Kunsill Affarijiet Ġenerali, 24/05/2016, 24 ta' Mejju 2016

Riżultati ewlenin

Stat tad-dritt

Il-Kunsill organizza t-tieni djalogu annwali tiegħu dwar l-istat tad-dritt b’konċentrazzjoni fuq l-isfidi li jinħolqu mill-flussi migratorji attwali għall-ħarsien tal-valuri fundamentali tal-UE. Bis-sehem tad-Direttur tal-aġenzija tal-UE għad-drittijiet fundamentali, Michael O'Flaherty, il-ministri kellhom skambju ta’ fehmiet dwar dak li jistgħu jagħmlu l-istati membri biex jiżguraw li jiġu rrispettati d-drittijiet fundamentali meta jiġu integrati r-refuġjati. Huma saħqu fuq l-importanza li l-valuri fundamentali tal-UE jiġu rrispettati meta jintlaqgħu r-refuġjati u fakkru li dawn il-valuri jeħtieġ li jiġu rrispettati wkoll mir-refuġjati.

Ebda stat membru ma għandu monopolju fuq it-tajjeb jew il-ħażin, u l-istat tad-dritt jitlob sforz u awtoriflessjoni kontinwi.” Bert Koenders, il-Ministru għall-Affarijiet Barranin tan-Netherlands u l-President tal-Kunsill

Il-ministri qasmu wkoll l-isfidi u l-aħjar prattiki fl-għajnuna lir-refuġjati biex jintegraw malajr. “L-istat tad-dritt huwa wieħed mill-valuri fundamentali tal-Unjoni Ewropea u pedament ewlieni tal-kooperazzjoni Ewropea. Mhuwiex biss valur intrinsiku, iżda huwa essenzjali wkoll biex is-suq intern jaħdem bla xkiel billi jsaħħaħ il-fiduċja reċiproka qalb l-istati membri u fi ħdanhom. Il-flussi sinifikanti ta’ refuġjati huma bla dubju test għal dawn il-valuri. Iżda huwa biss billi nirrispettaw dawn il-valuri aħna stess u niżguraw li jiġu rrispettati minn dawk li jiġu għandna li ser ikollna l-ħila negħlbu l-isfida tal-migrazzjoni u nintegraw lir-refuġjati b’suċċess fis-soċjetajiet tagħna. “Ebda stat membru ma għandu monopolju fuq it-tajjeb jew il-ħażin, u l-istat tad-dritt jitlob sforz u awtoriflessjoni kontinwi”, qal Bert Koenders, il-Ministru tan-Netherlands għall-Affarijiet Barranin u l-President tal-Kunsill.

Kunsill Ewropew ta’ Ġunju

Il-Kunsill beda t-tħejjijiet tal-Kunsill Ewropew ta' Ġunju billi ddiskuta abbozz ta’ aġenda annotata. Waqt il-laqgħa tagħhom fit-28 u d-29 ta’ Ġunju 2016 il-mexxejja tal-UE ser jerġgħu lura għas-sitwazzjoni dwar il-migrazzjoni, iwettqu l-ewwel valutazzjoni tal-fond Ewropew għall-investimenti strateġiċi, juru l-appoġġ tagħhom għal aġenda għas-suq uniku, jiżnu l-azzjoni li qed issir fil-ġlieda kontra l-frodi tat-taxxa u l-evażjoni tat-taxxa, jiddiskutu l-kooperazzjoni bejn l-UE u n-NATO u jieħdu nota tar-riżultat tar-referendum fir-Renju Unit.