Kunsill Affarijiet Ġenerali, 26/06/2018, 26 ta' Ġunju 2018

Riżultati ewlenin

Tkabbir

Il-Kunsill adotta konklużjonijiet dwar il-politika ta' tkabbir tal-UE u l-proċess ta' stabbilizzazzjoni u ta' assoċjazzjoni.

Il-konklużjonijiet jirriaffermaw l-impenn tal-UE favur il-proċess tat-tkabbir u favur il-prospettiva Ewropea tal-Balkani tal-Punent.

Il-Kunsill qabel li jirrispondi b'mod pożittiv għall-progress li sar mill-Eks-Repubblika Jugoslava tal-Maċedonja u mill-Albanija, u stabbilixxa t-triq lejn il-ftuħ ta' negozjati dwar l-adeżjoni maż-żewġ pajjiżi f'Ġunju 2019.

Dan huwa jum importanti għall-Albanija u l-Eks-Repubblika Jugoslava tal-Maċedonja, u għall-Balkani tal-Punent kollha kemm hi. L-istati membri taw sinjal ċar li l-isforzi għal riformi u t-trawwim tar-rikonċiljazzjoni, relazzjonijiet tajba mal-ġirien u djalogu politiku biex jiġu solvuti kwistjonijiet li ilhom pendenti taw riżultat. Dawn huma ta' benefiċċju dirett għall-pajjiżi stess, u ta' valur usa' biex jitressqu eqreb tal-UE. Din hija kisba maġġuri hekk kif nersqu lejn tmiem il-Presidenza tagħna, peress li l-prospettiva Ewropea tal-Balkani tal-Punent kienet prijorità għolja għalina. Ekaterina Zaharieva, viċi prim ministru għar-riforma ġudizzjarja u ministru għall-affarijiet barranin tal-Bulgarija

Kunsill Ewropew ta' Ġunju

Il-Kunsill iffinalizza t-tħejjijiet għall-Kunsill Ewropew tat-28 ta' Ġunju 2018 billi ddiskuta l-abbozz ta' konklużjonijiet.

F'din il-laqgħa l-mexxejja tal-UE mistennija:

• jiddiskutu l-politika tal-migrazzjoni tal-UE u l-kummerċ
• jindirizza għadd ta' kwistjonijiet marbutin mas-sigurtà u d-difiża
• jadotta konklużjonijiet dwar it-taxxa, l-innovazzjoni u kwistjonijiet diġitali
• jiddeċiedi dwar it-trattament futur tal-qafas finanzjarju pluriennali, inkluż skeda ta' żmien
• jindirizza l-iżviluppi l-aktar reċenti tal-politika barranija
• japprova rakkomandazzjonijiet integrati speċifiċi għall-pajjiżi skont is-Semestru Ewropew
• jadotta deċiżjoni dwar il-kompożizzjoni tal-Parlament Ewropew

L-istat tad-dritt fil-Polonja

Il-Kunsill ser ikollu wkoll seduta skont l-Artikolu 7(1) TUE dwar l-istat tad-dritt fil-Polonja.

Is-seduta offriet possibbiltà għall-ministri li jkollhom skambju approfondit mal-Polonja dwar it-tħassib identifikat fil-proposta raġunata tal-Kummissjoni.

Il-qafas finanzjarju pluriennali li jmiss

Matul l-ikla ta' nofsinhar, il-ministri ddiskutew il-proposti tal-Kummissjoni għall-qafas finanzjarju pluriennali għall-2021–2027 mal-Kummissarju Oettinger.

Sikurezza tal-avjazzjoni

Il-Kunsill adotta mingħajr diskussjoni r-regoli aġġornati dwar is-sikurezza tal-avjazzjoni, li jinkludu mandat rivedut għall-Aġenzija Ewropea tas-Sikurezza tal-Avjazzjoni u l-ewwel regoli li qatt saru għall-UE kollha għad-droni ċivili.

Dawn ir-regoli ser jiżguraw li l-avjazzjoni tibqa' sikura anke meta l-ajru tagħna isir dejjem aktar traffikuż. Ivaylo Moskovski, ministru għat-trasport, it-teknoloġija tal-informazzjoni u l-komunikazzjoni tal-Bulgarija

Inizjattiva taċ-Ċittadini Ewropej

Il-Kunsill qabel mingħajr diskussjoni dwar il-pożizzjoni ta' negozjar tiegħu fuq reviżjoni proposta tal-Inizjattiva taċ-Ċittadini Ewropej. L-għan tar-regoli ġodda huwa li tiġi ffaċilitata t-tnedija u l-appoġġ ta' inizjattivi u li jiżdied l-impatt tagħhom.

Iċ-ċittadini għandhom ikun kapaċi jsemmgħu leħinhom u jiġbdu l-attenzjoni ta' dawk li jieħdu d-deċiżjonijiet fl-UE għal kwistjonijiet li huma għal qalbhom. L-Inizjattiva taċ-Ċittadini Ewropej toffri l-opportunità lil kulħadd biex jagħmel differenza. L-istati membri huma determinati li jiżguraw li din l-għodda importanti tkun sempliċi biex tintuża u effettiva. Ekaterina Zaharieva, viċi prim ministru għar-riforma ġudizzjarja u ministru għall-affarijiet barranin tal-Bulgarija