Kunsill Affarijiet Ġenerali, 12/11/2018, 12 ta' Novembru 2018

Riżultati ewlenin

Il-qafas finanzjarju pluriennali li jmiss

Il-Kunsill kellu dibattitu ta' orjentazzjoni dwar il-qafas finanzjarju pluriennali għall-2021-2027.

Il-ministri esprimew il-fehmiet tagħhom dwar il-punti li jqisu l-aktar importanti għal ftehim futur, fid-dawl tal-ħidma li saret sa issa.

Il-gwida tagħhom ser isservi bħala bażi għal aktar diskussjonijiet fil-livell tekniku bejn l-istati membri fil-ġranet ta' qabel il-Kunsill Ewropew ta' Diċembru.

Il-presidenza Awstrijaka qed tkompli twettaq sforzi intensivi biex tmexxi 'l quddiem il-ħidma fl-aspetti kollha tal-baġit fit-tul li jmiss, skont il-mandat mogħti mill-mexxejja. Aħna determinati li nagħmlu kemm jista' jkun progress. Gernot Blümel, ministru federali għall-UE, l-arti, il-kultura u l-media tal-Awstrija

Proċedimenti tal-Artikolu 7(1) TUE

Il-ministri ddiskutew is-sitwazzjoni attwali tal-proċedura tal-Artikolu 7(1) TUE fir-rigward tal-Ungerija.

Il-Kummissjoni pprovdiet aġġornament lill-Kunsill dwar l-aħħar żviluppi fir-riforma ġudizzjarja fil-Polonja.

• Proposta motivata skont l-Artikolu 7(1) TUE dwar l-Ungerija
• Proposta motivata skont l-Artikolu 7(1) TUE dwar il-Polonja

Kunsill Ewropew ta' Diċembru

Il-Kunsill beda t-tħejjijiet għal-laqgħa tal-Kunsill Ewropew tat-13 u l-14 ta' Diċembru billi ddiskuta abbozz ta' aġenda annotata.

Fil-laqgħa tagħhom ta' Diċembru, il-mexxejja tal-UE ser jiffukaw fuq:

• il-qafas finanzjarju pluriennali għall-2021-2027
• is-sitwazzjoni attwali fir-rigward ta' suq uniku li jiffunzjona b'mod sħiħ
• l-implimentazzjoni tal-approċċ komprensiv għall-migrazzjoni
• it-tħejjijiet għas-summit mal-Lega tal-Istati Għarab fl-24 u l-25 ta' Frar 2019
• l-azzjoni kontra d-diżinformazzjoni

Il-fiduċja fl-istituzzjonijiet pubbliċi u l-istat tad-dritt

Il-Kunsill kellu r-raba' djalogu annwali dwar l-istat tad-dritt, li ffoka fuq il-fiduċja fl-istituzzjonijiet pubbliċi u l-istat tad-dritt. Bil-parteċipazzjoni tad-Direttur tal-Aġenzija tal-UE għad-Drittijiet Fundamentali, Michael O'Flaherty, il-ministri ddiskutew il-fatturi ewlenin li jiddeterminaw il-livell ta' fiduċja fl-istituzzjonijiet pubbliċi, u r-rwol li jista' jkollhom il-media, is-soċjetà ċivili, l-UE u l-istati membri biex jinkoraġġixxu din il-fiduċja.

Il-presidenza ser tħejji konklużjonijiet dwar id-dibattitu, li ser jintbagħtu lill-korpi rilevanti tal-Kunsill għal aktar kunsiderazzjoni.

Huwa importanti li nkomplu d-djalogu dwar l-istat tad-dritt taħt il-presidenza tagħna, u li l-ministri jkollhom opportunità li jaqsmu fehmiethom dwar din il-kwistjoni separatament minn każijiet individwali speċifiċi. Is-suġġett tagħna din is-sena, il-fiduċja fl-istituzzjonijiet pubbliċi, huwa essenzjali għall-funzjonament tajjeb tas-soċjetajiet tagħna. Gernot Blümel, ministru federali għall-UE, l-arti, il-kultura u l-media tal-Awstrija

Punti oħra

Il-ministri segwew preżentazzjoni u kellhom skambju ta' fehmiet dwar il-programm ta' ħidma tal-Kummissjoni għall-2019.

Il-Kummissjoni ppreżentat il-pakkett ta' sussidjarjetà tagħha ppublikat fit-23 ta' Ottubru. Il-pakkett ser jiġi diskuss f'aktar dettall f'konferenza organizzata mill-presidenza Awstrijaka fil-15 u s-16 ta' Novembru fi Bregenz, l-Awstrija.

Bħala parti mit-tħejjija tas-Semestru Ewropew li jmiss, il-presidenza Awstrijaka u l-presidenza Rumena li jmiss ippreżentaw il-pjan direzzjonali għas-Semestru Ewropew 2019.

• Programm ta' ħidma tal-Kummissjoni 2019
• Il-pakkett ta' sussidjarjetà tal-Kummissjoni