An Chomhairle Comhshaoil, 12 Meitheamh 2014

Tagann an Chomhairle ar chomhaontú polaitiúil maidir le rialacha nua ar OGManna a shaothrú

Ag teacht le chéile dóibh i Lucsamburg an 12 Meitheamh, ghlac airí sa Chomhairle téacs an chomhaontaithe pholaitiúil ar an dréacht-treoir maidir le OGM agus chuir sí díospóireachtaí beartais ar siúl maidir leis an gcreat 2030 agus leis an bpacáiste aeir ghlain

Saothrú OGM

Soláthraítear leis an dréacht-treoir maidir le horgánaigh ghéinmhodhnaithe (OGManna) bunús dlí do bhallstáit srian nó toirmeasc a chur ar orgánaigh ghéinmhodhnaithe (OGManna) a bheith á saothrú ina gcríoch mar gheall ar chúiseanna eile seachas cúrsaí sláinte nó timpeallachta.

Baineann an togra, a thíolaic an Coimisiún i mí Iúil 2010, le OGManna a údaraíodh ar leibhéal an Aontais iad. Áirítear sna forais a d'fhéadfadh na Ballstáit a úsáid chun na húdaruithe a shrianadh nó a thoirmeasc: cúiseanna socheacnamaíocha, úsáid talún agus pleanáil baile, cuspóirí beartais talmhaíochta agus saincheisteanna beartais phoiblí.

Leis an gcomhaontú polaitiúil ón gComhairle, cuirtear críoch le roinnt mhaith blianta idirbheartaíochta i ndáil leis an dréacht-treoir agus mar thoradh air féadfar seasamh na Comhairle ag an gcéad léamh a ghlacadh. Táthar ag súil go gcuirfidh an Uachtaránacht nua na hIodáile tús le hidirbheartaíocht le Parlaimint go luath san Fhómhar 2014.

Creat 2030

Thionóil an Chomhairle díospóireacht phoiblí beartais maidir leis an gcreat 2030 do bheartas aeráide agus fuinnimh. Ba ar bhonn dhá shaincheist a chuathas i mbun díospóireachta - ról na n-earnálacha éagsúla den gheilleagar maidir le hastaíochtaí a laghdú, agus an infheistíocht atá riachtanach chun an creat a chur chun feidhme. Bhí sé mar aidhm ag an bplé cabhrú le gnéithe le haghaidh an phacáiste dheiridh a shainiú.

Déanfaidh ceannairí an Aontais Eorpaigh dul chun cinn foriomlán ar an gcreat a mheas ag an gcéad cruinniú eile de chuid na Comhairle Eorpaí an 26-27 Meitheamh, le cinneadh deiridh le teacht faoi Dheireadh Fómhair 2014.

Ábhair eile ar an gclár oibre

Bhí díospóireacht bheartais phoiblí ag an gComhairle maidir le dhá ghné den phacáiste aeir ghlain : astaíochtaí ó ghléasraí dócháin meánmhéide, agus astaíochtaí náisiúnta a laghdú. Dhírigh plé ar raon feidhme na ndréacht-treoracha.

Ghlac an Chomhairle conclúidí i dtaca leis an gCoinbhinsiún maidir leis an mBithéagsúlacht d'fhonn ullmhú i gcomhair cruinnithe a bheidh ann sa Chóiré Theas i mí Dheireadh Fómhair 2014.

Cuireadh airí ar an eolas freisin faoin staid mar atá maidir le roinnt tograí reachtacha, lena n-áirítear:

• an rialachán atá beartaithe maidir le faireachán agus tuairisciú ar astaíochtaí CO2 ó mhuiriompar
• tabhairt chun críche leasú Doha ar Phrótacal Kyoto
• an treoir atá beartaithe chun úsáid málaí siopadóireachta plaisteacha éadroma a laghdú

Chuir Uachtaránacht nua na hIodáile i láthair freisin a clár oibre maidir leis an gcomhshaol.