Assemblea Ġenerali tan-NU, New York, 27/09/2018, 27 ta' Settembru 2018

Riżultati ewlenin

Il-President Donald Tusk indirizza lill-mexxejja dinjija f'isem l-UE fl-Assemblea Ġenerali tan-NU (AĠNU) fis-27 ta' Settembru 2018.

• Diskors mill-President Donald Tusk lit-73 Assemblea Ġenerali tan-Nazzjonijiet Uniti, 27 ta' Settembru 2018

Fid-diskors tiegħu lill-assemblea, hu appella għad-difiża tal-ordni internazzjonali bbażat fuq ir-regoli:

"L-Unjoni Ewropea qed tiġġieled b'mod intensiv biex tippreserva l-ordni internazzjonali bbażat fuq ir-regoli, li bħalissa jinsab taħt pressjoni kbira, fir-rigward tal-kummerċ, is-sigurtà, it-tibdil fil-klima jew id-drittijiet tal-bniedem." Il-President Tusk fit-73 Assemblea Ġenerali tan-NU

Donald Tusk saħaq li l-UE tappoġġa bis-sħiħ l-isforz attwali għal riforma tan-NU. Hu qal li "l-urġenza hija ċara u l-implimentazzjoni hija essenzjali".

Il-President Tusk iffoka wkoll fuq il-migrazzjoni. Huwa fakkar fl-isforzi tal-UE biex tappoġġa lill-migranti fil-Libja f'kooperazzjoni man-NU u l-Unjoni Afrikana:

"Sal-lum assistejna lil aktar minn 30,000 ruħ sabiex jitilqu mil-Libja permezz ta' ritorn umanitarju volontarju. Irridu nespandu l-ħidma mal-imsieħba tagħna f'oqsma oħra. Għaldaqstant, l-edukazzjoni, l-investiment fl-iżvilupp, it-tibdil fil-klima u l-kummerċ ħieles ser ikunu fiċ-ċentru tar-relazzjonijiet futuri tagħna." Il-President Tusk fit-73 Assemblea Ġenerali tan-NU

Rigward is-sitwazzjoni fis-Sirja, il-President Tusk qal li l-memorandum ta' qbil dwar Idlib jeħtieġ li jiġi implimentat b'mod sħiħ biex jgħin tiġi evitata katastrofi umanitarja.

Donald Tusk tenna mill-ġdid li l-UE tappoġġa l-ftehim nukleari mal-Iran:

"Il-ftehim huwa tajjeb għas-sigurtà Ewropea, reġjonali u globali. Huwa minħabba f'hekk li l-Unjoni Ewropea hija impenjata li żżomm dan il-ftehim, sakemm l-Iran jibqa' impenjat bis-sħiħ lejh." Il-President Tusk fit-73 Assemblea Ġenerali tan-NU

Il-President Tusk enfasizza wkoll l-impenn tal-UE li timplimenta l-Ftehim ta' Pariġi. Hu appella lill-mexxejja kollha biex jissalvagwardaw l-Antartiku:

"Ippermettuli ngħidha b'mod ċar u tond: dawk li jimmaġinaw il-pjaneta tagħna mingħajr baleni, pingwini u speċi oħra ser ikollhom jimmaġinaw ukoll il-pjaneta tagħna mingħajr bnedmin." Il-President Tusk fit-73 Assemblea Ġenerali tan-NU

Operazzjonijiet għaż-żamma tal-paċi tan-NU

Fil-25 ta' Settembru il-President Tusk attenda avveniment dwar l-inizjattiva ta' azzjoni tan-NU għaż-żamma tal-paċi. Huwa saħaq fuq il-ħtieġa li jissaħħu l-operazzjonijiet tan-NU għaż-żamma tal-paċi:

"L-isforzi tan-NU għaż-żamma tal-paċi għandhom isiru ferm aktar effettivi u effiċjenti sabiex jindirizzaw konflitti u kriżijiet ġodda li jseħħu kuljum madwar id-dinja. L-Unjoni tixtieq tara enfasi akbar fuq soluzzjonijiet politiċi, il-prevenzjoni u approċċ integrat għall-interventi. Jeħtieġ ukoll li nħabirku aktar biex inżommu l-forzi taż-żamma tal-paċi fis-sigurtà" Il-President Donald Tusk waqt l-avveniment ta' livell għoli dwar l-azzjoni tan-NU għaż-żamma tal-paċi

• Kummenti mill-President Donald Tusk waqt l-avveniment ta' livell għoli dwar l-azzjoni tan-NU għaż-żamma tal-paċi, 25 ta' Settembru 2018

Laqgħat bilaterali

Fil-marġni tal-AĠNU, il-President Tusk iltaqa' ma' mexxejja mill-Ewropa, l-Afrika u l-Amerka t'Isfel. Hu kellu laqgħat bilaterali ma':

• Il-President tal-Eġittu Abdel Fattah al-Sisi
• Il-President tal-Ukrajna Petro Poroshenko
• Il-President tal-Kosovo Hashim Thaçi
• Il-President tal-Peru Martín Vizcarra
• Il-President taċ-Ċilì Sebastián Piñera

Prijoritajiet tal-UE għall-Assemblea Ġenerali tan-NU

Il-Kunsill adotta l-prijoritajiet tal-UE għan-NU u t-73 AĠNU f'Ġunju 2018. L-UE ser tiffoka fuq:

• impenn biex tingħata spinta lill-multilateraliżmu u tiġi appoġġata n-NU
• it-trawwim tal-paċi u l-investiment fil-prevenzjoni tal-konflitti
• il-ħarsien tad-drittijiet tal-bniedem
• il-promozzjoni tad-diżarm nukleari u n-nonproliferazzjoni
• l-indirizzar ta' kwistjonijiet marbutin mal-migranti u r-refuġjati, il-ġlieda kontra t-terroriżmu, u l-ambjent

• Prijoritajiet tal-UE fin-Nazzjonijiet Uniti u t-73 Assemblea Ġenerali tan-Nazzjonijiet Uniti (Settembru 2018 – Settembru 2019)

Qabel l-AĠNU, il-Kunsill approva l-prijoritajiet tas-sħubija strateġikaNU-UE dwar operazzjonijiet ta' paċi u ġestjoni tal-kriżijiet għall-2019-2021. Il-Kunsill irrikonoxxa l-kooperazzjoni li ilha għaddejja f'dawn l-oqsma bejn in-NU u l-UE. Tenna wkoll l-impenn sħiħ tal-UE għal NU b'saħħitha bħala s-sinsla tal-multilateraliżmu.

• Multilateraliżmu: il-Kunsill japprova l-prijoritajiet tas-Sħubija Strateġika NU-UE dwar operazzjonijiet ta' paċi u ġestjoni tal-kriżijiet għall-2019-2021 (stqarrija għall-istampa, 18/09/2018)

Ara wkoll

• Assemblea Ġenerali tan-NU, New York, 18-20/09/2017
• L-UE fl-Assemblea Ġenerali tan-NU (informazzjoni ġenerali)
• Relazzjonijiet tal-UE man-Nazzjonijiet Uniti (SEAE)
• Delegazzjoni tal-UE għan-NU fi New York
• Assemblea Ġenerali tan-NU
• Il-missjoni tan-NU fi Brussell