsill ta' Kooperazzjoni għall-Istati Għarab tal-Golf (GCC) u kkonkludiet negozjati mal-Mercosur jew il-Messiku.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
