Kunsill Affarijiet Ġenerali, 18/09/2018, 18 ta' Settembru 2018

Riżultati ewlenin

Il-qafas finanzjarju pluriennali li jmiss

Il-Kunsill kellu dibattitu ta' orjentazzjoni dwar il-qafas finanzjarju pluriennali (QFP) għall-2021 sal-2027.

Il-ministri stabbilixxew il-prijoritajiet tagħhom għan-negozjati, inkluż l-opinjonijiet tagħhom dwar:

• kif il-prijoritajiet tal-politika tal-UE u l-valur miżjud Ewropew huma riflessi fil-proposta tal-QFP
• l-allokazzjoni ta' fondi proposta għad-diversi oqsma ta' politika

Il-qafas finanzjarju pluriennali tal-UE jirrappreżenta opportunità biex isiru għażliet strateġiċi għall-futur. L-għan huwa li l-baġit tal-UE jikkorrispondi għall-prijoritajiet politiċi tagħna u jġib miegħu valur miżjud bl-infiq tal-UE. Id-dibattitu tagħna llum, li ffoka fuq dawn il-kwistjonijiet essenzjali, għalhekk ser jgħin biex tiġi stabbilita l-bażi għad-diskussjonijiet futuri tagħna. Il-presidenza Awstrijaka qed tippjana ħidma intensiva fuq livell tekniku u politiku sabiex kemm jista' jkun tavvanza u tiffaċilita ftehim futur bejn l-istati membri. Gernot Blümel, Ministru Federali Awstrijak għall-UE, l-Arti, il-Kultura u l-Media

Programmazzjoni leġislattiva

Wara d-diskors tal-President Juncker dwar l-istat tal-Unjoni Ewropea, il-Kunsill iddiskuta l-prijoritajiet u l-intenzjonijiet tal-Kummissjoni għall-programm ta' ħidma tagħha għall-2019. Il-kontribut tal-ministri ser jgħin biex il-Kummissjoni tiffinalizza l-programm ta' ħidma tagħha.

Il-Kunsill evalwa wkoll is-sitwazzjoni fir-rigward tal-proposti leġislattivi pendenti fid-dawl ta' tmiem il-mandat leġislattiv tal-PE fl-2019.

Hekk kif qed noqorbu lejn l-elezzjonijiet tal-Parlament Ewropew, il-Presidenza tinsab impenjata li tikseb progress u twassal għal konklużjoni l-akbar ammont ta' fajls possibbli. Minbarra l-iskambju annwali tagħna dwar il-prijoritajiet għas-sena d-dieħla, il-ministri għalhekk ħadu rendikont ta' dak li għandna fuq il-mejda bħalissa. Gernot Blümel, Ministru Federali Awstrijak għall-UE, l-Arti, il-Kultura u l-Media

Kunsill Ewropew ta' Ottubru

Il-ministri bdew it-tħejjijiet għall-Kunsill Ewropew ta' Ottubru billi eżaminaw abbozz ta' aġenda annotata.

Fil-laqgħa tagħhom fit-18 ta' Ottubru, il-mexxejja tal-UE huma mistennija:

• jerġgħu jiddiskutu l-kwistjoni tal-migrazzjoni; ser ikun hemm rapport dwar il-progress, kif maqbul fil-konklużjonijiet tal-Kunsill Ewropew ta' Ġunju
• jadottaw il-konklużjonijiet dwar is-sigurtà interna, wara d-dibattitu tematiku tal-Mexxejja f'Salzburg
• fid-dawl tal-avvenimenti, jindirizzaw kwistjonijiet speċifiċi ta' politika barranija

L-istat tad-dritt fil-Polonja

Il-Kunsill kellu wkoll seduta ta' smigħ skont l-Artikolu 7(1) TUE dwar l-istat tad-dritt fil-Polonja.

Il-modalitajiet għas-seduta kienu l-istess bħal dawk għas-sessjoni fil-laqgħa tal-Kunsill Affarijiet Ġenerali tas-26 ta' Ġunju 2018.

Il-ministri komplew l-iskambju fil-fond tagħhom mal-Polonja dwar it-tħassib identifikat fil-proposta motivata tal-Kummissjoni.

Il-Kunsill ser jerġa' jiddiskuti din il-kwistjoni.

Il-programm tal-presidenza

Il-presidenza Awstrijaka ppreżentat il-prijoritajiet tagħha għat-tul tal-mandat tagħha li jintemm fil-31 ta' Diċembru 2018.