Kunsill Affarijiet Ġenerali (Art. 50), 29/01/2018, 29 ta' Jannar 2018

Riżultati ewlenin

Perjodu ta' transizzjoni wara l-Brexit: direttivi ta' negozjati

Il-ministri tal-UE27 adottaw sett ġdid ta' direttivi ta' negozjati għan-negozjati tal-Brexit, li jagħti dettalji dwar il-pożizzjoni tal-UE27 dwar il-perjodu ta' transizzjoni. Skont il-pożizzjoni tal-UE, matul il-perjodu ta' transizzjoni l-acquis kollu tal-UE ser ikompli japplika għar-Renju Unit daqs li kieku kien stat membru. Madankollu, ir-Renju Unit, peress li diġà jkun pajjiż terz, mhux ser jipparteċipa aktar fl-istituzzjonijiet u fit-teħid tad-deċiżjonijiet tal-UE. Dawn id-direttivi ta' negozjati jipprovdu mandat lill-Kummissjoni, bħala n-negozjatur tal-UE, biex tiftaħ negozjati mar-Renju Unit dwar din il-kwistjoni.

• Il-Kunsill (Artikolu 50) jadotta direttivi ta' negozjati dwar il-perjodu ta' transizzjoni (stqarrija għall-istampa, 29/01/2018)

Is-sitwazzjoni attwali tan-negozjati tal-Brexit

Il-Kunsill ġie infurmat min-negozjatur ewlieni Michel Barnier dwar is-sitwazzjoni attwali tan-negozjati mar-Renju Unit. Michel Barnier aġġorna lill-ministri dwar l-oqsma ta' ħidma differenti ta' din it-tieni fażi, fejn ser jiġu diskussi t-transizzjoni u l-qafas tar-relazzjonijiet futuri waqt li qed tiġi konkluża l-ħidma dwar il-kwistjonijiet tal-ħruġ.

Ninsabu lkoll kuntenti li nistgħu nibdew niddiskutu t-transizzjoni mar-Renju Unit. Madanakollu, ma rridux ninsew l-hekk imsejħa "kwistjonijiet tal-ħruġ". Huwa essenzjali u urġenti li din il-ħidma titlesta. U naturalment l-impenji kollha li ttieħdu f'Diċembru jeħtieġ li jiġu rispettati bis-sħiħ u mniżżlin f'test legali. Dan hu essenzjali biex isir progress fin-negozjati. Il-Viċi Prim Ministru Bulgara Ekaterina Zaharieva

• Brexit - Kronoloġija (informazzjoni ġenerali)