Kunsill Trasport, Telekomunikazzjoni u Enerġija, 01-05/12/2016, 1-5 ta' Diċembru 2016

Riżultati ewlenin

Trasport - 1 ta’ Diċembru

Il-Kunsill qabel dwar il-pożizzjoni tiegħu rigward ir-reviżjoni tar-regoli ta’ sikurezza għall-avjazzjoni ċivili. L-abbozz ta’ regolament fih mandat ġdid għall-Aġenzija tal-Unjoni Ewropea għas-Sikurezza tal-Avjazzjoni. Huwa jinkludi wkoll l-ewwel regoli għall-UE kollha dwar l-inġenji tal-ajru ċivili mingħajr bdot abbord, sabiex l-istess inġenji tal-ajru jkunu jistgħu jittajru b’mod sikur fl-ispazju tal-ajru Ewropew u biex tingħata spinta lil din l-industrija li qed tikber b’rata mgħaġġla.

• Sikurezza tal-avjazzjoni, l-EASA u r-regoli dwar id-drones: Il-Kunsill jadotta l-pożizzjoni tiegħu

Il-Kunsill adotta wkoll il-pożizzjoni tiegħu dwar żewġ proposti li huma parti minn rieżami tas-sikurezza tal-vapuri tal-passiġġieri: direttiva 'ġenerali' riveduta dwar ir-regoli ta' sikurezza għall-vapuri tal-passiġġieri u sistema ta' spezzjoni simplifikata għall-vapuri ro-ro u vapuri tal-passiġġieri ta’ veloċità għolja.

• Sikurezza tal-vapuri tal-passiġġieri: il-pożizzjoni tal-Kunsill dwar żewġ settijiet ta' regoli

Barra minn hekk, il-ministri evalwaw il-progress li sar fir-regoli riveduti tar-reġistrazzjoni ta’ vapur tal-passiġġieri, li hija t-tielet proposta li qed tiġi rieżaminata.

“Iċ-ċittadini jridu jivvjaġġaw b'mod sikur. Li noffru l-ogħla standards ta’ sikurezza għall-mezzi kollha tat-trasport għandha tkun l-akbar prijorità tagħna. Dan kien is-suġġett prinċipali tad-diskussjonijiet kollha tagħna tal-lum, kemm fir-rigward tal-avjazzjoni kif ukoll tat-tbaħħir. Ninsab kuntent bl-azzjoni rapida tal-Kunsill dwar ir-regoli ta' sikurezza għall-avjazzjoni ċivili u r-regoli ta' sikurezza għall-vapuri tal-passiġġieri. Dan huwa l-mod kif il-Kunsill jaħdem għall-benefiċċju taċ-ċittadini u jikseb riżultati tanġibbli.”

Arpád Érsek, il-Ministru Slovakk għat-Trasport, il-Kostruzzjoni u l-Iżvilupp Reġjonali u President tal-Kunsill

Il-Kunsill adotta wkoll, mingħajr diskussjoni, mandat li bih il-Kummissjoni ser tkun tista' tibda taħditiet mal-Armenja dwar ftehim komprensiv dwar it-trasport bl-ajru. Il-ftehim ser itejjeb il-konnettività abbażi ta' regoli komuni, li fl-aħħar mill-aħħar jimmiraw lejn l-implimentazzjoni sħiħa tal-acquis tal-UE dwar l-avjazzjoni f'dan il-pajjiż ġar tagħna.

• Ftehim mal-Armenja dwar it-trasport bl-ajru: il-Kunsill jadotta l-mandat

Telekomunikazzjoni - 2 ta' Diċembru

Il-Kunsill adotta approċċ ġenerali dwar regoli ġodda għal swieq tar-roaming bl-ingrossa fl-UE. Dan huwa pass importanti fit-tħejjija tat-tneħħija tat-tariffi tar-roaming għall-konsumaturi fil-15 ta’ Ġunju 2017 kif miftiehem. L-approċċ ġenerali huwa l-punt ta' tluq għan-negozjati mal-Parlament Ewropew.

"Min ma jixtieqx jibqa’ konness u jikkomunika meta jivvjaġġa jew ikun fuq btala? F'għajnejn ħafna nies, it-tneħħija tat-tariffi tar-roaming hija waħda mill-aktar kisbiet konkreti tal-Unjoni. Għalhekk huwa ferm importanti li nilħqu l-aspettattivi taċ-ċittadini tagħna. Nilqa’ d-deċiżjoni rapida tal-lum mill-Kunsill li jaqbel dwar limiti tar-roaming bl-ingrossa biex ikunu jistgħu jsiru negozjati mal-Parlament Ewropew u r-'roam-like-at-home' issir realtà sa mis-sena d-dieħla."

Arpád Érsek, Ministru Slovakk għat-Trasport, il-Kostruzzjoni u l-Iżvilupp Reġjonali

• Roaming bl-ingrossa: Il-Kunsill lest għal taħditiet mal-PE

Il-Kunsill adotta approċċ ġenerali parzjali dwar proposta li skontha l-UE ser tiffinanzja l-installazzjoni ta’ konnessjonijiet tal-internet WiFi4EU b’xejn fil-komunitajiet lokali.

• Free WiFi4EU internet connection - Council agrees its position

Il-ministri kellhom dibattitu ta’ orjentazzjoni dwar proposti reċenti dwar ir-riforma tar-regoli tat-telekomunikazzjoni tal-UE. Huma esprimew l-appoġġ tagħhom għall-objettivi tal-konnettività fil-proposti u qablu dwar il-ħtieġa li jaħdmu flimkien biex jiksbuhom, inkluż il-5G. Fl-istess ħin, huma enfasizzaw il-ħtieġa li tiġi rrispettata s-sussidjarjetà u li jirregolaw biss fejn huwa meħtieġ. Il-messaġġi mid-dibattitu ser jidderieġu l-ħidma futura fil-livell tekniku.

Il-ministri ħadu nota tal-progress li sar fil-proposta biex jiżdiedu s-sorveljanza regolatorja u t-trasparenza tal-prezzijiet għal servizzi ta' konsenja tal-pakketti transfruntiera.

Waqt l-ikla ta’ nofsinhar, il-ministri taw gwida lill-Kummissjoni għal ħidma futura fuq il-fluss liberu tad-data. Id-diskussjoni indirizzat kwistjonijiet bħal-lokalizzazzjoni tad-data u ostakli oħra għall-fluss liberu tad-data, l-ostakli prinċipali għall-innovazzjoni u t-tkabbir tal-ekonomija tad-data fil-futur, u l-kontroll tad-data mill-utent.

“Il-presidenza tagħna wriet li tista’ tkun avukat determinat ta’ suq uniku diġitali sod, ekwu u kompetittiv. Qgħadna attenti b'mod partikolari biex neliminaw l-ostakli fil-kummerċ elettroniku permezz tal-imblukkar ġeografiku, biex niffaċilitaw l-użu ta’ servizzi elettroniċi fl-amministrazzjoni pubblika u d-disponibbiltà ta’ kontenut diġitali, u qgħadna attenti wkoll għall-importanza tal-protezzjoni tal-konsumatur u ċ-ċibersigurtà. Illum, irrappurtajt lill-Kunsill dwar il-progress sinifikanti li sar.”

Peter Pellegrini, Viċi Prim Ministru Slovakk għall-Investimenti u s-Soċjetà tal-Informazzjoni

Enerġija - 5 ta' Diċembru

Il-Kunsill kellu dibattitu ta' orjentazzjoni dwar il-proposta għal regolament dwar miżuri għas-salvagwardja tas-sigurtà tal-provvista tal-gass.

L-għan tar-regolament huwa li joħloq qafas reġjonali kosteffettiv tal-UE li jnaqqas kemm jista' jkun l-impatt ta’ interruzzjoni potenzjali fil-provvista tal-gass u b’hekk iżid is-sigurtà tal-provvista fl-UE kollha. Kooperazzjoni u koordinazzjoni reġjonali msaħħa huma għodod importanti biex ikun hemm aktar solidarjetà u fiduċja bejn l-istati membri u biex jissaħħaħ is-suq intern tal-enerġija.

Intlaħaq kompromess dwar il-kwistjonijiet prinċipali: il-kooperazzjoni reġjonali, l-iskambju ta’ informazzjoni dwar kuntratti kummerċjali dwar il-provvista tal-gass, u s-solidarjetà

• kooperazzjoni reġjonali: ibbażata fuq gruppi ta' stati membri identifikati skont ir-riskji prinċipali għall-provvista tal-gass tal-UE
• skambju ta' informazzjoni: kuntratti fit-tul li jipprovdu 40% jew aktar ta’ konsum annwali tal-gass fl-istat membru kkonċernat għandhom jiġu nnotifikati lill-awtorità kompetenti. Dawn jiġu vvalutati mill-awtorità kompetenti, b'mod partikolari fir-rigward tal-impatt tagħhom fuq is-sigurtà tal-provvisti tal-gass fl-istat membru u r-reġjun
• solidarjetà: is-solidarjetà, flimkien mal-prinċipji ġenerali dwar il-kumpens, għandha tiġi ddefinita fit-test tar-regolament, filwaqt li l-istati membri għandhom ikunu jistgħu jikkunsidraw is-sitwazzjoni nazzjonali speċifika tagħhom u approċċi differenti possibbli biex jikkalkulaw il-kumpens

“Is-sigurtà tal-provvista tal-gass hija kwistjoni kruċjali fejn jeħtieġ li l-pajjiżi jaġixxu skont ir-rikonoxximent tal-fatt li għandna interess komuni. Id-dibattitu tal-lum kien importanti peress li ta direzzjoni ċara ħafna dwar ir-regolament dwar is-sigurtà tal-provvista fi tliet oqsma prinċipali. Ninsab kuntent li qed tinstab soluzzjoni. Għandna l-għan li nittrasformaw din il-gwida politika mill-aktar fis possibbli u li ningħataw mandat li mbagħad jippermetti lill-Kunsill biex jiftaħ negozjati mal-Parlament.”

Peter Žiga, Ministru għall-Ekonomija u President tal-Kunsill

Il-Kunsill kellu preżentazzjoni mill-Kummissjoni dwar il-“Pakkett tagħha dwar l-Enerġija Nadifa”, fil-qafas tal-implimentazzjoni tal-Istrateġija tal-Unjoni tal-Enerġija. Dan jinkludi leġislazzjoni dwar l-effiċjenza enerġetika, id-disinn tas-suq tal-elettriku, is-sorsi tal-enerġija rinnovabbli u l-governanza tal-enerġija.

Il-Kunsill ħa nota ta' informazzjoni mill-Presidenza dwar is-sitwazzjoni attwali ta’ żewġ fajls leġislattivi importanti li dwarhom il-Kunsill qabel dwar approċċi ġenerali.

• Id-deċiżjoni dwar mekkaniżmu ta' skambju ta' informazzjoni dwar ftehimiet intergovernattivi bejn l-istati membri u pajjiżi terzi: saru żewġ trilogi: fit-8 u fl-24 ta' Novembru. Sar progress sinifikanti u ntlaħaq qbil proviżorju dwar għadd ta’ suġġetti. It-tielet trilogu hu skedat għas-7 ta’ Diċembru.
• ir-regolament dwar it-tikkettar dwar l-effiċjenza enerġetika: saru tliet trilogi taħt il-Presidenza Slovakka f'Lulju, f'Settembru u f'Ottubru 2016. Intlaħaq qbil proviżorju dwar il-biċċa l-kbira ta' kwistjonijiet politiċi mhux ewlenin. Il-Presidenza ppreżentat ukoll proposti ta’ kompromess dwar il-kwistjonijiet ewlenin tar-riklassifikazzjoni u l-bażi ta' data bil-ħsieb tal-possibbiltà li jkun hemm it-tielet trilogu.