Kunsill Affarijiet Ġenerali, 24 ta' Ġunju 2014

Status ta' kandidat tal-UE għall-Albanija

Il-Kunsill Affarijiet Ġenerali fil-laqgħa tal-24 ta' Ġunju ta l-istatus ta' kandidat tal-UE lill-Albanija, u adotta l-istrateġija marittima tal-UE u l-klawżola ta' solidarjetà. Il-Ministri ttrattaw ukoll it-tħejjijiet għas-summit tal-Kunsill Ewropew li jmiss.

Il-Kunsill iddeċieda li jagħti l-istatus ta' kandidat lill-Albanija. Id-deċiżjoni issa hija soġġetta għall-approvazzjoni mill-Kunsill Ewropew. Il-Kunsill ħeġġeġ ukoll lill-pajjiż tal-Balkani tal-Punent biex iżid il-ġlieda kontra l-korruzzjoni u l-kriminalità organizzata, u biex jagħmel iktar biex itaffi l-pressjonijiet tal-immigrazzjoni fuq l-Unjoni.

Il-Ministri għamlu wkoll tħejjijiet għal-laqgħa li jmiss tal-Kunsill Ewropew, li ser issir fis-26 u s-27 ta’ Ġunju.

Fis-26 ta’ Ġunju, il-mexxejja tal-UE ser ifakkru l-bidu tal-Ewwel Gwerra Dinjija b’ċerimonja u ikla fil-belt ta’ Ypres. Waqt l-ikla huma mistennija jiffokaw id-diskussjoni tagħhom fuq il-futur tal-UE, il-prijoritajiet u l-għan tagħha fis-snin li ġejjin.

Lura fi Brussell fis-27 ta' Ġunju, il-mexxejja tal-UE ser jiddibattu:

• linji gwida strateġiċi għall-ispazju ta' libertà, sigurtà u ġustizzja u xi kwistjonijiet relatati bħall-protezzjoni tad-data u l-moviment liberu taċ-ċittadini tal-UE
• tkabbir, kompetittività u impjiegi, l-approvazzjoni tar-rakkomandazzjonijiet speċifiċi għall-pajjiżi marbuta mas-Semestru Ewropew 2014
• suġġetti dwar il-klima u l-enerġija. Il-mexxejja ser jiddiskutu wkoll il-komunikazzjoni reċenti dwar Strateġija Ewropea għas-Sigurtà tal-Enerġija li turi l-progress li għandu jsir u kif ser titnaqqas id-dipendenza fuq pajjiżi terzi għall-provvista tal-enerġija

Kwistjonijiet speċifiċi dwar relazzjonijiet esterni, speċjalment ir-relazzjonijiet mal-Ukraina u r-Russja u sħab oħra tal-lvant ser ikunu wkoll fuq nett tal-aġenda tal-Kunsill Ewropew.

Il-mexxejja ser jiffirmaw il-Ftehim ta' Assoċjazzjoni mar-Repubblika tal-Moldova, il-Ġeorġja u l-Ukraina, u jifirħu lil-Litwanja talli laħqet l-kriterji ta' konverġenza biex tadotta l-euro fl-1 ta' Jannar 2015.

Huma ser jikkunsidraw ukoll l-iżviluppi dwar in-nomina tal-president li jmiss tal-Kummissjoni Ewropea.

Suġġetti oħra fuq l-aġenda

Strateġija Marittima tal-UE

Il-Kunsill adotta strateġija li tipprovdi l-qafas politiku u strateġiku sabiex jiġu indirizzati l-isfidi tas-sigurtà marittima.

Implimentazzjoni tal-Klawżola ta' Solidarjetà mill-Unjoni

Il-Ministri adottaw deċiżjoni dwar il-klawżola ta' solidarjetà li tipprovdi assistenza tal-UE lil kwalunkwe stat membru li jiffaċċja sitwazzjoni ta' kriżi ta' daqs kbir bħal attakk terroristiku, diżastri naturali jew ikkawżat mill-bniedem. Il-mekkaniżmu huwa mfassal biex jiżgura rispons politiku tal-UE rapidu u koordinat u mobilizzazzjoni rapida tal-istrutturi kollha rilevanti tal-UE għal dawn il-katastrofi.

Strateġija tal-UE għar-reġjun Adrijatiku u Jonju

Il-Ministri kellhom skambju ta' fehmiet dwar strateġija makroreġjonali li tiġbor flimkien 8 pajjiżi tar-reġjun biex jixprunaw il-kooperazzjoni għal aktar tkabbir u impjiegi.

Programm ta' 18-il xahar tal-Kunsill

Il-Kunsill approva l-programm imfassal mit-triju ta' presidenzi li ġej (l-Italja, il-Latvja u l-Lussemburgu) li jistabbilixxi l-attivitajiet tal-Kunsill għat-18-il xahar li ġejjin.