Kunsill Affarijiet Ġenerali, 14/05/2018, 14 ta' Mejju 2018

Riżultati ewlenin

Qafas finanzjarju pluriennali għal wara l-2020

Il-Kummissjoni ppreżentat lill-Kunsill il-proposti tagħha għall-qafas finanzjarju pluriennali (QFP) għas-snin 2021 sa 2027, u l-ministri kellhom l-ewwel sessjoni ta' diskussjonijiet.

Il-baġit tal-UE hu pedament essenzjali għall-ġejjieni tal-Ewropa, u espressjoni tal-valuri u l-aspirazzjonijiet tagħna. Id-dibattitu tal-lum ta bidu għan-negozjati dwar il-QFP li jmiss, li ser jgħinna niggarantixxu Ewropa stabbli u sikura għall-ġid tagħna lkoll. Il-Presidenza Bulgara hi impenjata li tiżgura progress rapidu f'din il-kwistjoni importanti. Ekaterina Zaharieva, viċi prim ministru għar-riforma ġudizzjarja u ministru għall-affarijiet barranin tal-Bulgarija

Kunsill Ewropew ta’ Ġunju

Il-Kunsill beda t-tħejjijiet għal-laqgħa tal-Kunsill Ewropew, li ser issir fit-28 u d-29 ta' Ġunju, billi ddiskuta abbozz ta' aġenda annotata.

Fil-laqgħa tiegħu, il-Kunsill Ewropew mistenni

• jipprova jilħaq kunsens dwar il-migrazzjoni
• jindirizza għadd ta' kwistjonijiet marbutin mas-sigurtà u d-difiża
• jikkonkludi s-Semestru Ewropew tal-2018
• jadotta konklużjonijiet dwar it-tassazzjoni, u dwar l-innovazzjoni u kwistjonijiet diġitali, bħala parti mis-segwitu għad-dibattiti tal-mexxejja dwar dawn is-suġġetti
• ikollu l-ewwel skambju ta' fehmiet dwar il-qafas finanzjarju pluriennali li jmiss u jiddeċiedi dwar il-kronoloġija biex jitlestew in-negozjati

L-istat tad-dritt fil-Polonja

Il-Kunsill iddiskuta s-sitwazzjoni b'rabta mal-istat tad-dritt fil-Polonja.

Il-Kummissjoni aġġornat lill-ministri dwar l-aħħar żviluppi fid-djalogu tagħha mal-awtoritajiet Pollakki.

Il-Kunsill ser jerġa' lura għal din il-kwistjoni fil-laqgħa tiegħu li jmiss.

Azzjoni dwar il-klima u enerġija nadifa

Il-Kunsill adotta mingħajr diskussjoni erba' atti leġislattivi dwar

• "il-qsim tal-isforz" tal-emissjonijiet
• l-użu tal-art, it-tibdil fl-użu tal-art u l-forestrija
• ir-rappurtar ambjentali
• ir-rendiment tal-bini fl-użu tal-enerġija

Dan il-pakkett leġislattiv jifforma parti mill-isforzi tal-UE biex tnaqqas l-emissjonijiet ta' CO2 u tħares l-impenn tagħha fil-ftehim ta' Pariġi dwar il-klima ta' tnaqqis ta' 40% fl-emissjonijiet ta' gassijiet serra sal-2030 meta mqabbel mal-livelli tal-1990.

• Regolament dwar il-qsim tal-isforz: il-Kunsill jadotta miri għat-tnaqqis tal-emissjonijiet (stqarrija għall-istampa, 14 ta' Mejju 2018)
• Protezzjoni u ġestjoni aħjar tal-art u l-foresti madwar l-Unjoni: il-Kunsill jadotta regolament ġdid (stqarrija għall-istampa, 14 ta' Mejju 2018)
• Obbligi ta' rappurtar ambjentali: il-Kunsill jadotta regoli aktar ċari (stqarrija għall-istampa, 14 ta' Mejju 2018)
• Bini effiċjenti fl-użu tal-enerġija: il-Kunsill jadotta direttiva riveduta (stqarrija għall-istampa, 14 ta' Mejju 2018)

Ħasil tal-flus u finanzjament tat-terroriżmu

Il-Kunsill adotta mingħajr diskussjoni direttiva li ssaħħaħ ir-regoli tal-UE għall-prevenzjoni tal-ħasil tal-flus u l-finanzjament tat-terroriżmu.

Dawn ir-regoli l-ġodda jwieġbu għall-ħtieġa għal aktar sigurtà fl-Ewropa billi jkomplu jneħħu l-mezzi disponibbli għat-terroristi. Ser jippermettulna nisfrattaw netwerks kriminali mingħajr ma nikkompromettu d-drittijiet fundamentali u l-libertajiet ekonomiċi. Vladislav Goranov, ministru għall-finanzi tal-Bulgarija