Kunsill Trasport, Telekomunikazzjoni u Enerġija, 06-07/06/2016, 6 u 7 ta' Ġunju 2016

Riżultati ewlenin

Enerġija

Din il-proposta hija pass kbir li ser isaħħaħ it-trasparenza u l-konsistenza tar-relazzjonijiet esterni tal-UE fil-qasam tal-enerġija. L-għan huwa li jiġu kkoreġuti n-nuqqasijiet fil-mekkaniżmu attwali għall-iskambju ta’ informazzjoni u noqorbu lejn l-Unjoni tal-Enerġija. Ser ittejjeb aktar il-funzjonament korrett tas-suq intern tal-enerġija u s-sigurtà tal-provvista tal-enerġija fl-Unjoni Ewropea.” Henk Kamp, Ministru għall-Affarijiet Ekonomiċi Netherlandiż u president tal-laqgħa

Il-Kunsill qabel dwar approċċ ġenerali rigward il-proposta għal deċiżjoni li tistabbilixxi mekkaniżmu ta’ skambju ta’ informazzjoni fir-rigward ta’ ftehimiet intergovernattivi (IGA) u ta’ strumenti li ma jorbtux bejn stati membri u pajjiżi terzi fil-qasam tal-enerġija.

L-għan tad-deċiżjoni proposta - wieħed mill-elementi fundamentali tal-Istrateġija għall-Unjoni tal-Enerġija - hu li jitjiebu t-trasparenza u l-konsistenza tar-relazzjonijiet tal-UE fl-enerġija esterna u li tissaħħaħ il-pożizzjoni tagħha fin-negozjar ma’ pajjiżi terzi. Ser tikkontribwixxi wkoll għall-funzjonament korrett tas-suq intern tal-enerġija.

Il-kompromess milħuq kien ibbażat fuq l-elementi li ġejjin:

• il-Kummissjoni ser twettaq valutazzjoni tal-IGAs relatati mal-gass qabel ma dawn jiġu ffirmati,
• l-istati membri għandhom iżommu lill-Kummissjoni aġġornata kemm qabel jinbdew kif ukoll matul in-negozjati ta’ kull IGA,
• l-istati membri jistgħu jitolbu l-valutazzjoni preċedenti għal IGAs oħrajn mhux relatati mal-gass,
• kull IGA mhux relatat mal-gass għandu jiġi notifikat lill-Kummissjoni “mar-ratifika”,
• strumenti li ma jorbtux mhux ser ikollhom jiġu notifikati.

Il-qbil dwar l-approċċ ġenerali ser jippermetti lill-Kunsill jiftaħ negozjati mal-Parlament Ewropew bil-ħsieb tal-adozzjoni finali tal-proposta.

Il-Kunsill iddiskuta l-proposta għal regolament rivedut dwar miżuri li jiggarantixxu s-sigurtà tal-provvista tal-gass.

L-għan prinċipali tal-proposta hu li jiġi minimizzat l-impatt ta’ interruzzjoni potenzjali fil-provvista tal-gass billi titjieb il-kooperazzjoni bejn l-istati membri u billi nibbażaw fuq il-kisbiet tas-suq intern tal-enerġija. Għandha l-għan ukoll li żżid il-fiduċja u s-solidarjetà fil-livell reġjonali u dak tal-UE.

Id-dibattitu ffoka fuq il-kwistjonijiet li ġejjin:

• Titjib fil-kooperazzjoni u l-koordinament reġjonali,
• Prinċipju ġdid ta’ solidarjetà li ser ikollu applikazzjoni mandatorja f’każijiet ta’ kriżi estrema,
• Rekwiżiti ta’ trasparenza, b’mod partikolari fir-rigward ta’ kuntratti kummerċjali fit-tul li jikkonċernaw il-gass.

Trasport

Il-Kunsill adotta mandati li ser jippermettu lill-Kummissjoni tiftaħ negozjati dwar ftehimiet komprensivi għat-trasport bl-ajru ma’ erba’ sħab ewlenin: l-Assoċjazzjoni tan-Nazzjonijiet tax-Xlokk tal-Asja (ASEAN), l-Emirati Għarab Magħquda, il-Qatar u t-Turkija. Ladarba jiġu konklużi, dawn il-ftehimiet ser jieħdu post il-ftehimiet bilaterali dwar l-avjazzjoni li l-istati membri għandhom bħalissa ma’ dawn il-pajjiżi.

Illum ħadna passi importanti biex nagħtu spinta lis-saħħa kompetittiva u s-sostenibbiltà tas-settur tat-trasport Ewropew. Il-Kunsill qabel dwar regoli ġodda għan-navigazzjoni interna, adotta erba’ mandati ġodda dwar l-avjazzjoni u ddiskuta approċċ komuni biex jiġu indirizzati l-emissjonijiet mill-karozzi li jaħdmu bid-diżil.” Melanie Schultz van Haegen, Ministru għall-Infrastruttura u l-Ambjent Netherlandiża u president tal-laqgħa tal-Kunsill

Il-Kunsill qabel ukoll dwar approċċ ġenerali għar-regoli ġodda li jikkonċernaw ir-rikonoxximent ta'kwalifiki professjonali fin-navigazzjoni interna. L-abbozz ta’ direttiva jistabbilixxi sistema uniformi ta’ ċertifikazzjoni madwar l-UE għall-ekwipaġġ kollu, mill-apprendisti sal-kaptani tal-bastimenti. Ser joħloq prospetti aħjar tal-karriera u jippromwovi l-mobbiltà fl-impjiegi minn naħa għal oħra tal-fruntieri.

Il-ministri kellhom dibattitu ta’ orjentazzjoni dwar l-emissjonijiet ta’ ossidu tan-nitroġenu (NOx) mill-karozzi li jaħdmu bid-diżil. Il-ministri kienu tal-fehma li għandhom isiru sforzi biex jiċċaraw l-applikazzjoni tal-leġislazzjoni eżistenti dwar apparati ta’ manipulazzjoni sabiex jitnaqqsu l-emissjonijiet ta’ NOx mill-vetturi. Flimkien ma’ dan, bħalissa qed jiġu riveduti r-regoli rilevanti għall-approvazzjoni tat-tip u ninsabu qrib l-introduzzjoni ta’ testijiet obbligatorji għall-“emissjonijiet f’sewqan reali”.

Barra minn hekk, il-ministri ddiskutew il-kontribut tal-UE għat-taħditiet li għaddejjin fl-ICAO dwar miżura bbażata fuq is-suq globali biex jonqsu l-emissjonijiet ta' CO2 mill-avjazzjoni internazzjonali, bi tħejjija għall-Assemblea tal-ICAO li jmiss. Il-Kunsill ħa nota wkoll tal-progress li sar fuq proposta għal reviżjoni tal-qafas regolatorju attwali dwar is-sikurezza tal-avjazzjoni, li tinkludi l-ewwel regoli li qatt saru għall-UE dwar l-użu ta’ droni u dispożizzjonijiet ġodda importanti dwar kwistjonijiet ta’ sigurtà marbuta mas-sikurezza.