Kunsill Affarijiet Ġenerali, 24/06/2016, 24 ta' Ġunju 2016

Riżultati ewlenin

Li għandna nagħmlu hu, li nikkunsidraw it-tħassib reali taċ-ċittadini, bħall-impjiegi, is-sigurtà u l-migrazzjoni, u mhux inkomplu qisu qatt ma ġara xejn Bert Koenders, il-Ministru Netherlandiż għall-Affarijiet Barranin u President tal-Kunsill

Ir-referendum fir-Renju Unit

Il-Kunsill kellu skambju ta' fehmiet dwar l-eżitu tar-referendum tar-Renju Unit bħala parti mit-tħejjijiet għall-Kunsill Ewropew ta' Ġunju. "Jiddispjaċina għad-deċiżjoni tar-Renju Unit iżda nirrispettawha. Fl-istess ħin l-UE trid tkun determinata. L-integrità tal-Unjoni Ewropea u s-solidarjetà tagħna huma importanti. Li għandna nagħmlu hu, li nikkunsidraw it-tħassib reali taċ-ċittadini, bħall-impjiegi, is-sigurtà u l-migrazzjoni, u mhux inkomplu qisu qatt ma ġara xejn", qal Bert Koenders, il-Ministru Netherlandiż għall-Affarijiet Barranin u President tal-Kunsill.

Il-Kunsill Ewropew

Il-Kunsill iffinalizza wkoll it-tħejjijiet għall-punti l-oħra fuq l-aġenda tal-Kunsill Ewropew bl-eżami tal-abbozz ta' konklużjonijiet. F'dik il-laqgħa tat-28 u d-29 ta' Ġunju l-mexxejja tal-UE ser jerġgħu lura għall-kwistjoni tal-migrazzjoni u jikkonċentraw fuq l-aspetti esterni u fuq il-qafas ġdid ta' sħubija mal-pajjiżi ta' oriġini u ta' transitu. Ser jiddiskutu wkoll kif jagħtu spinta politika ġdida lis-suq uniku kif ukoll iqisu l-ewwel riżultati tal-fond Ewropew għall-investimenti strateġiċi u tal-azzjoni li għaddejja biex jiġu ttrattati l-frodi tat-taxxa u l-evażjoni tat-taxxa. Il-mexxejja tal-UE mistennija wkoll ikollhom preżentazzjoni tal-Istrateġija Globali Ewropea dwar il-Politika Estera u ta' Sigurtà u jiddiskutu l-kooperazzjoni UE-NATO.

Prijoritajiet leġislattivi tal-UE għall-2017 u trasparenza

Il-ministri niedu ċ-ċirku annwali tal-programmazzjoni leġislattiva bi skambju ta' fehmiet dwar il-prijoritajiet leġislattivi tal-UE għall-2017. Dan jagħti kontribut bikri għall-programm ta' ħidma tal-Kummissjoni għas-sena d-dieħla. Bħala parti mill-ftehim ġdid dwar tfassil aħjar tal-liġijiet, il-Kummissjoni tikkonsulta lill-Kunsill u l-Parlament Ewropew qabel ma tadotta l-programm ta' ħidma annwali tagħha u tqis il-fehmiet tagħhom. Il-ministri ddiskutew ukoll il-progress fit-titjib tat-trasparenza fil-ħidma leġislattiva tal-UE, bħal permezz ta' bażi ta' data dwar l-istat attwali tal-fajls leġislattivi.

Semestru Ewropew

Il-ministri approvaw ir-rakkomandazzjonijiet speċifiċi għall-pajjiżi u bagħtuhom lill-Kunsill Ewropew għall-approvazzjoni. "Hu importanti li r-rakkomandazzjonijiet speċifiċi għall-pajjiżi jiġu implimentati bis-sħiħ mill-istati membri. L-amministrazzjonijiet pubbliċi ta' kwalità għolja għandhom ukoll rwol importanti x'jaqdu f'dan il-proċess, bil-għan b'mod partikolari li jkun hemm tkabbir inklużiv u ħafna integrità pubblika. Il-Kunsill Affarijiet Ġenerali għandu jkompli jiddiskuti l-kwalità tal-amministrazzjonijiet pubbliċi bħala kwistjoni trasversali sabiex ikun hemm governanza aħjar fl-UE u l-istati membri tagħha", qal Bert Koenders.