An Chomhairle Comhshaoil, 04/10/2019, 4 Deireadh Fómhair 2019

Na príomhthorthaí

An t-athrú aeráide

Ghlac an Chomhairle Comhshaoil conclúidí maidir leis an athrú aeráide, a comhaontaíodh d'aon ghuth, ina leagtar amach seasamh an Aontais do chruinnithe na Náisiún Aontaithe maidir leis an athrú aeráide (COP25) in Santiago de Chile, i mí na Nollag 2019. Ansin bhí díospóireacht bheartais ag na hairí faoi fhís straitéiseach fhadtéarmach an Aontais do gheilleagar aeráidneodrach.

Ní fhanfaidh an aeráid linn – tá géarghá le hastaíochtaí gás ceaptha teasa a laghdú. Inniu, chaitheamar an chuid ba mhó den Chomhairle Comhshaoil ar an athrú aeráide. D'iarr cinn stáit agus rialtais an Aontais orainn i mí an Mheithimh, an obair a thabhairt chun cinn chun aistriú chuig Aontas aeráidneodrach a chinntiú. Bhí pléití an lae inniu ina gcuidiú chun an bealach a réiteach do na Ballstáit uile tacú le haistriú costéifeachtach, cóir agus cothrom. Agus sinn i mbun na huachtaránachta, tacaímid go láidir leis an aidhm straitéis an Aontais maidir leis an aeráidneodracht faoi 2050 a thabhairt i gcrích faoi dheireadh na bliana seo. Tá rún daingean ag an Aontas leanúint de cheannaireacht a léiriú.

Krista Mikkonen, Aire Comhshaoil agus Athraithe Aeráide na Fionlainne

• Seasamh an Aontais do chomhdháil na Náisiún Aontaithe maidir leis an athrú aeráide in Santiago de Chile (COP25) leagtha amach ag an gComhairle (preaseisiúint, 04/10/2019)
• Togra ón gCoimisiún maidir le straitéis aeráide fhadtéarmach

  Níl an acmhainn seo ar fáil faoi láthair ach amháin sa teanga (sna teangacha) seo a leanas:

  EN BG ES CS DA DE ET EL FR HR IT LV LT HU MT NL PL PT RO SK SL FI SV
• Conclúidí ón gComhairle Eorpach, Meitheamh 2019
• Straitéis aeráide fhadtéarmach an Aontais – (nóta cúlra ó Uachtaránacht na Fionlainne)

Tuilleadh ciorclaíochta – Aistriú chuig sochaí inbhuanaithe

San iarnóin, ghlac an Chomhairle conclúidí cuimsitheacha darb aidhm dlús a chur leis an aistriú chuig geilleagar ciorclach. Chomhaontaigh na hairí comhshaoil d'aon ghuth go bhfuil gá le tuilleadh iarrachtaí uaillmhianacha chun aistriú córasach chuig sochaí inbhuanaithe a spreagadh.

Is gnéithe éagsúla den fhadhb chéanna iad an ró-thomhaltas, an téamh domhanda agus cailliúint na bithéagsúlachta. Cuirtear réitigh ar fáil leis an ngeilleagar ciorclach. Is féidir le cur chuige slabhra luacha agus le smaointeoireacht saolré cuidiú linn ár ngeilleagair a athdhearadh, arb é is aidhm leis sochaí aeráidneodrach chóir a bhaint amach. Krista Mikkonen, Aire Comhshaoil agus Athraithe Aeráide na Fionlainne

• Conclúidí glactha ag an gComhairle maidir leis an ngeilleagar ciorclach (preaseisiúint, 04/10/2019)
• Grafaic faisnéise faoin ngeilleagar ciorclach
• Geilleagar ciorclach 2.0 – (nóta cúlra ó Uachtaránacht na Fionlainne)

An 8ú Clár Gníomhaíochta don Chomhshaol

Ghlac an Chomhairle conclúidí maidir leis an 8ú Clár Gníomhaíochta don Chomhshaol, ina gcuirtear treoir pholaitiúil ar fáil i dtaca le beartais an Aontais don chomhshaol agus don athrú aeráide don tréimhse 2021-2030.

• An 8ú Clár Gníomhaíochta don Chomhshaol – Conclúidí glactha ag an gComhairle (preaseisiúint, 04/10/2019)

Míreanna eile

Chuir Uachtaránacht na Fionlainne na hairí ar an eolas faoi staid na himeartha i ndáil le togra reachtach maidir le fíorastaíochtaí. Bhí pointe faisnéise ann freisin faoin tacsanomaíocht i dtaca le maoiniú inbhuanaithe. Chuir toscaireacht na Danmhairge pointe faisnéise i láthair faoin aistriú chuig flít carranna atá saor ó astaíochtaí.

Thug an Coimisiún an t-eolas is déanaí do na hairí faoin teachtaireacht uaidh maidir le dlús a chur le gníomhaíocht an Aontais chun foraoisí an domhain a chosaint agus a athbhunú. Chuir an Uachtaránacht agus an Coimisiún na hairí ar an eolas faoi na hiarrachtaí chun cosaint níos fearr a thabhairt do speicis fiadhúlra ag COP18 don Choinbhinsiún maidir le Trádáil Idirnáisiúnta i Speicis Fauna agus Flora Fiáine i mBaol (CITES). Ar deireadh, thug toscaireacht na Portaingéile an t-eolas is déanaí do na hairí faoi chruinniú idirphlé ardleibhéil den Ardán Uisce idir an tSín agus an Eoraip atá ar na bacáin.