Armi kimiċi: l-UE tqiegħed disa' persuni u entità waħda taħt reġim ġdid ta' sanzjonijiet

Illum il-Kunsill impona sanzjonijiet fuq disa' persuni u entità waħda taħt ir-reġim il-ġdid ta' miżuri restrittivi kontra l-użu u l-proliferazzjoni ta' armi kimiċi maħluq fil-15 ta' Ottubru 2018.

Dawn id-deżinjazzjonijiet jinkludu ż-żewġ uffiċjali tal-GRU, u l-Kap u l-Viċi Kap tal-GRU (magħruf ukoll bħala l-G.U., jew id-Direttorat Prinċipali tal-Persunal Ġenerali tal-Forzi Armati Russi) responsabbli għall-pussess, it-trasport u l-użu ta' aġent nervin tossiku f'Salisbury (ir-Renju Unit) fi tmiem il-ġimgħa tal-4 ta' Marzu 2018. Is-sanzjonijiet huma imposti wkoll fuq l-entità Sirjana responsabbli għall-iżvilupp u l-produzzjoni ta' armi kimiċi, is-Scientific Studies and Research Centre (SSRC), kif ukoll ħames uffiċjali Sirjani involuti direttament fl-attivitajiet tal-SSRC. Dawn il-persuni u l-entità huma l-ewwel li qed jiġu elenkati taħt ir-reġim il-ġdid tas-sanzjonijiet tal-armi kimiċi. L-SSRC kien diġà elenkat taħt ir-reġim tas-sanzjonijiet kontra s-Sirja.

Is-sanzjonijiet jikkonsistu fil-projbizzjoni fuq l-ivvjaġġar lejn l-UE u l-iffriżar tal-assi għall-persuni, u l-iffriżar tal-assi għall-entitajiet. Barra minn hekk, persuni u entitajiet mill-UE huma pprojbiti milli jagħmlu fondi disponibbli għal dawk elenkati. Din id-deċiżjoni tikkontribwixxi għall-isforzi tal-UE biex tiġġieled il-proliferazzjoni u l-użu ta' armi kimiċi li huma theddida serja għas-sigurtà internazzjonali.

L-atti legali, li jinkludu l-ismijiet tal-persuni kkonċernati, huma disponibbli fil-Ġurnal Uffiċjali tal-UE.

• Id-deċiżjoni tal-Kunsill tal-21 ta' Jannar, il-Ġurnal Uffiċjali tal-UE
• Armi kimiċi: il-Kunsill jadotta reġim ġdid ta' sanzjonijiet, il-15 ta' Ottubru 2018
• Sanzjonijiet: kif u meta l-UE tadotta miżuri restrittivi