Vidjokonferenza informali tal-ministri għall-affarijiet Ewropej, 18 ta' Jannar 2021

Riżultati ewlenin

Programm ta' ħidma tal-presidenza Portugiża

Il-presidenza Portugiża ppreżentat il-prijoritajiet tagħha għas-sitt xhur li jmiss.

Il-Portugall stabbilixxa tliet prijoritajiet ewlenin għall-presidenza tiegħu:

• il-promozzjoni ta' rkupru msaħħaħ mit-tranżizzjoni klimatika u dik diġitali;
• l-implimentazzjoni tal-pilastru Ewropew tad-drittijiet soċjali bħala element ewlieni biex tiġi żgurata tranżizzjoni klimatika u diġitali ġusta u inklużiva;
• it-tisħiħ tal-awtonomija strateġika tal-Ewropa filwaqt li tibqa' miftuħa għad-dinja.

"Wasal żmien l-azzjoni: irkupru ġust, ekoloġiku u diġitali" huwa l-motto tagħna għas-semestru li jmiss. Wasal iż-żmien li ngħaddu mill-ftehim għall-azzjoni u ndaħħlu fis-seħħ l-istrumenti l-ġodda bħall-Pjanijiet Nazzjonali għall-Irkupru u r-Reżiljenza. Il-fokus tagħna huwa li niksbu rkupru ekonomiku sostenibbli u soċjalment inklużiv, li għandu jitmexxa mit-tranżizzjonijiet ekoloġiċi u diġitali. Ana Paula Zacarias, Segretarju tal-Istat għall-Affarijiet Ewropej tal-Portugall

Konferenza dwar il-Ġejjieni tal-Ewropa

Il-ministri tal-UE ħadu kont tal-istat tad-diskussjonijiet interistituzzjonali dwar il-Konferenza dwar il-Ġejjieni tal-Ewropa.

L-istati membri jixtiequ li l-Konferenza dwar il-Ġejjieni tal-Ewropa tinvolvi liċ-ċittadini f'dibattitu wiesa' dwar il-ġejjieni tal-Ewropa fl-għaxar snin li ġejjin u lil hinn, inkluż fid-dawl tal-pandemija tal-COVID-19.

Qed naħdmu biex il-Konferenza dwar il-Ġejjieni tal-Ewropa titwettaq. Irridu proċess inklużiv, b'involviment qawwi miċ-ċittadini. Ser inkomplu n-negozjati interistituzzjonali sabiex naqblu dwar Dikjarazzjoni Konġunta. Aħna nibqgħu impenjati b'mod sħiħ li nniedu l-Konferenza matul il-presidenza tagħna. Ana Paula Zacarias, Segretarju tal-Istat għall-Affarijiet Ewropej tal-Portugall

Koordinazzjoni b'rabta mal-COVID-19

Il-ministri ħejjew il-vidjokonferenza tal-mexxejja dwar il-koordinazzjoni b'rabta mal-COVID-19 li għandha ssir fil-21 ta' Jannar. Id-diskussjonijiet iffukaw, fost kwistjonijiet oħra, fuq l-organizzazzjoni tad-distribuzzjoni tal-vaċċin, tliet ġimgħat wara l-bidu tal-programm ta' tilqim.

Qed naħdmu fuq modi biex insaħħu l-koordinazzjoni, inżidu t-trasparenza dwar il-kunsinni tal-vaċċin u nappoġġjaw il-pjanijiet ta' tilqim, niskambjaw l-aħjar prattiki dwar l-ittestjar u nkomplu nuru solidarjetà ta' tmexxija internazzjonali mal-ġirien tagħna. Jeħtieġ li nkomplu nippromwovu l-isforzi kollettivi tagħna biex iċ-ċittadini tagħna jkunu sikuri. Ana Paula Zacarias, Segretarju tal-Istat għall-Affarijiet Ewropej tal-Portugall