Kunsill Affarijiet Ġenerali, 18/10/2016, 18 ta' Ottubru 2016

Riżultati ewlenin

Rieżami ta’ nofs it-terminu tal-QFP

Il-Kunsill kompla bil-ħidma tiegħu dwar ir-rieżami ta’ nofs it-terminu tal-qafas baġitarju pluriennali tal-UE għall-2014-2020. Il-ministri ddiskutew l-għodod proposti mill-Kummissjoni u rriflettew dwar l-aħjar bilanċ bejn il-prevedibbiltà u l-flessibbiltà fil-qafas baġitarju. Huma kellhom ukoll skambju ta' fehmiet dwar jekk il-prudenza baġitarja hijiex kompatibbli mas-soluzzjonijiet ġodda biex jiġu akkomodati ħtiġijiet ġodda. Il-Kunsill ser jirritorna għal dan il-fajl f’Novembru.

“Meta nitkellmu dwar flus, m’hemmx għażliet faċli. Smajt xi messaġġi politiċi importanti mingħand il-ministri biex jiggwidaw aktar il-ħidma teknika tagħna. Ser nagħmlu ħilitna kollha biex nilħqu ftehim politiku dwar dan il-fajl kumpless u impenjattiv sal-aħħar tas-sena.”

Miroslav Lajčák, il-Ministru Slovakk għall-Affarijiet Barranin u Ewropej u President tal-Kunsill

• Insawru l-infiq tal-UE: qafas finanzjarju multiannwali
• Analiżi/reviżjoni ta’ nofs it-terminu tal-qafas finanzjarju pluriennali 2014–2020
• Proposta biex jiġi emendat ir-regolament dwar il-QFP

Tħejjija għall-Kunsill Ewropew ta' Ottubru

Il-Kunsill iffinalizza t-tħejjijiet għall-Kunsill Ewropew ta' Ottubru billi eżamina l-abbozz ta’ konklużjonijiet. Fil-laqgħa tagħhom tal-20 u l-21 ta’ Ottubru, il-mexxejja tal-UE ser jiffokaw fuq tliet suġġetti: il-migrazzjoni, il-kummerċ u r-Russja. Fir-rigward tal-migrazzjoni, il-Kunsill Ewropew ser jevalwa l-miżuri meħuda biex jitnaqqsu l-flussi migratorji matul ir-rotta tal-Mediterran Ċentrali u l-implimentazzjoni tad-dikjarazzjoni bejn l-UE u t-Turkija biex jiġu appoġġjati l-pajjiżi tar-rotta tal-Balkani tal-Punent. Dwar il-kummerċ, il-mexxejja tal-UE ser jiddiskutu kif jiġi żgurat li l-politika kummerċjali tal-UE tibbenefika minn swieq miftuħa filwaqt li jindirizzaw it-tħassib taċ-ċittadini. Dwar ir-Russja, il-Kunsill Ewropew ser ikollu diskussjoni komprensiva dwar ir-relazzjonijiet li l-UE għandha ma’ dan il-pajjiż.

“Il-Prim Ministru Slovakk, Robert Fico, ser jirrapporta wkoll dwar il-progress li sar biex jimmaterjalizzaw l-impenji tagħna li għamilna fis-summit ta’ Bratislava. Pereżempju, l-UE rrispondiet b’mod rapidu rigward l-assistenza lill-Bulgarija fil-qasam tal-migrazzjoni u dwar il-ftehim ta’ Pariġi dwar il-klima. Għandna nużaw dawn bħala eżempji ta' modi oħra biex tiżdied il-fiduċja taċ-ċittadini tagħna fl-UE.”

Miroslav Lajčák, il-Ministru Slovakk għall-Affarijiet Barranin u Ewropej u President tal-Kunsill

• Kunsill Ewropew, 20-21 ta’ Ottubru 2016

Ftehim interistituzzjonali dwar tfassil aħjar tal-liġijiet

Il-Kunsill evalwa l-progress fl-implimentazzjoni tal-ftehim interistituzzjonali dwar tfassil aħjar tal-liġijiet. F’konformità ma’ dan il-ftehim, il-Kunsill, il-Parlament Ewropew u l-Kummissjoni ser jiftiehmu dwar prijoritajiet ewlenin komuni għall-2017 qabel tmiem din is-sena. Dan ser jippermettilhom jaħdmu aktar mill-qrib flimkien biex jindirizzaw l-isfidi l-kbar li hemm quddiemhom.

• Ftehim dwar it-tfassil aħjar tal-liġijiet