Kunsill Affarijiet Ġenerali (Art. 50), 20/07/2018, 20 ta' Lulju 2018

Riżultati ewlenin

Il-Kunsill, fil-format ta' UE27, ġie mgħarraf mill-kap negozjatur tal-UE għall-Brexit Michel Barnier dwar is-sitwazzjoni attwali tan-negozjati dwar il-Brexit. Il-kap negozjatur informa lill-ministri dwar fejn jinsabu n-negozjati rigward:

• il-ħidma biex jiġi finalizzat il-ftehim dwar il-ħruġ, inkluż is-soluzzjoni ta' kontinġenza għall-fruntiera bejn l-Irlanda u l-Irlanda ta' Fuq

• id-diskussjonijiet dwar ir-relazzjonijiet futuri bejn l-UE u r-Renju Unit.

Ser ikollna biss ftehim dwar il-ħruġ jekk it-test legali jkun maqbul fir-rigward tal-kwistjonijiet kollha. Dan jinkludi l-kontinġenza għall-Irlanda ta' Fuq. F'dan il-kuntest irridu nfakkru li l-impenji kollha meħuda s'issa għandhom jiġu rispettati bis-sħiħ. Il-ftehim dwar il-ħruġ irid jiġi konkluż malajr kemm jista' jkun. Trid titħaffef ukoll il-ħidma bil-ħsieb tat-tħejjija ta' dikjarazzjoni politika dwar il-qafas għar-relazzjonijiet futuri. Barra minn hekk irridu nintensifikaw il-ħidma tagħna dwar it-tħejjija f'każ li ma jkollniex qbil. L-unità tal-UE27 tibqa' kruċjali. Gernot Blümel, ministru Awstrijak u president tal-laqgħa

Dwar ir-relazzjonijiet futuri, il-Kunsill iddiskuta kif id-dokument ta' politika ppubblikat mill-gvern tar-Renju Unit fit-12 ta' Lulju 2018 jista' jikkontribwixxi għad-diskussjonijiet. Fid-dawl tal-prinċipji stabbiliti mill-Kunsill Ewropew, in-negozjatur ser jesplora l-bażi komuni bejn il-pożizzjonijiet tal-UE u tar-Renju Unit dwar il-qafas għar-relazzjonijiet futuri. L-għan hu li jintlaħaq qbil dwar dikjarazzjoni politika konġunta li ser takkumpanja l-ftehim dwar il-ħruġ u li ser tissemma fih. In-negozjatur tal-UE ser jirrapporta lura dwar din il-kwistjoni fil-laqgħa li jmiss tal-Kunsill Affarijiet Ġenerali (Artikolu 50) f'Settembru 2018.

Il-kap negozjatur ippreżenta wkoll lill-ministri l-komunikazzjoni reċenti tal-Kummissjoni dwar l-istat ta' tħejjija. Il-ministri tennew li l-ħidma fuq l-istat ta' tħejjija għandha tiġi intensifikata fil-livelli kollha biex l-UE27 tkun lesta għal kwalunkwe eżitu possibbli.

• Brexit (informazzjoni ġenerali)
• Linji gwida tal-Kunsill Ewropew (Art. 50), 23 ta' Marzu 2018
• Konklużjonijiet tal-Kunsill Ewropew (Art. 50), 29 ta' Ġunju 2018