Renju Unit

Sħubija strateġika

Ir-Renju Unit huwa eks Stat Membru tal-UE li ħareġ mill-UE fil-31 ta' Jannar 2020 wara 47 sena ta' sħubija.

Filwaqt li r-relazzjoni bejn l-UE u r-Renju Unit diġà hija rregolata minn sett ta' ftehimiet komprensivi, ħames snin wara l-ħruġ tar-Renju Unit, fl-ewwel summit bejn l-UE u r-Renju Unit li sar fid-19 ta' Mejju 2025, l-UE u r-Renju Unit laħqu qbil dwar sħubija strateġika. It-tnejn li huma issa mistennija jaħdmu flimkien fuq kwistjonijiet globali u jtejbu l-kooperazzjoni dwar bosta kwistjonijiet bilaterali, għall-benefiċċju taċ-ċittadini u fl-interess reċiproku.

Iż-żewġ naħat reġgħu kkonfermaw ukoll li s-sħubija hija mirfuda mill-ftehim dwar il-ħruġ bejn l-UE u r-Renju Unit, inkluż il-Qafas ta' Windsor, u mill-Ftehim dwar il-Kummerċ u l-Kooperazzjoni. Dawn il-ftehimiet jibqgħu l-pedament, u ż-żewġ naħat ser jiżguraw l-implimentazzjoni sħiħa, f'waqtha u leali tagħhom.

Is-summit stabbilizza r-relazzjoni u, ladarba ntemm, il-Kummissjoni Ewropea u r-Renju Unit wiegħdu li ser jaħdmu fuq ftehimiet futuri, fosthom dwar l-enerġija, ir-regoli agroalimentari, il-klima, il-kuntatti bejn il-persuni, il-migrazzjoni u l-infurzar tal-liġi.

• Summit UE-Renju Unit, 19 ta' Mejju 2025
• Il-ftehim dwar il-ħruġ bejn l-UE u r-Renju Unit
• Il-Ftehim dwar il-Kummerċ u l-Kooperazzjoni bejn l-UE u r-Renju Unit

Sigurtà u difiża

Ir-Renju Unit u l-UE jaqsmu responsabbiltà għas-sigurtà tal-Ewropa, u l-isfidi u l-interessi tas-sigurtà rispettivi tagħhom huma marbutin flimkien mill-qrib.

Fis-summit tad-19 ta' Mejju 2025, iż-żewġ naħat laħqu qbil dwar sħubija għas-sigurtà u d-difiża li għandha l-għan li toħloq qafas għall-kooperazzjoni f'firxa wiesgħa ta' oqsma bħal:

• kwistjonijiet ta' sigurtà reġjonali
• tiswir tal-paċi u ġestjoni tal-kriżijiet, inkluż il-kooperazzjoni u l-parteċipazzjoni possibbli tar-Renju Unit fl-operazzjonijiet tal-Politika ta' Sigurtà u ta' Difiża Komuni (PSDK) tal-UE
• sigurtà marittima
• inizjattivi, politiki u strumenti
• sigurtà fl-ispazju
• kwistjonijiet ta' ċiberspazju
• theddid ibridu u r-reżiljenza tal-infrastruttura kritika
• manipulazzjoni tal-informazzjoni u interferenza minn barranin
• nonproliferazzjoni, diżarm u armi konvenzjonali
• tisħiħ tal-kapaċitajiet għas-sħab
• taħriġ u edukazzjoni
• kooperazzjoni f'pajjiżi terzi u fora multilaterali

Fid-dawl tal-adozzjoni tal-istrument finanzjarju SAFE (Azzjoni għas-Sigurtà tal-Ewropa), ir-Renju Unit u l-Kummissjoni Ewropea ikkommettew ruħhom li jesploraw malajr il-possibbiltajiet għal aktar kooperazzjoni.

Għar-Renju Unit u għal dawk l-istati membri tal-UE li huma alleati tan-NATO, in-NATO tibqa' l-pedament tad-difiża kollettiva tagħhom.

• Sħubija għas-sigurtà u d-difiża bejn l-UE u r-Renju Unit

Prijoritajiet globali

L-UE u r-Renju Unit huma sħab tal-istess fehma li jaqsmu valuri komuni, jappoġġaw il-multilateraliżmu u ordni internazzjonali bbażata fuq ir-regoli u jippromwovu l-istabbiltà u l-prosperità madwar id-dinja.

Fis-summit tad-19 ta' Mejju 2025, il-mexxejja tal-UE u tar-Renju Unit ħarġu dikjarazzjoni konġunta li fiha identifikaw diversi prijoritajiet globali, inkluż:

• waqfien mill-ġlied sħiħ u mingħajr kundizzjonijiet u taħditiet sinifikattivi għal paċi ġenwina bl-għan li tintemm il-gwerra ta' aggressjoni tar-Russja kontra l-Ukrajna u jerġa' jkun hemm paċi komprensiva, ġusta u dejjiema
• waqfien mill-ġlied immedjat u permanenti f'Gaża, il-ħelsien tal-ostaġġi kollha u l-fluss mingħajr xkiel ta' għajnuna umanitarja lejn Gaża
• l-Iran/is-Sirja

Il-mexxejja enfasizzaw ukoll l-importanza li jinżamm kummerċ ħieles, sostenibbli, ġust u miftuħ, tennew l-impenn tagħhom għall-Balkani tal-Punent u faħħru l-ftehim bejn l-Indja u l-Pakistan biex jitwaqqfu l-ostilitajiet.

• Summit tal-2025 bejn il-mexxejja tal-UE u tar-Renju Unit: dikjarazzjoni konġunta

Ara wkoll