Físchomhdháil na n-airí gnóthaí eacnamaíocha agus airgeadais, 16 Aibreán 2020

Tionchar eacnamaíoch ghéarchéim COVID-19 agus an fhreagairt beartais

Phléigh na hairí an measúnú is déanaí ar thionchar eacnamaíoch phaindéim COVID-19 agus an fhreagairt bheartais uirthi.

Is dúshlán mór é téarnamh gheilleagar na hEorpa. Gníomhóimid le chéile i ndlúthpháirtíocht agus cuirfimid réitigh ar fáil a chuirfidh ar ár gcumas an dul chun cinn is gá a dhéanamh chun an tAontas Eorpach a neartú.

Zdravko Marić, Leas-Phríomh-Aire agus Aire Airgeadais na Cróite

Chuir an Grúpa Euro pacáiste beart chun tosaigh le dul i ngleic le géarchéim COVID-19. Cuimsíonn an pacáiste trí líontán sábhála láithreach d'oibrithe, do ghnólachtaí agus do Bhallstáit ar fiú thart ar EUR 500 billiún iad. Anuas air sin, leagtar síos sa tuarascáil bonn do chiste téarnaimh chun an geilleagar a athsheoladh, agus chun dlúthpháirtíocht leis na Ballstáit sin is mó atá thíos le COVID-19 a chinntiú.

D’iarr na hairí go gcuirfí na bearta éigeandála chun feidhme go pras, i gcomhréir leis na prionsabail a chomhaontaigh an Grúpa Euro. Gheall Uachtaránacht na Cróite go háirithe go rachadh sí i mbun caibidlíochta go gasta faoin togra ón gCoimisiún le haghaidh ionstraim shealadach chun rioscaí dífhostaíochta a mhaolú i gcás éigeandála (SURE).

• Ráig choróinvíreas COVID-19 agus freagairt an Aontais Eorpaigh (eolas cúlra)

Iasachtú bainc do theaghlaigh agus do chorparáidí

Tá an sreabhadh iasachtaí bainc chuig teaghlaigh agus chuig corparáidí, lena n-áirítear fiontair bheaga agus mheánmhéide, ar cheann de na modhanna is suntasaí atá ag an Aontas chun dul i ngleic le hiarmhairtí socheacnamaíocha ráig COVID-19.

D'fhormhuinigh na hairí ráiteas inar thacaigh siad le cur i bhfeidhm solúbtha rialacha an Aontais in earnáil na baincéireachta, agus iad ag iarraidh ar na bainc staonadh ó dháileadh na ndíbhinní chomh maith.

• Ráiteas ó airí airgeadais an Aontais faoi leanúint d'iasachtaí bainc a thabhairt, agus faoi earnáil árachais dea-fheidhmiúil a choinneáil le linn phaindéim COVID-19 (16 Aibreán 2020)

An Seimeastar Eorpach

Tháinig siad ar chomhaontú freisin faoi cheanglais faisnéise a shimpliú do thimthriall na bliana seo den Seimeastar Eorpach.

I bhfianaise an mhéid éiginnteachta atá ann mar thoradh ar dhrochiarmhairt shocheacnamaíoch phaindéim COVID-19, tá próiseas simplithe curtha chun cinn ag an gCoimisiún do chleachtadh Sheimeastar Eorpach na bliana seo. Tá sé mar aidhm leis sin príomh-gharspriocanna an tSeimeastair Eorpaigh a chaomhnú, agus na saolta dúshlánacha atá roimh na Ballstáit á gcur san áireamh. Go háirithe, bheadh cur chuige cuíchóirithe ann chun go bhféadfadh na Ballstáit cláir náisiúnta um athchóiriú agus um chobhsaíocht nó um chóineasú (NRPanna agus SCPanna) a thíolacadh. Tá an Coimisiún ag súil go dtíolacfaidh sé réamhaisnéis an earraigh, chomh maith le dréachtmholtaí tírshonracha go luath i mí na Bealtaine 2020.

• Seimeastar Eorpach 2020 (eolas cúlra)

Cruinnithe Idirnáisiúnta an Earraigh

Chuir Uachtaránacht na Cróite agus an Coimisiún na hairí ar an eolas faoi chruinnithe idirnáisiúnta an earraigh, lena n-áirítear cruinnithe airí airgeadais G7 agus G20, mar aon leis an gCoiste Idirnáisiúnta Airgeadaíochta agus Airgeadais a bhí ar siúl trí fhíschomhdháil le linn sheachtain an 13 Aibreán 2020.