Flussi migratorji fir-rotta tal-Lvant tal-Mediterran
L-UE u l-istati membri tagħha ħadu għadd ta' miżuri biex jindirizzaw is-sitwazzjoni tal-migrazzjoni fir-rotta tal-Lvant tal-Mediterran u biex jappoġġaw lir-refuġjati fit-Turkija.
Azzjoni tal-UE biex tindirizza s-sitwazzjoni tal-migrazzjoni fit-Turkija
Ir-rotta tal-Lvant tal-Mediterran tirreferi għal wasliet irregolari fil-Greċja, Ċipru u l-Bulgarija. Għadd kbir ta' refuġjati li kienu qed ifittxu kenn mill-gwerra ċivili fis-Sirja waslu fl-UE permezz ta' din ir-rotta fl-2015.
Minn dakinhar l-għadd ta' wasliet irregolari li jużaw din ir-rotta naqas b'mod konsiderevoli bis-saħħa tal-kooperazzjoni bejn l-UE u t-Turkija. L-implimentazzjoni tad-dikjarazzjoni bejn l-UE u t-Turkija ta' Marzu 2016 qdiet rwol ewlieni fit-tnaqqis tal-wasliet irregolari mit-Turkija.
Dikjarazzjoni tal-UE u t-Turkija
F'Marzu 2016, il-mexxejja tal-UE u tat-Turkija qablu li jindirizzaw il-migrazzjoni irregolari minħabba l-għadd enormi ta' migranti li kienu qed jgħaddu mit-Turkija. Id-dikjarazzjoni stipulat għadd ta' prinċipji. L-UE tibqa' impenjata għall-implimentazzjoni tad-dikjarazzjoni u tkompli tappoġġa lir-refuġjati Sirjani permezz tal-faċilità għar-refuġjati fit-Turkija.
Wara l-implimentazzjoni tad-dikjarazzjoni, il-wasliet mir-rotta tal-Lvant tal-Mediterran naqsu b'mod sinifikanti. Il-ftehim mat-Turkija għen biex jitnaqqas l-għadd ta' ħajjiet mitlufa fuq il-baħar u biex jiġu indirizzati l-faċilitaturi ta' immigrazzjoni illegali.
Miżuri biex jittejbu l-kundizzjonijiet tar-refuġjati fit-Turkija
Ir-refuġjati fit-Turkija jirċievu għajnuna mill-UE biex itejbu l-kundizzjonijiet tal-għajxien tagħhom. Il-faċilità tal-UE għar-refuġjati fit-Turkija, li timmaniġġja total ta' €6 biljun f'finanzjament, tipprovdi mekkaniżmu ta' koordinazzjoni konġunta li għandu l-għan li jiżgura li l-ħtiġijiet tar-refuġjati u l-komunitajiet ospitanti fit-Turkija jiġu indirizzati b'mod komprensiv.
Il-Kummissjoni Ewropea ħolqot il-faċilità fl-24 ta' Novembru 2015 wara sejħa mill-istati membri għal aktar finanzjament f'appoġġ għar-refuġjati fit-Turkija.
Fid-29 ta' Novembru 2015, il-Kunsill Ewropew impenja l-ewwel porzjon ta' €3 biljun lill-faċilità. F'Marzu 2018, il-Kummissjoni pproponiet li l-finanzjament tal-faċilità jiġi estiż bi €3 biljun addizzjonali peress li l-baġit inizjali ntuża kompletament. F'Ġunju 2018, l-istati membri tal-UE qablu li jiffinanzjaw €3 biljun addizzjonali biex jappoġġaw ir-refuġjati Sirjani fit-Turkija.
- Faċilità għar-refuġjati fit-Turkija: l-istati membri jaqblu dwar id-dettalji ta' finanzjament addizzjonali (stqarrija għall-istampa, 29 ta' Ġunju 2018)
- Il-faċilità tal-UE għar-refuġjati fit-Turkija (skeda informattiva, Kummissjoni Ewropea)
L-ewwel porzjon iffinanzja proġetti li baqgħu għaddejjin sa nofs l-2021. It-tieni porzjon qed jiffinanzja proġetti li ser jibqgħu għaddejjin sa nofs l-2025. L-enfasi ewlenija hija fuq l-assistenza umanitarja, l-edukazzjoni, is-saħħa, l-iżvilupp soċjoekonomiku, l-infrastruttura muniċipali, l-appoġġ soċjoekonomiku u l-ġestjoni tal-migrazzjoni.
Ir-refuġjati fit-Turkija raw titjib fil-kundizzjonijiet tal-għajxien tagħhom bis-saħħa tal-proġetti ffinanzjati mill-faċilità:
- ġew implimentati 65 proġett li għandhom l-għan li jkopru r-rispons għall-ħtiġijiet bażiċi, il-protezzjoni, l-edukazzjoni, u s-saħħa għar-refuġjati l-aktar vulnerabbli fit-Turkija
- 701 000 tifel u tifla refuġjati appoġġati biex imorru l-iskola
- aċċess indaqs għall-kura tas-saħħa b'xejn lil 4 miljun refuġjat
- aktar minn 2.6 miljun refuġjat irċevew appoġġ għall-ħtiġijiet bażiċi ta' kuljum tagħhom
Wara l-konklużjonijiet tal-Kunsill Ewropew ta' Ġunju 2021 u apparti l-qafas tal-Faċilità, il-Kummissjoni mobilizzat €3 biljun għar-refuġjati u l-komunitajiet ospitanti fit-Turkija għall-perjodu 2021-2023. Dan il-finanzjament għandu l-għan li jkompli l-appoġġ fl-oqsma ta' prijorità tal-ħtiġijiet bażiċi u l-edukazzjoni, il-ġestjoni tal-migrazzjoni u l-kontroll tal-fruntieri kif ukoll fl-appoġġ umanitarju.