An Chomhairle Gnóthaí Eacnamaíocha agus Airgeadais, 22/06/2018, 22 Meitheamh 2018

Na príomhthorthaí

Chuir an Chomhairle clabhsúr ar an nós imeachta um easnamh iomarcach le haghaidh na Fraince, agus é deimhnithe aici go bhfuil easnamh na tíre sin anois faoi bhun 3% de OTI, eadhon luach tagartha an Aontais.

Mar thoradh air sin, tá 23 as 24 nós imeachta a bhí ar oscailt nuair a bhí géarchéim an euro faoi lán seoil dúnta anois.

As seo amach, beidh an Fhrainc faoi réir ghéag choisctheach leabhar rialacha fioscacha an Aontais.

D’eisigh an Chomhairle moltaí chuig don Ungáir agus don Rómáin lena n-iarrtar orthu dialltaí suntasacha a cheartú óna gcuid cuspóirí buiséadacha meántéarmacha. Dar léi, theip ar an Rómáin, go dtí seo, dul i mbun gníomhaíochta éifeachtaí.

Tháinig an Chomhairle ar chomhaontú maidir le bearta chun comhar riaracháin a neartú d'fhonn cosc ar chalaois CBL a fheabhsú.

“Tá sé ríthábhachtach go gcuirfí feabhas ar chomhar idir ár n-údarás riaracháin cánach d’fhonn dul i ngleic le calaois chánach”, arsa Vladislav Goranov, Aire Airgeadais na Bulgáire, an tír a bhfuil uachtaránacht na Comhairle aici faoi láthair. “Tá ardmhéideanna do-ghlactha ioncam CBL á gcailliúint agus cuideofar tríd an treoir seo leis an bhfadhb sin a réiteach.”

Leis an rialachán a bheartaítear, tugtar aghaidh ar na cineálacha is forleithne de chalaois trasteorann. Cuirtear borradh leis faoi mhalartú faisnéise, neartaítear líonra cánach Eurofisc agus tugtar isteach ionstraimí nua le haghaidh comhair i measc na mBallstát.

Ghlac an Chomhairle treoir freisin lena ndéantar an t-íosráta caighdeánach CBL ina ghné bhuan den chóras CBL, agus d’fhormheas sí comhaontú arb é is aidhm dó borradh a chur faoi chomhar CBL leis an Iorua.