"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-Kunsill Affarijiet Barranin iddiskuta l-aggressjoni tar-Russja kontra l-Ukrajna, wara intervent mill-Ministru għall-Affarijiet Barranin tal-Ukrajna Andrii Sybiha, li ngħaqad personalment mal-ministri tal-UE biex jaġġornahom dwar l-iżviluppi diplomatiċi li għaddejjin, is-sitwazzjoni fuq il-post, u l-aktar prijoritajiet urġenti tal-Ukrajna.
Ilkoll kemm aħna nappoġġaw l-isforzi biex jinkiseb waqfien mill-ġlied, iżda r-Russja qed iżżid il-frekwenza u l-intensità tal-attakki tagħha. Il-lejl li għadda stess, għal darb'oħra kellna ħames vittmi fi Kiev. Dan jitlob minna tweġiba qawwija.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Il-Kunsill imbagħad iddiskuta l-appoġġ militari għall-Ukrajna. F’dan il-kuntest, ir-Rappreżentant Għoli ħabbret li l-wegħdiet tal-istati membri diġà kienu jirrappreżentaw 80% tal-mira stabbilita mill-inizjattiva ta’ żewġ miljun balla.
Il-ministri tal-UE mbagħad semmew it-18-il pakkett ta’ sanzjonijiet individwali u ekonomiċi fuq ir-Russja, li bħalissa qed jiġi diskuss, u kellhom diskussjoni dwar l-azzjonijiet ibridi tar-Russja kontra pajjiżi Ewropej, abbażi ta' informazzjoni mid-Direttur tal-INTCEN tal-UE, Daniel Markić.
Waqt ikla ta’ ħidma, il-Kunsill Affarijiet Barranin iddiskuta r-relazzjonijiet maċ-Ċina, inkluż l-azzjonijiet taċ-Ċina li jaffettwaw is-sigurtà tal-UE, bħall-appoġġ taċ-Ċina għar-Russja u l-gwerra ta’ aggressjoni tagħha kontra l-Ukrajna, u l-attivitajiet ibridi taċ-Ċina (eż. ċiberattakki u Manipulazzjoni tal-Informazzjoni u Interferenza minn Barranin - FIMI). Id-Direttur tal-INTCEN tal-UE, Daniel Markić, ipprovda informazzjoni.
Iċ-Ċina hija waħda mill-akbar sħab kummerċjali, u għandna ftit kwistjonijiet bħat-tibdil fil-klima fejn nikkooperaw. Iżda kull relazzjoni teħtieġ doża ta’ realiżmu. Iċ-Ċina tippermetti l-gwerra tar-Russja kontra l-Ukrajna. [...] Twettaq ċiberattakki. Tinterferixxi fid-demokraziji tagħna. Tuża prattiki kummerċjali koerċittivi. Dawn l-aspetti jqiegħdu r-relazzjoni tagħna taħt pressjoni u jagħmluha dejjem aktar diffiċli li nkomplu bħal qabel.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Is-sitwazzjoni fil-Lvant Nofsani u l-Libja
Il-Kunsill Affarijiet Barranin kien preċedut minn kolazzjon informali biex jiġu diskussi l-aħħar żviluppi fl-Iran. F’dan il-kuntest il-ministri tal-UE ddikjaraw mill-ġdid l-appell tal-UE għal tnaqqis tat-tensjoni u eżitu diplomatiku, u kkonfermaw il-pożizzjoni tal-UE li l-Iran qatt ma għandu jitħalla jikseb arma nukleari.
Dwar Gaża, ir-Rappreżentant Għoli saħqet li l-prijoritajiet tal-UE huma ċari: ritorn għal waqfien sħiħ mill-ġlied, aċċess umanitarju sħiħ, u l-ħelsien tal-ostaġġi kollha. Hija infurmat lill-Kunsill dwar il-kuntatti tagħha mal-awtoritajiet Iżraeljani u l-messaġġi mgħoddija lill-Ministru Saar, inkluż dwar il-ħtieġa li jitneħħa l-blokk tal-ikel u l-mediċini. Ir-Rappreżentant Għoli ppreżentat ukoll lill-Kunsill ir-rieżami tal-konformità ta’ Iżrael mal-Artikolu 2 tal-Ftehim ta’ Assoċjazzjoni bejn l-UE u Iżrael, u l-ministri kellhom skambju ta’ fehmiet dwaru
Issa dwar ir-riżultati tar-rieżami mal-Iżrael. L-ewwel għan tagħna huwa li nibdlu s-sitwazzjoni fuq il-post u ngħinu biex tidħol l-għajnuna umanitarja, u ngħinu lin-nies. Għalhekk illum kien il-bidu tad-dibattitu u mhux it-tmiem.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Fir-rigward tal-Libja, il-Kunsill iddiskuta kif l-UE tista’ tkompli tappoġġa l-proċess ta’ medjazzjoni mmexxi min-NU bil-ħsieb ta’ soluzzjoni politika dejjiema.
Taħt ġrajjiet kurrenti, ir-Rappreżentant Għoli rreferiet għas-sitwazzjoni li sejra għall-agħar fil-Georgia, fejn hemm mewġa ġdida ta’ ripressjoni mmirata lejn il-mexxejja tal-oppożizzjoni, l-organizzazzjonijiet tas-soċjetà ċivili, ix-xandara indipendenti u d-dimostranti, u l-awtoritajiet Georgjani qed ixerrdu diżinformazzjoni dwar l-UE u l-istati membri tagħha.
Illum il-Kunsill approva konklużjonijiet dwar is-Sirja u l-prijoritajiet li l-UE ser issegwi fit-80 sessjoni li jmiss tal-Assemblea Ġenerali tan-Nazzjonijiet Uniti (Settembru 2025 – Settembru 2026).
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
