Kunsill Trasport, Telekomunikazzjoni u Enerġija (Telekomunikazzjoni), 21 ta' Mejju 2024

Riżultati ewlenin

Il-ministri kellhom dibattitu ta' orjentazzjoni dwar approċċ kollaborattiv għall-implimentazzjoni koerenti tal-leġiżlazzjoni adottata reċentement fil-qasam diġitali u dak ċibernetiku. Il-Kunsill approva żewġ settijiet ta' konklużjonijiet dwar il-futur tal-politika diġitali tal-UE u l-futur taċ-ċibersigurtà. Waqt ikla informali, il-ministri kellhom skambju ta' fehmiet dwar kif jistgħu jiġu promossi l-ħiliet diġitali u trasformazzjoni diġitali inklużiva.

Illum kien fil-fatt – mingħajr esaġerazzjoni – jum storiku. Adottajna l-att dwar l-intelliġenza artifiċjali, l-ewwel liġi ta' dan it-tip fid-dinja li tiżgura intelliġenza artifiċjali ċċentrata fuq il-bniedem, innovattiva u sikura għaċ-ċittadini u n-negozji tagħna. Iżda x-xogħol ma jieqafx hemm. Kellna skambju ta' fehmiet dwar kif l-aħjar jiġu implimentati l-liġijiet adottati reċentement fil-qasam diġitali u dak ċibernetiku u approvajna konklużjonijiet dwar il-futur tal-politika diġitali tal-UE u ċ-ċibersigurtà li jidentifikaw il-prijoritajiet ewlenin għaċ-ċiklu leġiżlattiv li jmiss.

Petra De Sutter, viċi prim ministru u ministru għat-telekomunikazzjoni tal-Belġju 

Kellna laqgħa kostruttiva li tħares 'il quddiem. Mhux biss evalwajna l-ħidma leġiżlattiva importanti tagħna fil-qasam diġitali u dak ċibernetiku f'dawn l-aħħar snin, iżda pprovdejna wkoll gwida politika għall-futur. Ejjew naħdmu flimkien biex inlestu t-trasformazzjoni diġitali tal-Ewropa malajr kemm jista' jkun għall-benefiċċju taċ-ċittadini, in-negozji u s-soċjetajiet tagħna b'mod ġenerali.

Mathieu Michel, Segretarju tal-Istat għad-diġitalizzazzjoni tal-Belġju

Approċċ kollaborattiv għall-implimentazzjoni koerenti tal-leġiżlazzjoni

Fuq l-inizjattiva tal-presidenza, il-Kunsill kellu dibattitu ta' orjentazzjoni dwar approċċ kollaborattiv għal implimentazzjoni koerenti tal-leġiżlazzjoni adottata reċentement fil-qasam diġitali u dak ċibernetiku. Il-ministri qablu li l-ġabra tar-regoli diġitali tal-UE għandha rwol importanti fit-trasformazzjoni diġitali tal-Ewropa, it-tisħiħ tas-suq uniku diġitali u l-istabbiliment tar-regoli internazzjonali. Huma kellhom skambju ta' fehmiet dwar kif tiġi żgurata implimentazzjoni effettiva tal-leġiżlazzjonijiet il-ġodda b'enfasi fuq azzjonijiet li jistgħu jistimulaw l-implimentazzjoni u l-infurzar konsistenti u interoperabbli tagħhom, u esploraw miżuri possibbli li jistgħu jikkontribwixxu għall-iżvilupp ulterjuri tal-kooperazzjoni meħtieġa mas-settur privat u partijiet ikkonċernati rilevanti oħra sabiex jissaħħu l-kompetittività u s-sigurtà Ewropea. Il-ministri qablu li l-iżviluppi ġeopolitiċi reċenti għandhom jitqiesu fl-implimentazzjoni tal-ġabra tar-regoli diġitali tal-UE b'enfasi fuq il-modi possibbli biex dan jissarraf fl-ambizzjoni ta' awtonomija strateġika Ewropea li tippreserva l-ekonomija miftuħa.

Konklużjonijiet tal-Kunsill dwar il-futur tal-politika diġitali tal-UE

Il-Kunsill approva konklużjonijiet dwar il-futur tal-politika diġitali tal-UE li jidentifikaw il-prijoritajiet ewlenin għall-politika diġitali tal-UE li l-istati membri jixtiequ li jiġu indirizzati fiċ-ċiklu leġiżlattiv li jmiss. Is-sett ta' konklużjonijiet ikopri suġġetti bħar-regoli u l-governanza diġitali, l-effetti soċjetali tad-diġitalizzazzjoni, it-teknoloġiji diġitali u avvanzati, l-infrastruttura sigura u reżiljenti madwar l-UE, l-istrateġija għad-data, il-ħiliet diġitali, it-tranżizzjoni ekoloġika u diġitali, il-gvern diġitali, u d-dimensjoni internazzjonali tal-politika diġitali tal-UE.

• Konklużjonijiet tal-Kunsill dwar il-futur tal-politika diġitali tal-UE

Konklużjonijiet tal-Kunsill dwar il-futur taċ-ċibersigurtà

Il-Kunsill approva konklużjonijiet dwar il-futur taċ-ċibersigurtà tal-UE li jiffukaw fuq l-implimentazzjoni tal-leġiżlazzjoni dwar iċ-ċibersigurtà adottata reċentement, l-armonizzazzjoni, reviżjoni xierqa tal-qafas għall-iskemi ta' ċertifikazzjoni li jevitaw il-frammentazzjoni fil-leġiżlazzjoni, u l-ħtieġa li tissaħħaħ il-koordinazzjoni hekk kif jiżdied l-għadd ta' strumenti u atturi. Il-ministri qablu li t-triq 'il quddiem għandha tkun ibbażata fuq protezzjoni ċibernetika attiva, li tindirizza d-distakk fil-finanzjament u fil-ħiliet, b'mod partikolari fil-kuntest tal-inizjattiva l-ġdida dwar l-identità diġitali. Huma qablu li ħarsa ġenerali konkreta lejn ir-rwoli u r-responsabbiltajiet tal-entitajiet relatati maċ-ċibersigurtà tkun ta' importanza kruċjali. Il-ministri ssottolinjaw ukoll li tkun meħtieġa politika internazzjonali attiva biex tissaħħaħ il-kooperazzjoni tal-UE ma' pajjiżi terzi.

• Konklużjonijiet tal-Kunsill dwar il-futur taċ-ċibersigurtà: nimplimentaw u nipproteġu flimkien

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN

Affarijiet oħra

Il-Kummissjoni infurmat lill-ministri dwar is-sitwazzjoni attwali ta' diversi inizjattivi internazzjonali li għaddejjin fil-qasam diġitali. Hija aġġornat ukoll lill-ministri dwar il-finalizzazzjoni tan-negozjati tal-konvenzjoni tal-Kunsill tal-Ewropa dwar l-intelliġenza artifiċjali, id-drittijiet tal-bniedem, id-demokrazija u l-istat tad-dritt. 

Il-presidenza ppreżentat rapport dwar il-punti ewlenin li ħarġu mill-konferenza ta' livell għoli dwar il-ħtieġa għal direttiva ġdida dwar is-servizzi postali li saret fil-11 ta' April 2024 fi Brussell u pprovdiet ħarsa ġenerali lejn l-avvenimenti diġitali, tat-telekomunikazzjoni u postali li saru fl-ewwel nofs tal-2024.

Id-delegazzjoni Daniża, Ċeka u dik Pollakka infurmaw lill-Kunsill dwar kif jistgħu jagħtu s-setgħa liċ-ċittadini u lin-negozji fit-trasformazzjoni diġitali permezz ta' użu simplifikat u ambizzjuż tal-kartiera Ewropea tal-identità diġitali.

Fl-aħħar nett, il-presidenza Ungeriża li jmiss ippreżentat il-prijoritajiet u l-programm ta' ħidma tagħha għat-tieni nofs tal-2024.

• Rapport tal-Presidenza: Elementi ewlenin tal-Konferenza ta' livell għoli dwar il-ħtieġa ta' direttiva ġdida dwar is-servizzi postali

Ikla informali ta' nofsinhar 

Waqt ikla informali, il-ministri ddiskutew is-suġġett tal-promozzjoni tal-ħiliet diġitali u trasformazzjoni diġitali inklużiva. Il-ministri kellhom skambju ta' fehmiet dwar kif tista' tiġi żgurata l-affordabbiltà fit-tul tal-internet għaċ-ċittadini kollha. Huma rriflettew ukoll dwar kif l-UE tista' żżid l-isforzi biex tindirizza d-distakk fil-ħiliet diġitali, inkluż id-distakk diġitali bejn il-ġeneri, kif ukoll in-nuqqas ta' speċjalisti tal-ICT, sabiex jitrawwem it-tkabbir ekonomiku inklużiv, tiġi promossa l-koeżjoni soċjali u tiġi żgurata l-kompetittività fl-era diġitali. B'mod partikolari, huma qasmu fehmiet dwar il-passi possibbli biex jiġi implimentat approċċ Ewropew għar-rikonoxximent tal-mikrokredenzjali u ċ-ċertifikazzjoni fis-suq tax-xogħol. Fl-aħħar nett, il-ministri ttrattaw azzjonijiet ewlenin li huma meħtieġa biex jintlaħqu 20 miljun speċjalista tal-ICT fl-UE u konverġenza aħjar bejn il-ġeneri sal-2030.

Adozzjoni ta' punti "A" 

Bħala punti mingħajr diskussjoni, il-Kunsill adotta l-att dwar l-intelliġenza artifiċjali (IA), kif ukoll ir-regolament u d-direttiva tal-UE dwar id-disinn tas-suq tal-elettriku, u l-"pakkett" tal-gass u l-idroġenu.

• Regolament li jistabbilixxi regoli armonizzati dwar l-intelliġenza artifiċjali (att dwar l-intelliġenza artifiċjali)
• Regolament dwar id-disinn tas-suq tal-elettriku tal-Unjoni
• Direttiva dwar id-disinn tas-suq tal-elettriku tal-Unjoni
• Regolament dwar is-swieq interni tal-gassijiet rinnovabbli u naturali u tal-idroġenu
• Direttiva dwar ir-regoli komuni għas-swieq interni tal-gassijiet rinnovabbli u naturali u tal-idroġenu