"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Trasport, Telekomunikazzjoni u Enerġija (Trasport), 18 ta' Ġunju 2024
Riżultati ewlenin
Il-Kunsill qabel dwar il-pożizzjoni ta' negozjar tiegħu (approċċ ġenerali) dwar regolament ġdid dwar l-Aġenzija Ewropea għas-Sigurtà Marittima (EMSA), direttiva riveduta dwar is-servizzi tal-informazzjoni tax-xmajjar (RIS) armonizzati f'passaġġi fuq l-ilma interni u regolament ġdid dwar l-użu tal-kapaċità tal-infrastruttura ferrovjarja fiż-żona ferrovjarja unika Ewropea, bl-aħħar waħda tkun parti mill-pakkett leġiżlattiv dwar l-ekoloġizzazzjoni tat-trasport tal-merkanzija.
Il-ministri approvaw ukoll konklużjonijiet dwar ir-rapport speċjali tal-Qorti Ewropea tal-Awdituri dwar l-isforzi tal-UE għall-ilħuq tal-objettivi tas-sikurezza fit-toroq tal-UE u kellhom dibattitu ta' orjentazzjoni informali dwar il-prijoritajiet strateġiċi fis-settur tat-trasport għall-mandat leġiżlattiv li jmiss.
Barra minn hekk, il-Kunsill ħa nota tar-rapporti ta' progress dwar il-proposti tal-Kummissjoni biex tiġi emendata d-direttiva dwar it-trasport ikkombinat u d-direttiva dwar il-piżijiet u d-dimensjonijiet għal ċerti vetturi tat-triq, it-tnejn li huma parti mill-pakkett dwar l-ekoloġizzazzjoni tat-trasport tal-merkanzija, kif ukoll dwar ir-regolament propost dwar id-drittijiet tal-passiġġieri fil-kuntest tal-vjaġġi multimodali u l-abbozz ta' direttiva dwar l-effett fl-UE kollha ta' ċerti skwalifiki tas-sewqan.
Din kienet laqgħa produttiva: qbilna dwar il-pożizzjoni tagħna dwar dossiers leġiżlattivi ewlenin għas-setturi tat-trasport marittimu, tal-passaġġi fuq l-ilma interni, u tal-ferroviji, approvajna sett ta' konklużjonijiet dwar is-sikurezza fit-toroq u pprovdejna gwida politika dwar prijoritajiet strateġiċi fil-qasam tat-trasport għaċ-ċiklu leġiżlattiv li jmiss. Ninsabu kuntenti li ngħaddu r-responsabbiltà lill-presidenza Ungeriża biex tagħmel aktar progress fuq il-fajls pendenti kollha kemm fil-Kunsill kif ukoll f'taħditiet futuri mal-Parlament il-ġdid.
Georges Gilkinet, Viċi Prim Ministru u Ministru għall-Mobbiltà tal-Belġju
Sikurezza marittima
Il-Kunsill adotta approċċ ġenerali dwar ir-regolament il-ġdid tal-EMSA, li huwa l-uniku fajl pendenti tal-pakkett leġiżlattiv kollu li għandu l-għan li jimmodernizza r-regoli Ewropej dwar is-sikurezza marittima u jnaqqas it-tniġġis tal-baħar mill-vapuri, filwaqt li jgħammar lill-UE b'għodod ġodda biex tappoġġa tbaħħir nadif u modern. Il-pożizzjoni tal-Kunsill tipprovdi qafas solidu u validu għall-futur għall-assistenza tal-Aġenzija lill-istati membri u lill-Kummissjoni b'enfasi fuq il-kompiti ewlenin tal-EMSA, l-implikazzjonijiet baġitarji ta' kompiti ġodda u l-governanza tal-Aġenzija.
Il-Kunsill adotta approċċ ġenerali dwar proposta biex tiġi riveduta d-direttiva tal-2005 dwar sistemi ta' informazzjoni tax-xmajjar (RIS) armonizzati bl-għan li jiżdiedu s-sikurezza, l-effiċjenza u l-ħarsien tal-ambjent tat-trasport fil-passaġġi fuq l-ilma interni (IWT). Peress li l-użu tal-RIS kien bil-mod u frammentat, id-direttiva riveduta għandha l-għan li tindirizza l-problemi identifikati billi tiżgura d-disponibbiltà tad-data tal-RIS u l-istandards armonizzati, tiffaċilita l-integrazzjoni tal-IWT fil-katina multimodali, tiżgura użu u interoperabbiltà akbar ta' soluzzjonijiet diġitali, u tindirizza t-tħassib dwar il-protezzjoni tad-data.
Il-pakkett dwar l-ekoloġizzazzjoni tat-trasport tal-merkanzija
Il-Kunsill adotta approċċ ġenerali dwar ir-regolament rigward l-użu tal-kapaċità tal-infrastruttura ferrovjarja, bħala parti mill-pakkett tal-Kummissjoni dwar l-ekoloġizzazzjoni tat-trasport tal-merkanzija. Il-proposta għandha l-għan li żżid id-disponibbiltà tal-infrastruttura ferrovjarja permezz ta' proċess aħjar ta' ppjanar u allokazzjoni, kif ukoll koordinazzjoni transfruntiera mtejba. Il-pożizzjoni tal-Kunsill tissimplifika fejn possibbli l-proċess ta' ppjanar u allokazzjoni u, konsegwentement, tnaqqas l-ammont ta' xogħol amministrattiv tal-awtoritajiet kompetenti u l-partijiet ikkonċernati operazzjonali involuti. Tqis ukoll l-aspetti tas-sigurtà u d-difiża nazzjonali. Din tagħti biżżejjed flessibbiltà lill-istati membri biex jiddefinixxu l-objettivi ġenerali u l-orjentazzjonijiet ta' politika għall-ġestjoni tal-kapaċità ferrovjarja, filwaqt li tinkludi biżżejjed salvagwardji biex tiġi żgurata l-armonizzazzjoni meħtieġa fil-livell tal-UE.
Il-Kunsill ħa nota wkoll tal-progress miksub s'issa fir-reviżjoni tad-direttiva dwar il-piżijiet u d-dimensjonijiet massimi għall-vetturi heavy-duty u d-direttiva dwar it-trasport ikkombinat, li t-tnejn jiffurmaw parti mill-istess pakkett leġiżlattiv.
Il-Kunsill approva konklużjonijiet dwar ir-rapport speċjali tal-Qorti Ewropea tal-Awdituri dwar il-progress fil-koordinazzjoni tal-politiki dwar is-sikurezza fit-toroq madwar l-Ewropa u fil-kisba tal-objettivi ġenerali tas-sikurezza fit-toroq. Il-ministri ħadu nota wkoll ta' rapport ta' progress dwar l-abbozz ta' direttiva dwar l-effett fl-UE kollha ta' ċerti skwalifiki tas-sewqan, bħala punt mingħajr diskussjoni.
Il-Kunsill ħa nota ta' rapport ta' progress dwar l-abbozz ta' regolament dwar id-drittijiet tal-passiġġieri fil-kuntest tal-vjaġġi multimodali, bħala punt mingħajr diskussjoni.
Il-presidenza infurmat lill-ministri dwar is-sitwazzjoni attwali tal-fajls leġiżlattivi li ġejjin l kienu ġew maqbula b'mod proviżorju mal-Parlament Ewropew fix-xhur preċedenti:
Id-delegazzjoni Spanjola infurmat lill-Kunsill dwar il-ħtieġa għal azzjoni biex tiġi mmonitorjata b'mod adegwat l-estensjoni tas-Sistema tal-UE għall-Iskambju ta' Kwoti tal-Emissjonijiet (ETS) għat-trasport marittimu.
Ferroviji
Id-delegazzjoni Netherlandiża u dik Awstrijaka ppreżentaw ir-raba' rapport ta' progress tal-pjattaforma dwar it-trasport internazzjonali tal-passiġġieri bil-ferrovija (IRP).
Programm ta' ħidma tal-presidenza
Id-delegazzjoni Ungeriża ppreżentat il-prijoritajiet u l-programm ta' ħidma tagħha għat-tieni nofs tal-2024.
Ikla informali
Waqt ikla informali, il-ministri kellhom skambju ta' fehmiet dwar il-prijoritajiet strateġiċi fis-settur tat-trasport għall-mandat leġiżlattiv li jmiss. Is-settur qed jiffaċċa diversi sfidi, bħall-kontribut għall-miri klimatiċi ambizzjużi tal-UE u l-appoġġ għal bidla modali lejn l-aktar modi ta' trasport sostenibbli. Minbarra li jnaqqas l-emissjonijiet tiegħu ta' gassijiet serra, is-settur tat-trasport jeħtieġ ukoll li jsir aktar sikur, aktar ġust u aktar effiċjenti. Minn perspettiva infrastrutturali, il-kisba tan-networks ewlenin u komprensivi tan-network Trans-Ewropew (TEN-T) sal-2030 u l-2050 ser teħtieġ investimenti sinifikanti u, filwaqt li l-Faċilità Nikkollegaw l-Ewropa (FNE) għandha rekord ippruvat,l-appoġġ għat-tranżizzjoni ekoloġika u l-kisba ta' network verament integrat u reżiljenti, ma jistgħux jiġu ffinanzjati mill-baġit tal-UE waħdu.
F'dan il-kuntest, il-ministri qasmu l-fehmiet tagħhom dwar il-prijoritajiet potenzjali tal-politika tat-trasport tal-UE taħt il-mandat tal-Kummissjoni li jmiss (2024-2029) b'enfasi fuq azzjonijiet fil-livell tal-UE li għandhom jingħataw prijorità għad-dekarbonizzazzjoni tat-trasport u l-promozzjoni ta' bidla modali. Fl-aħħar nett, fid-dawl tal-investimenti massivi meħtieġa fil-livell Ewropew, il-ministri esploraw opportunitajiet biex jiżdiedu l-fondi u l-finanzjament disponibbli għall-implimentazzjoni ta' infrastrutturi tat-trasport sostenibbli u reżiljenti.
Il-Kunsill adotta wkoll mingħajr diskussjoni l-punti li jidhru fil-listi ta' punti A leġiżlattivi u mhux leġiżlattivi.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
