Teileachomhdháil na n-airí eacnamaíochta agus airgeadais, 23 Márta 2020

Ó tharla bearta réamhchúraim i bhfeidhm i ngeall ar COVID-19, is mar theileachomhdháil a tionóladh an cruinniú seo.

COVID-19: solúbthacht an Chomhshocraithe Cobhsaíochta agus Fáis

I ngeall ar ghéarchéim COVID-19, phléigh na hairí solúbthacht an Chomhshocraithe Cobhsaíochta agus Fáis, i bhfianaise na teachtaireachta a thíolaic an Coimisiún Eorpach maidir leis na gnéithe eacnamaíocha a ghabhann le géarchéim COVID-19 ar an 20 Márta.

D’eisigh na hairí airgeadais ráiteas comhpháirteach inar aontaigh siad leis an measúnú ón gCoimisiún go gcomhlíontar na coinníollacha maidir le húsáid chlásal ginearálta éalaithe chreat fioscach an Aontais.

• Ráiteas ó airí airgeadais an Aontais maidir leis an gComhshocrú Cobhsaíochta agus Fáis i ngeall ar ghéarchéim COVID-19, 23 Márta 2020

Tionchar eacnamaíoch ghéarchéim COVID-19

Rinne na hairí a marana ar thionchar eacnamaíoch ghéarchéim COVID-19 agus ar na bearta éagsúla a glacadh ar an leibhéal náisiúnta agus ar an leibhéal Eorpach chun dul i ngleic leis sin. Thíolaic an Coimisiún Eorpach measúnú ar an staid mar atá agus ar na bearta a rinneadh le déanaí, lena n-áirítear an Tionscnamh Infheistíochta um Fhreagairt ar an gCoróinvíreas nó creat sealadach an Choimisiúin Eorpaigh do bhearta státchabhrach. Thíolaic an Banc Ceannais Eorpach Clár Ceannaithe d'Éigeandáil na Paindéime – clár a fógraíodh ar an 18 Márta.

Leanfaidh na hairí airgeadais de dhlúthfhaireachán a dhéanamh ar an staid atá ag síorathrú go mear. Chuir siad in iúl an athuair go bhfuil siad ullamh chun aghaidh a thabhairt ar na hiarmhairtí láithreacha a bhaineann le géarchéim an choróinvíris ar bhealach comhordaithe agus cinntitheach agus béim á leagan acu ar a thábhachtaí atá sé teacht i gcabhair ar an ngeilleagar ach an coróinvíreas téaltaithe siar

• €750 billiún fógartha ag BCE i dtaca le Clár Ceannaithe d'Éigeandáil na Paindéime (an Banc Ceannais Eorpach, preaseisiúint, 18 Márta 2020)

Seimeastar Eorpach 2020

Rinne na hairí a marana ar an tionchar a bheidh ag COVID-19 ar Sheimeastar Eorpach 2020 agus ar an mbealach chun cinn sna míonna amach romhainn.

Baineann éiginnteacht mhór le cainníochtú a dhéanamh ar iarmhairtí eacnamaíocha na paindéime, agus i ngeall ar shíorathrú mear na mbeart fioscach chun freagairt don staid mar atá, tá deacrachtaí ag na Ballstáit réamh-mheastacháin inchreidte fhioscacha agus eacnamaíocha a bhaint amach. Chomhaontaigh na hairí agus an Coimisiún ar chur chuige solúbtha pragmatach a ghlacadh chun na chéad chéimeanna eile de Sheimeastar Eorpach na bliana seo a chur i gcrích.

• An Seimeastar Eorpach (eolas cúlra)