Kunsill Affarijiet Ġenerali, 27/02/2018, 27 ta' Frar 2018

Riżultati ewlenin

Kunsill Ewropew ta’ Marzu

Il-Kunsill beda t-tħejjijiet għal-laqgħa tal-Kunsill Ewropew tat-22 u t-23 ta' Marzu 2017 billi ddiskuta abbozz ta' aġenda annotata. Il-laqgħa ser tiffoka fuq miżuri biex isaħħu t-tkabbir, joħolqu impjiegi ġodda u jtejbu l-kompetittività.

Il-Kunsill Ewropew mistenni jadotta konklużjonijiet li jindirizzaw:

• il-progress li sar fl-iżvilupp ulterjuri tas-suq uniku, is-Suq Uniku Diġitali, l-Unjoni tas-Swieq Kapitali u l-Unjoni tal-Enerġija
• is-Semestru Ewropew 2018
• kwistjonijiet soċjali, bħall-implimentazzjoni tal-Pilastru Ewropew tad-Drittijiet Soċjali u l-proposta dwar Awtorità Ewropea tax-Xogħol li ser tintbagħat dalwaqt mill-Kummissjoni
• (possibbli) il-kummerċ

Ser jadotta wkoll konklużjonijiet proċedurali dwar is-Summit UE-Balkani tal-Punent li ser isir dalwaqt.

Bħala parti mill-Aġenda tal-Mexxejja, il-kapijiet ser ikollhom dibattitu dwar it-tassazzjoni, b'mod partikolari fl-ekonomija diġitali.

L-istat tad-dritt fil-Polonja

Il-Kummissjoni ppreżentat l-proposta motivata tagħha skont l-Artikolu 7(1) TUE dwar l-istat tad-dritt fil-Polonja.

Il-preżentazzjoni tagħmel parti mill-ewwel fażi tal-proċedura skont l-Artikolu 7(1) TUE. Parallelament, il-Kummissjoni tinsab fi djalogu mal-awtoritajiet Pollakki u ħarġet rakkomandazzjonijiet sabiex huma jieħdu azzjoni dwarhom sal-20 ta' Marzu.

Il-passi li jmiss fil-proċedura jiddependu mir-riżultati ta' dan il-djalogu. Il-Kunsill ser jerġa' lura għal din il-kwistjoni aktar 'il quddiem.

Inħeġġu li jitkompla d-djalogu bejn il-Kummissjoni Ewropea u l-Polonja. Riżultat pożittiv jgħin lill-Unjoni tiffoka fuq l-aġenda li għandna bżonn immexxu 'l quddiem fl-2018. Ekaterina Zaharieva, Viċi Prim Ministru tal-Bulgarija

Imblukkar ġeografiku

Il-Kunsill adotta mingħajr diskussjoni regolament biex jipprojbixxi l-imblukkar ġeografiku mhux ġustifikat fis-suq intern.

L-imblukkar ġeografiku huwa prattika diskriminatorja li tipprevjeni lill-klijenti online milli jaċċedu għal u jixtru prodotti jew servizzi minn sit web ibbażat fi stat membru ieħor. Il-liġi l-ġdida ser tneħħi l-ostakli għall-kummerċ elettroniku billi tiġi evitata d-diskriminazzjoni abbażi tan-nazzjonalità, tal-post tar-residenza jew tal-post ta’ stabbiliment tal-klijenti.

It-tmiem tal-imblukkar ġeografiku tfisser għażla akbar u konsegwentement prezzijiet aħjar għall-konsumaturi u aktar opportunitajiet għan-negozji. Il-Presidenza Bulgara tagħti importanza kbira lill-ekonomija diġitali. Nixtieq nikkumplimenta lill-presidenzi preċedenti, lill-Parlament u lill-Kummissjoni għas-suċċess kollettiv billi mexxew ‘il quddiem is-Suq Uniku Diġitali Ewropew. Lilyana Pavlova, Ministru għall-Presidenza Bulgara tal-Kunsill tal-UE

• Imblukkar ġeografiku: Il-Kunsill jadotta regolament biex ineħħi l-ostakli għall-kummerċ elettroniku (stqarrija għall-istampa, 27 ta' Frar 2018)

Sistema tal-UE għan-negozjar tal-emissjonijiet

Il-Kunsill approva mingħajr diskussjoni r-riforma tas-sistema tal-UE għan-negozjar tal-emissjonijiet (ETS) għall-perjodu wara l-2020.

Id-direttiva ETS riveduta hija pass sinifikanti biex l-UE tilħaq il-mira tagħha li tnaqqas l-emissjonijiet ta' gass b'effett ta' serra b'mill-inqas 40% sal-2030, kif miftiehem fil-qafas tal-UE għall-klima u l-enerġija għall-2030, u tirrispetta l-impenji tagħha skont il-Ftehim ta’ Pariġi.

Bħala Presidenza ser naħdmu biex inżommu r-rwol ewlieni tal-UE fin-negozjati dwar il-konklużjoni tar-regoli għall-implimentazzjoni tal-Ftehim ta’ Pariġi. It-tnaqqis fl-emissjonijiet ta’ gass b’effett ta’ serra mhux biss ser jikkontribwixxi għall-ġlieda kontra t-tibdil fil-klima iżda ser ikollu wkoll impatt pożittiv fuq it-titjib tal-kwalità tal-arja. Il-protezzjoni tal-ambjent u tas-saħħa taċ-ċittadini Ewropej hija waħda mill-prijoritajiet tal-Presidenza Bulgara. Neno Dimov, il-Ministru għall-Ambjent u l-Ilma tal-Bulgarija

• Riforma tas-Sistema tal-UE għan-Negozjar tal-Emissjonijiet: il-Kunsill japprova regoli ġodda għall-perjodu 2021 sa 2030 (stqarrija għall-istampa, 27 ta' Frar 2018)