Regoli uniformi dwar l-applikazzjonijiet għall-ażil

Fatti u ċifri dwar l-applikazzjonijiet għall-ażil fl-UE

Is-sistema Ewropea komuni tal-ażil tistabbilixxi standards minimi komuni għat-trattament tal-persuni li jfittxu l-ażil. Fil-prattika, il-persuni li jfittxu l-ażil mhumiex trattati b'mod uniformi, u r-rati ta' rikonoxximent ivarjaw minn stat membru għal ieħor.

B'riżultat ta' dan, ħafna persuni li jfittxu l-ażil jiċċaqilqu fl-UE biex ifittxu l-aħjar pajjiż fejn japplikaw għall-ażil. Dan il-fenomenu huwa magħruf bħala "shopping għal ażil".

Fl-2023, 1 129 795 ċittadin mhux tal-UE applikaw għall-ażil fl-UE. Dawn iċ-ċifri jinkludu kemm applikanti għall-ażil għall-ewwel darba kif ukoll applikazzjonijiet sussegwenti. L-infografika turi wkoll:

• ix-xejriet fl-għadd ta' persuni li jfittxu l-ażil fl-UE 
• il-pajjiżi ta' oriġini tal-applikanti għall-ażil
• l-għadd ta' applikazzjonijiet f'kull pajjiż tal-UE

Regoli riveduti tal-UE biex l-applikanti għall-ażil jiġu ttrattati b'mod ġust

Il-leġiżlazzjoni għandha l-għan li tiżgura li l-applikanti kollha għall-ażil jiġu ttrattati bl-istess mod fl-istati membri kollha. Ir-regoli riveduti jiddefinixxu: 

kriterji komuni għall-identifikazzjoni ta' persuni li huma ġenwinament fil-bżonn ta' protezzjoni internazzjonali

drittijiet komuni għal dawk il-persuni fl-istati membri kollha

Ħidma fuq il-patt dwar il-migrazzjoni u l-ażil

F'Lulju 2017, l-ambaxxaturi għall-UE qablu dwar mandat għal negozjati dwar l-abbozz ta' regoli għall-kwalifika tal-applikanti għall-ażil u d-drittijiet u l-benefiċċji armonizzati għall-benefiċjarji tal-protezzjoni internazzjonali madwar l-UE. In-negozjati mal-Parlament ġew finalizzati fl-2022.

Fit-8 ta' Frar 2024, ir-rappreżentanti tal-istati membri tal-UE approvaw il-qbil li ntlaħaq bejn il-Kunsill u l-Parlament fl-2022.

Il-Kunsill adotta l-patt tal-UE dwar il-migrazzjoni u l-ażil fl-14 ta' Mejju 2024.

• Riforma tas-sistema Ewropea komuni tal-ażil: Il-Kunsill lest jibda n-negozjati dwar l-istandards ta' kwalifika u protezzjoni (stqarrija għall-istampa, 19 ta' Lulju 2017)
• Ir-riforma tal-ażil u l-migrazzjoni: Ir-rappreżentanti tal-istati membri tal-UE japprovaw qbil mal-Parlament Ewropew (stqarrija għall-istampa, 8 ta' Frar 2024)
• Il-Kunsill jadotta l-patt tal-UE dwar il-migrazzjoni u l-ażil (stqarrija għall-istampa, 14 ta' Mejju 2024)