Kunsill Affarijiet Ekonomiċi u Finanzjarji, 22/06/2018, 22 ta' Ġunju 2018

Riżultati ewlenin

Il-Kunsill għalaq il-proċedura ta' defiċit eċċessiv għal Franza, li jikkonferma li d-defiċit tagħha niżel taħt il-valur ta' referenza tal-UE ta' 3 % tal-PDG.

Bħala konsegwenza, 23 mill-24 proċedura li kienu miftuħa fl-eqqel tal-kriżi tal-euro issa ngħalqu.

Minn issa 'l quddiem, Franza ser tkun soġġetta għall-parti preventiva tal-ġabra tar-regoli fiskali tal-UE.

Il-Kunsill ħareġ rakkomandazzjonijiet lill-Ungerija u lir-Rumanija, li jappellawlhom biex jikkoreġu devjazzjonijiet sinifikanti mill-objettivi baġitarji fuq il-perjodu ta' żmien medju tagħhom. Huwa sab li r-Rumanija s'issa naqset milli tieħu azzjoni effettiva.

Il-ministri laħqu ftehim dwar miżuri biex tissaħħaħ il-kooperazzjoni amministrattiva sabiex titjieb il-prevenzjoni tal-frodi tal-VAT.

"It-titjib fil-kooperazzjoni bejn l-amministrazzjonijiet tat-taxxa tagħna huwa essenzjali biex jitrażżnu l-frodi tat-taxxa", qal Vladislav Goranov, ministru għall-finanzi tal-Bulgarija, li bħalissa għandha l-presidenza tal-Kunsill. "Qed jintilef għadd għoli u inaċċettabbli ta' dħul mill-VAT, u din id-direttiva ser tgħin issolvi l-problema."

Ir-regolament propost jindirizza l-aktar forom komuni ta' frodi transfruntieri. Huwa jixpruna l-iskambju ta' informazzjoni, isaħħaħ in-netwerk tat-taxxa Eurofisc u jintroduċi strumenti ġodda għall-kooperazzjoni fost l-istati membri.

Il-Kunsill adotta wkoll direttiva li tagħmel ir-rata standard minima tal-VAT ta' 15 % karatteristika permanenti tas-sistema tal-VAT, u approva ftehim bil-għan li tissaħħaħ il-kooperazzjoni dwar il-VAT man-Norveġja.