Enerġija

Enerġija affordabbli u affidabbli hija kruċjali għall-prosperità tal-UE.

L-għan tal-pajjiżi tal-UE huwa li jibnu unjoni tal-enerġija b'saħħitha, iżidu s-sovranità tal-enerġija u l-kompetittività globalment, filwaqt li jiddekarbonizzaw is-settur, bil-ħsieb li jintlaħqu l-għanijiet klimatiċi.

Id iżżomm turbina eolika, pannelli solari, siġra, u ċirku bi stilel bħal fl-emblema tal-UE.

L-assigurazzjoni tal-provvista tal-enerġija

Il-pajjiżi tal-UE qed jaħdmu flimkien biex jiżguraw il-provvista tal-enerġija bi prezzijiet kompetittivi għall-ekonomija tal-UE u ċ-ċittadini tagħha.

L-għan tal-pajjiżi tal-UE huwa li jnaqqsu d-dipendenza fuq il-fjuwils fossili tar-Russja, jiddiversifikaw ir-rotot tal-provvista u jsaħħu r-rabtiet ma' sħab aktar affidabbli, filwaqt li jappoġġaw il-bidla lejn enerġija aktar ekoloġika, b'mod partikolari l-enerġija nadifa prodotta fl-Ewropa.

Ir-regoli tal-UE jipproteġu lill-konsumaturi u lill-kumpaniji minn żidiet qawwija fil-prezzijiet tal-enerġija u għandhom l-għan li jintegraw aħjar is-sistemi nazzjonali tal-enerġija tal-pajjiżi tal-UE f'unjoni tal-enerġija aktar b'saħħitha.

Kif wieġbet għall-kriżi tal-enerġija tal-2022 l-UE?

Tbegħid mill-gass Russu

Fl-2025, il-volum ta' gass importat mir-Russja kien inqas minn terz tal-livell tal-2021. Iċ-ċart ta' hawn taħt turi l-volum ta' gass importat mill-UE f'biljun metru kubu.

Verżjoni testwali

Ċart li tqabbel il-provvista tal-gass mis-sħab ewlenin tal-UE fl-2021 mal-2023 u l-2025.

L-importazzjonijiet mir-Russja naqsu minn aktar minn 150 biljun metru kubu (bcm) fl-2021 għal 40.9 bcm fl-2025. Dan kien prinċipalment ikkumpensat minn importazzjonijiet li qed jiżdiedu minn sħab oħra. L-importazzjonijiet mill-Istati Uniti żdiedu minn 18.9 bcm fl-2021 għal 79.4 bcm fl-2025. L-importazzjonijiet min-Norveġja żdiedu minn 79.5 bcm fl-2021 għal 97.2 bcm fl-2025.

Sors: Kalkolu tal-Kummissjoni Ewropea bbażat fuq LSEG (Refinitiv) u ENTSO-G

F'Jannar 2026, l-UE adottat regolament biex gradwalment tipprojbixxi l-importazzjonijiet tal-gass Russu li fadal, sa mhux aktar tard minn tmiem l-2027.

Nagħmlu l-enerġija aktar ekoloġika

Is-settur tal-enerġija huwa l-akbar sors tal-UE ta' emissjonijiet ta' gassijiet serra.

Skont il-Patt Ekoloġiku Ewropew u r-regoli ta' "Lesti għall-mira ta' 55%", il-pajjiżi tal-UE stabbilew għanijiet għat-tnaqqis tal-emissjonijiet mis-settur tal-enerġija li jinkludu:

tbegħid progressiv mill-fjuwils fossili
żieda tas-sehem tal-enerġija rinnovabbli
użu aktar effiċjenti tal-enerġija, inkluż fil-bini
ħolqien ta' suq għall-idroġenu

Lesti għall-Mira ta' 55%

Il-kapaċità tal-enerġija rinnovabbli

Mill-2020 sal-2025, il-kapaċità tal-enerġija solari tal-UE kibret b'157% għal total ta' 406 gigawatt, skont id-data mill-Kummissjoni Ewropea. Dan huwa aktar milli huwa meħtieġ biex pajjiż bħall-Italja jkollu l-enerġija għal sena sħiħa. Il-produzzjoni tal-enerġija mir-riħ ukoll qed tiżdied b'rata mgħaġġla.

L-enerġija rinnovabbli, bħall-enerġija solari u mir-riħ, hija ċentrali għat-tranżizzjoni lejn enerġija nadifa u tista' tgħin biex titnaqqas id-dipendenza tal-UE fuq fornituri esterni tal-enerġija.

Kif l-UE qed tekoloġizza l-enerġija

Il-produzzjoni tal-enerġija rinnovabbli fl-UE mistennija tkompli tikber

L-istati membri tal-UE qed jikkollaboraw biex iżidu l-użu ta' sorsi ta' enerġija rinnovabbli u, kif jidher fiċ-ċart, huwa mbassar li l-produzzjoni tagħhom fl-UE tkompli tikber matul is-snin li ġejjin. Fl-2024, 25.4% tal-enerġija finali kollha kkunsmata fl-UE nkisbet minn sorsi rinnovabbli. L-għan huwa li s-sorsi ta' enerġija rinnovabbli jammontaw għal aktar minn 42.5% tat-taħlita tal-enerġija tal-UE sal-2030.

Verżjoni testwali

Ċart li turi l-kapaċità kumulattiva f'gigawatts (GW) fl-UE għall-enerġija solari, l-enerġija mir-riħ, il-bijoenerġija u l-enerġija idroelettrika mill-2010 sal-2024, bi tbassir għas-snin 2025-2030.

Il-kapaċità tal-enerġija idroelettrika esperjenzat tkabbir limitat biss, minn 143.2 GW fl-2010 għal 152.7 GW fl-2024. Il-kapaċità mistennija tibqa' stabbli u tilħaq 159 GW fl-2030.
Il-bijoenerġija tirrappreżenta biss sehem żgħir tal-produzzjoni tal-enerġija rinnovabbli fl-UE. Il-kapaċità tal-bijoenerġija tal-UE kibret minn 25 GW fl-2010 għal 37.2 GW fl-2024 u skont it-tbassir ser tibqa' bejn wieħed u ieħor f'dan il-livell.
Il-kapaċità tal-enerġija mir-riħ kibret b'mod kostanti u żdiedet minn 79.2 GW fl-2010 għal 230.8 GW fl-2024. Il-kapaċità mistennija tkompli tikber u tilħaq 368.6 GW fl-2030.
L-enerġija solari hija s-sors ta' enerġija rinnovabbli li kiber l-aktar, minn 30 GW fl-2010 għal 332.1 GW fl-2024. L-Aġenzija Internazzjonali tal-Enerġija (AIE) tbassar li sal-2030, il-kapaċità tal-enerġija solari fl-UE ser tilħaq 690.1 GW.

L-aħħar aħbarijiet

Ara l-istqarrijiet għall-istampa kollha

Laqgħat relatati

Ara l-laqgħat li għaddew

L-aħħar spjegazzjonijiet

Grafika stilizzata li turi bozza b'ger fuq ġewwa fuq ix-xellug u binja uffiċċji għoli fuq il-lemin, konnessi b'linja blu tiela' 'l fuq.

Nagħtu spinta lill-kompetittività tal-UE: it-triq 'il quddiem

Illustrazzjoni ta' żewġ idejn iwaqqfu l-gass miċ-ċmieni ta' fabbrika.

Tibdil fil-klima: x'qed tagħmel l-UE

Grafika dwar l-infrastruttura għall-importazzjoni tal-gass naturali likwifikat (LNG) fil-pajjiżi tal-UE.

L-infrastruttura tal-gass naturali likwifikat fl-UE