Fostaíocht

Cuireann an tAontas dálaí córa oibre agus neamh-idirdhealú chun cinn, agus ag an am céanna tugann sé aghaidh ar riachtanais fostóirí agus spreagann sé fás eacnamaíoch.

Tacaíonn sé le tionscnaimh i bpríomhréimsí mar shampla pá cóir, cosaint shóisialta, agus cothromaíocht oibre is saoil, agus ar an gcaoi sin bíonn sé ag obair i dtreo lucht saothair níos sláintiúla.

Dálaí córa fostaíochta

Chun dea-bhail na n-oibrithe a chosaint, cuireann colún Eorpach na gceart sóisialta dálaí córa oibre chun cinn ar fud an Aontais, a bhfuil sláinte agus sábháilteacht ag an obair, téarmaí fostaíochta trédhearcacha, agus pá leordhóthanach san áireamh orthu.

Sláinte agus sábháilteacht san ionad oibre

Cuireann rialacha an Aontais teorainn le substaintí díobhálacha san ionad oibre chun oibrithe a chosaint ar rioscaí a bhaineann le nochtadh do shubstaintí contúirteacha – mar shampla carcanaiginí, só-ghineacha, luaidhe agus aispeist – agus chun galair mharfacha a chosc.

Tugtar na dlíthe sin cothrom le dáta go rialta, agus déantar teorainneacha nochta a choigeartú i gcomhréir leis na torthaí eolaíocha agus na sonraí teicniúla is déanaí.

Cosaint oibrithe: an tsláinte agus an tsábháilteacht ag an obair

Dálaí oibre trédhearcacha

Ní mór d’fhostaithe eolas soiléir agus tráthúil a fháil faoina dtéarmaí fostaíochta ón tús.

Le rialacha an Aontais, cuirtear teorainn 6 mhí le tréimhsí promhaidh agus ní mór réamhfhógra a thabhairt d’oibrithe a bhfuil sceidil dhothuartha nó sceidil oibre ar éileamh acu.

Dálaí oibre trédhearcacha intuartha

Pá íosta leordhóthanach

Déantar pá a shocrú i mBallstáit an Aontais trí shásraí éagsúla, go háirithe trí chómhargáil agus – i gcás an phá is ísle – trí reachtaíocht náisiúnta lena socraítear pá íosta.

Le rialacha an Aontais, cuirtear an méid seo a leanas chun cinn: leibhéal leordhóthanach pá íosta, an pá íosta a thabhairt cothrom le dáta gach 2 bhliain, agus cómhargáil maidir le socrú pá.

Pá íosta leordhóthanach san Aontas

Conair i dtreo pá chomhionainn

Chun cabhrú leis an mbearna idir na hinscní a dhúnadh, ceanglaítear leis an dlí maidir le trédhearcacht pá ar fhostóirí a bheith trédhearcach i ndáil le leibhéil phá, pá comhionann as obair chomhionann idir mná agus fir a chinntiú agus oibrithe a chumhachtú chun aghaidh a thabhairt ar dhifríochtaí éagóracha pá.

Níos mó ceart d’oibrithe ardáin

Déanann an tAontas foráil maidir le rochtain níos éasca ar chinntí lena soiléirítear stádas fostaíochta oibrithe ardáin, rud a chabhraíonn leo rochtain a fháil ar na cearta saothair agus ar an gcosaint shóisialta a bhfuil siad ina dteideal, mar shampla pá breoiteachta agus sochair dhífhostaíochta.

Cosnaíonn sé iad freisin ar rialú iomarcach ó chórais faireacháin agus cinnteoireachta uathoibrithe a úsáideann ardáin mar sin.

Cothromaíocht oibre is saoil do thuismitheoirí agus do chúramóirí

Le rialacha an Aontais maidir le cothromaíocht oibre is saoil, cuirtear feabhas ar chearta tuismitheoirí agus cúramóirí trí bhearta a chuidíonn leo a ngairmeacha agus a saol teaghlaigh a fhorbairt, mar shampla:

Saoire atharthachta

Saoire le pá ar feadh 10 lá ar a laghad d’aithreacha nó do dhara tuismitheoirí thart ar am na breithe, agus cúiteamh arb ionann é agus leibhéal an phá breoiteachta ar a laghad.

Saoire cúramóirí

5 lá saoire in aghaidh na bliana d’oibrithe a thugann aire do dhaoine muinteartha leo a bhfuil riachtanais leighis thromchúiseacha acu.

Saoire tuismitheora

4 mhí ar a laghad de shaoire tuismitheora in aghaidh an tuismitheora, a bhfuil 2 mhí íoctha agus neamh-inaistrithe san áireamh orthu. Fágfar faoi na Ballstáit féin leibhéal na híocaíochta a shocrú.

Socruithe solúbtha oibre

Uaireanta oibre laghdaithe, sceidil sholúbtha agus roghanna cianoibre do thuismitheoirí agus do chúramóirí leanaí suas le 8 mbliana d’aois.

An treoir maidir le cothromaíocht oibre is saoil

Córais slándála sóisialta chomhordaithe

Le rialacha an Aontais maidir le comhordú na slándála sóisialta, cinntítear gur féidir le daoine aonair atá ag athlonnú go tír eile san Aontas rochtain a fháil ar shochair, mar shampla sochair bhreoiteachta, sochair mháithreachais, sochair dhífhostaíochta agus sochair tacaíochta teaghlaigh, gan beann ar an áit a bhfuil cónaí orthu.