Kunsill Trasport, Telekomunikazzjoni u Enerġija, 26/05/2016, 26 ta' Mejju 2016

Riżultati ewlenin - Telekomunikazzjoni

Il-Kunsill adotta approċċ ġenerali dwar proposta sabiex tiġi allokata l-banda tal-frekwenza 700 Mhz għall-broadband bla wajers. In-negozjati mal-Parlament Ewropew mistennija jibdew fil-ħarifa. L-abbozz ta' deċiżjoni għandu l-għan li jnaqqas il-qasma diġitali u jippermetti l-użu effettiv ta' servizzi innovattivi. Fl-istess waqt, jippreserva l-kontinwità tas-servizzi konvenzjonali tat-televiżjoni.

• Twessigħ tal-banda 700 MHz għal apparati mobbli: il-Kunsill jaqbel dwar il-pożizzjoni tiegħu

Illum għamilna progress sabiex intejbu l-konnettività fl-UE. Mingħajr il-konnettività m'hemmx suq diġitali uniku fejn jistgħu jinteraġixxu l-konsumaturi u l-kumpaniji. Qbilna li nestendu l-ispettru disponibbli għall-broadband mobbli. Ipprovdejna wkoll gwida dwar l-immodernizzar tar-regoli dwar it-telekomunikazzjoni. Ser ikun jeħtieġ li dawn ir-regoli jipprovdu l-inċentivi adatti biex jinkoraġġixxu kemm l-investiment fin-netwerks kif ukoll il-kompetizzjoni għas-servizzi pprovduti fuq dawk in-netwerks". Henk Kamp, il-Ministru għall-Affarijiet Ekonomiċi Netherlandiż u l-president tal-laqgħa

Il-ministri kellhom ukoll dibattitu ta’ orjentazzjoni dwar kwistjonijiet ewlenin tar-reviżjoni li jmiss tar-regoli tal-UE dwar it-telekomunikazzjoni. L-għan tad-dibattitu kien li jipprovdi kontribut għall-proposti leġislattivi li għandhom jitħejjew mill-Kummissjoni fl-2016 taħt l-istrateġija għal suq uniku diġitali.

Fid-dibattitu, il-ministri qablu li r-regoli attwali dwar l-aċċess tal-operaturi għan-netwerks għandhom jiġu riveduti sabiex iżidu l-investiment u jissalvagwardaw il-kompetizzjoni madwar l-UE u biex jiġu stabbiliti regoli adatti għaż-żoni kollha fl-UE. Huma enfasizzaw li huwa importanti għall-istati membri li jkunu jistgħu jadattaw il-ġestjoni tal-ispettru għaċ-ċirkostanzi nazzjonali, filwaqt li jirrikonoxxu l-ħtieġa li jkomplu jikkooperaw u jikkondividu l-aħjar prattiki. Fir-rigward tal-ħtieġa potenzjali li jiġu rregolati s-servizzi tal-komunikazzjoni over-the-top, il-ministri appellaw għal approċċ skont il-każ u qiesu li l-aħjar mod kif għandha tiġi trattata l-protezzjoni tal-konsumatur hija f'leġislazzjoni orizzontali.

Il-presidenza rrappurtat lura rigward l-approvazzjoni tal-qbil dwar l-ewwel regoli madwar l-UE rigward l-aċċessibilità tas-siti web u l-apps mobbli. Il-qbil informali ġie kkonfermat mill-ambaxxaturi tal-istati membri fil-25 ta' Mejju. Il-presidenza infurmat ukoll lill-ministri rigward l-abbozz ta' direttiva dwar is-sigurtà tan-netwerks u tal-informazzjoni, li dwarha l-Kunsill adotta l-pożizzjoni tiegħu fl-ewwel qari fis-17 ta' Mejju. Ladarba jkun ikkonfermat mill-PE, iż-żewġ settijiet ta' regoli (aċċessibilità u sigurtà) jistgħu jidħlu fis-seħħ fit-tieni nofs tas-sena.

Barra minn hekk, il-Kummissjoni aġġornat lill-ministri dwar l-aħħar żviluppi rigward il-governanza tal-Internet u enfasizzat l-impenn tagħha li tkompli tirrapreżenta l-interess tal-UE u tal-istati membri tagħha.

Fl-aħħarnett, il-presidenza Slovakka li jmiss ippreżentat il-programm ta' ħidma tagħha dwar it-telekomunikazzjoni.

• Suq uniku diġitali għall-Ewropa