An Chomhairle um Fhostaíocht, Beartas Sóisialta, Sláinte agus Gnóthaí Tomhaltóirí, 07/12/2015, 7 Nollaig 2015

Príomhthorthaí

Fostaíocht agus an Beartas Sóisialta

Bhí plé mionsonraithe ag an gComhairle faoin Treoir maidir le mná ar bhoird chuideachtaí ach ní raibh sí in ann teacht ar chomhaontú. Os rud é go bhfuil éagsúlachtaí leanúnacha sna tuairimí maidir leis an togra, beidh gá le tuilleadh oibre maidir leis na roghanna féideartha chun dul chun cinn a dhéanamh.

Tháinig an Chomhairle ar chomhaontú polaitiúil faoi mholadh maidir le daoine atá dífhostaithe go fadtéarmach a chomhtháthú i margadh an tsaothair.

Níor cheart gur foirmle gan iarmhairtí soiléire do shaoránaigh a bheadh i gceist leis an rátáil shóisialta Trí 'A'. Ní amháin gur den riachtanas é go ndéanfaí athchothromú ar an rialachas, is ceist í seo atá ag éirí níos práinní. Mar sin tá comhordú éifeachtach idir EPSCO agus ECOFIN bunriachtanach. Is mar sin a labhair Nicolas Schmit, An tAire Saothair, Fostaíochta agus Geilleagair Shóisialta agus Dlúthpháirtíochta, Lucsamburg

Pléadh freisin an rannpháirtíocht straitéiseach don chomhionannas inscne 2016-2019 agus an Seimeastar Eorpach lena n-áirítear na tosaíochtaí a leagtar amach sa Suirbhé Bliantúil Fáis 2016. Maidir leis an méid deireanach dúirt Nicolas Schmit, Aire Saothair, Fostaíochta agus Geilleagair Shóisialta agus Dlúthpháirtíochta Lucsamburg seo a leanas: Níor cheart gur foirmle gan iarmhairtí soiléire do shaoránaigh a bheadh i gceist leis an rátáil shóisialta Trí 'A'. Ní amháin gur den riachtanas é go ndéanfaí athchothromú ar an rialachas, is ceist í seo atá ag éirí níos práinní. Mar sin tá comhordú éifeachtach idir EPSCO agus ECOFIN bunriachtanach.

Thug an Chomhairle dá haire an dul chun cinn i ndáil leis an Treoir maidir le cóir chomhionann.

Ghlac an Chomhairle Conclúidí maidir leis an méid seo a leanas:

- comhionannas idir mná agus fir sa chinnteoireacht:
- cur chun cinn an gheilleagair shóisialta mar phríomhspreagadh don fhorbairt eacnamaíoch agus shóisialta san Eoraip;
- rialachas sóisialta le haghaidh Eoraip chuimsitheach.

Chuir an Uachtaránacht an Chomhairle ar an eolas faoin gcaibidlíocht rathúil le Parlaimint na hEorpa maidir le líonra Eures agus maidir leis an Ardán i gcoinne na hoibre neamhdhearbhaithe araon. Leis na comhaontuithe seo, ba cheart go gceadófaí glacadh an dá ghnímh reachtach go luath.

Ar deireadh, tharraing an Uachtaránacht aird ar na comhdhálacha éagsúla a reáchtáladh i Lucsamburg agus leag sí béim go háirithe ar an gComhdháil 'Infheistíocht i ndaoine', áit ar chuir Nicolas Schmit béim ar an ngá atá ann tionchar an digitithe ar aistriú mhargadh an tsaothair a chur san áireamh, pointe ar ar chomhaontaigh an Coimisiún Eorpach freisin.

Sláinte

Ghlac an Chomhairle Conclúidí maidir le roinnt ábhar a bhaineann leis an tsláinte, lena n-áirítear:

• Straitéis an Aontais Eorpaigh chun an díobháil de dheasca ólacháin a laghdú: d'iarr an Chomhairle ar an gCoimisiún straitéis chuimsitheach Aontais atá tiomanta do dhíobháil de dheasca ólacháin a laghdú a ghlacadh faoi dheireadh 2016. Ba cheart go rachadh an straitéis i ngleic leis na hiarmhairtí sláinte, sóisialta agus eacnamaíocha a bhaineann le mí-úsáid alcóil agus go ndíreodh sí ar thionscnaimh le gné thrasteorann.

Tá sé de dhualgas orainn gníomhú i gcoinne mhí-úsáid alcóil Lydia Mutsch, Aire Sláinte Lucsamburg agus Uachtarán na Comhairle

D'iarr an Chomhairle ar na Ballstáit agus ar an gCoimisiún féachaint an bhféadfaí lipéadú éigeantach a thabhairt isteach ar a mbeadh comhábhair agus dearbhú maidir le cothú, go háirithe luach fuinnimh na ndeochanna alcóil.

"Tá sé de dhualgas orainn gníomhú i gcoinne mhí-úsáid alcóil" arsa Lydia Mutsch, Aire Sláinte Lucsamburg agus Uachtarán na Comhairle, agus chuir sí an méid seo leis: "Seasann Uachtaránacht Lucsamburg leis na hiarrataí ó Airí Sláinte agus ó Pharlaimint na hEorpa do straitéis nua alcóil don Aontas Eorpach".

• Tacaíocht a thabhairt do dhaoine a bhfuil néaltrú orthu: d'iarr an Chomhairle ar na Ballstáit aghaidh a thabhairt ar an néaltrú mar ábhar tosaíochta. D'iarr sí go dtabharfaí cóireáil agus cúnamh iomchuí do dhaoine a bhfuil néaltrú orthu, dá dteaghlaigh agus dá gcúramóirí agus go ndéanfaí inbhuanaitheacht airgeadais na gcóras cúraim sláinte a áirithiú. D'iarr sí ar na Ballstáit agus ar an gCoimisiún an plé ar leibhéal an Aontais a bhogadh ar aghaidh maidir le saincheisteanna amhail úsáid na dteicneolaíochtaí nua agus cumhachtú agus cearta na ndaoine a bhfuil néaltrú orthu a chur chun cinn d'fhonn aosú folláin a áirithiú faoi lán dínite.
  
  "Fíordhúshlán socheacnamaíoch is ea an néaltrú lena gcuirtear brú ní amháin ar na hothair agus ar a dteaghlaigh ach ar inmharthanacht na gcóras sláinte againn. Sin an fáth ar thugamar aghaidh ar an néaltrú mar fheiniméan sochaíoch lena n-éilítear freagairtí ilearnála", arsa Lydia Mutsch.