Kunsill Affarijiet Ġenerali, 11/12/2018, 11 ta' Diċembru 2018

Riżultati ewlenin

Il-qafas finanzjarju pluriennali li jmiss

Il-Kunsill kellu dibattitu ta' orjentazzjoni dwar il-qafas finanzjarju pluriennali (QFP) għall-2021-2027. Il-ministri kellhom skambju ta' fehmiet dwar il-kwistjonijiet ewlenin li tressqu u l-iskeda ta' żmien għan-negozjati. Id-diskussjonijiet tagħhom ħadu kont ta' żewġ dokumenti mħejjija taħt ir-responsabbiltà tal-presidenza Awstrijaka - rapport ta' progress u abbozz ta' kaxxa ta' negozjar.

Il-kaxxa ta' negozjar hija għodda użata għall-istrutturar u l-faċilitazzjoni tal-proċess ta' negozjar dwar il-QFP. Tiġbor flimkien dawk l-elementi li l-aktar probabbli jirrikjedu gwida politika mill-mexxejja bil-ħsieb li l-Kunsill jilħaq il-pożizzjoni tiegħu. Hija tiġi diskussa u l-ħin kollu aġġornata hekk kif in-negozjati jimxu 'l quddiem.

Il-fatt li l-QFP ikun fuq kull aġenda tal-KAĠ ta l-frott: illum il-presidenza Awstrijaka ppreżentat rapport ta' progress tal-presidenza u abbozz ta' kaxxa ta' negozjar. Il-ministri kellhom dibattitu kostruttiv u kkondividew il-fehmiet tagħhom qabel l-ewwel dibattitu sostanzjali dwar il-QFP bejn il-mexxejja aktar tard din il-ġimgħa. Gernot Blümel, ministru federali għall-UE, l-arti, il-kultura u l-media tal-Awstrija

• Abbozz ta' kaxxa ta' negozjar imħejji mill-presidenza (30/11/2018)
• Rapport ta' progress tal-presidenza (30/11/2018)

Kunsill Ewropew ta' Diċembru

Il-Kunsill iffinalizza t-tħejjijiet għal-laqgħa tal-Kunsill Ewropew tat-13-14 ta' Diċembru billi ddiskuta l-abbozz ta' konklużjonijiet li jkopru:

• il-qafas finanzjarju pluriennali li jmiss
• is-suq uniku
• il-migrazzjoni
• relazzjonijiet esterni
• it-tibdil fil-klima
• is-sigurtà u d-difiża
• id-diżinformazzjoni
• il-ġlieda kontra l-antisemitiżmu, ir-razziżmu u l-ksenofobija
• djalogi u konsultazzjonijiet taċ-ċittadini

Proċedimenti skont l-Artikolu 7

Il-Kunsill kellu seduta ta' smigħ skont l-Artikolu 7(1) TUE dwar l-istat tad-dritt fil-Polonja. Il-modalitajiet għas-seduta ta' smigħ kienu l-istess bħal dawk fil-laqgħat tal-Kunsill Affarijiet Ġenerali tas-26 ta' Ġunju u t-18 ta' Settembru 2018.

Il-ministri kellhom ukoll skambju ta' fehmiet dwar il-proċedura skont l-Artikolu 7(1) TUE dwar ir-rispett għall-valuri tal-UE fl-Ungerija.

Bħala parti minn din il-proċedura, il-Kunsill irċieva mill-Ungerija l-kontribut tagħha bil-miktub dwar il-kwistjonijiet imqajma mill-Parlament. Il-Kummissjoni pprovdiet kontribut fattwali dwar il-proċeduri ta' ksur pendenti kontra l-Ungerija.

• Proposta motivata skont l-Artikolu 7(1) TUE dwar l-Ungerija
• Proposta motivata skont l-Artikolu 7(1) TUE dwar il-Polonja

Il-programm tal-Kunsill għat-18-il xahar li ġejjin

Il-Kunsill approva l-programm ta' ħidma tiegħu għat-18-il xahar li ġejjin, mill-1 ta' Jannar 2019 sat-30 ta' Ġunju 2020. Il-programm tħejja mill-Presidenzi li jmiss tar-Rumanija, il-Finlandja u l-Kroazja u r-Rappreżentant Għoli, President tal-Kunsill Affarijiet Barranin.

Fil-bidu tal-2019 il-prijorità ewlenija ser tkun il-finalizzazzjoni tal-fajls pendenti mill-Aġenda Strateġika attwali u b'mod partikolari dawk elenkati fid-Dikjarazzjoni Konġunta dwar il-prijoritajiet leġislattivi tal-UE għall-2018-19. Meta jibda ċ-ċiklu istituzzjonali l-ġdid, it-tliet presidenzi ser jorganizzaw il-ħidma fil-Kunsill skont il-prijoritajiet tal-Aġenda Strateġika li jmiss, li mistennija tiġi adottata fl-2019, u filwaqt li jittieħed kont tal-eżitu tas-summit ta' Sibiu.

Il-baġit tal-UE għall-2019

Il-Kunsill approva mingħajr diskussjoni l-qbil li ntlaħaq mal-Parlament Ewropew dwar il-baġit tal-UE għall-2019. L-impenji totali huma stabbiliti għal €165.8 biljun, li huwa żieda ta' 3.2 % meta mqabbel mal-2018. Il-pagamenti jammontaw għal €148.2 biljun, 2.4 % aktar mill-2018.

Dan huwa baġit solidu li jagħti spinta lill-appoġġ għall-prijoritajiet tal-UE, jiżgura valur miżjud Ewropew qawwi u jżomm marġini suffiċjenti fil-każ li jinqalgħu ħtiġijiet ġodda s-sena d-dieħla. Dan ser jgħin il-ġestjoni effettiva tal-migrazzjoni, jibbenifika lir-riċerkaturi u ż-żgħażagħ, u jappoġġa t-tkabbir ekonomiku madwar l-Ewropa. Hartwig Löger, ministru għall-finanzi tal-Awstrija u kap negozjatur tal-Kunsill għall-baġit tal-UE għall-2019