An Chomhairle Gnóthaí Eacnamaíocha agus Airgeadais, 13/07/2018, 13 Iúil 2018

Na príomhthorthaí

Cánachas indíreach

Phléigh an Chomhairle dhá thogra a bhaineann le CBL.

I dtús báire, bhí malartú tuairimí ag na hairí faoi thogra an Choimisiúin maidir leis an "sásra aistrithe táille ginearálaithe", a bhfuil sé mar aidhm leis a chur ar chumas na mBallstát aisiompú ginearálaithe dliteanas CBL a chur i bhfeidhm ar bhonn sealadach. I mí an Mheithimh, chuir an Chomhairle Eorpach i bhfios go láidir gur cheart leanúint den obair ar conas bailiú éifeachtach CBL a áirithiú agus d’iarr sí go ndéanfaí dul chun cinn go pras i ndáil leis na tograí ón gCoimisiún maidir le bearta gearrthéarmacha.

• Sásra aistrithe táillí CBL (eolas cúlra)

Phléigh na hairí freisin an togra maidir le "r-fhoilseacháin" lena mbeadh na Ballstáit in ann rátaí neamhchaighdeánacha CBL a chur i bhfeidhm ar ríomhfhoilseacháin agus lena bhféadfaidís rialacha CBL a ailíniú idir foirmeacha fisiceacha agus leictreonacha d'fhoilseacháin. Tá an comhad seo ina chuid de na hiarrachtaí móra atá á ndéanamh ag an Aontas cáin bhreisluacha a nuachóiriú don gheilleagar digiteach i gcomhthéacs straitéis an Aontais maidir le margadh aonair digiteach.

• CBL laghdaithe do r-fhoilseacháin - leathanach gréasáin na Comhairle

Moltaí tír-shonracha

Rinne an Chomhairle a cuid moltaí agus tuairimí le haghaidh 2018 a eisiúint chuig na Ballstáit i ndáil lena mbeartais eacnamaíocha, fostaíochta agus fhioscacha, agus leis sin, cuireadh Seimeastar Eorpach na bliana seo i gcrích. Rinne an Chomhairle Eorpach na moltaí a fhormhuiniú i mí an Mheithimh.

Is é cuspóir foriomlán mholtaí na bliana seo na Ballstáit a spreagadh chun úsáid a bhaint as an móiminteam dearfach eacnamaíoch atá ann faoi láthair d'fhonn athléimneacht a ngeilleagar a neartú a thuilleadh.

Clár na hUachtaránachta

Phléigh an Chomhairle tosaíochtaí Uachtaránacht na hOstaire a mhéid a bhaineann le gnóthaí eacnamaíocha agus airgeadais.

Díreofar na gníomhaíochtaí a dhéanfar go dtí deireadh na bliana 2018 ar an méid seo a leanas:

• an t-aontas baincéireachta a chur i gcrích agus aontas na margaí caipitil a fhorbairt.
• comhordú an bheartais eacnamaíoch a chothú agus a threisiú, trí chobhsaíocht, athléimneacht agus comhlíonadh a neartú faoi chuimsiú an chomhshocraithe cobhsaíochta agus fáis.
• cur le héifeachtúlacht agus cothroime an chánachais.
• a áirithiú go gcuirfear buiséad an Aontais 2019 chun feidhme ar bhealach a chloífidh le prionsabail na bainistíochta fónta agus éifeachtúla airgeadais.

• Clár oibre Uachtaránacht na hOstaire 2018

Thairis sin, phléigh na hairí na conclúidí is ábhartha i dtaca leis na saincheisteanna eacnamaíocha agus airgeadais den Chomhairle Eorpach ar an 28-29 Meitheamh 2018 agus chuir siad bailchríoch ar an obair ullmhúcháin roimh chruinniú airgeadais an G20 a bheidh ar siúl ar an 21-22 Iúil in Buenos Aires.