An Grúpa Euro, 07/09/2018, 7 Meán Fómhair 2018

Na príomhthorthaí

Tionóladh cruinniú an Ghrúpa Euro in dhá fhormáid: gnáthchruinniú d'airí an limistéir euro agus cruinniú na n-airí as 27 mBallstát de chuid an Aontais chun plé a dhéanamh ar shaincheisteanna a bhaineann le neartú an Aontais Eacnamaíoch agus Airgeadaíochta.

9:00 – Cruinniú an Ghrúpa Euro sa ghnáthfhormáid

Malartú tuairimí le Cathaoirleach Choiste na Parlaiminte Eorpaigh um Ghnóthaí Eacnamaíochta agus Airgeadaíochta

Rinne an Grúpa Euro tuairimí a mhalartú le Roberto Gualtieri, Cathaoirleach Choiste na Parlaiminte Eorpaigh um Ghnóthaí Eacnamaíochta agus Airgeadaíochta (Coiste ECON) maidir le hionchas eacnamaíoch an limistéir euro agus na dúshláin atá roimh an limistéar sin.

Is minic Uachtarán an Ghrúpa Euro i láthair ag Coiste ECON agus idirphlé eacnamaíoch ar siúl maidir le tosaíochtaí oibre agus beartais an Ghrúpa Euro. Ar thionscnamh an Uachtaráin Centeno, tugadh cuireadh do Chathaoirleach an Choiste um Ghnóthaí Eacnamaíochta agus Airgeadaíochta (Coiste ECON), ar coiste de chuid Pharlaimint na hEorpa é, tuairimí a mhalartú go sonrach d'fhonn an idirphlé idir Parlaimint na hEorpa agus an Grúpa Euro a neartú a thuilleadh.

Plé téamach ar éifeachtacht leithdháilte i margadh an tsaothair agus i margadh na dtáirgí

Phléigh an Grúpa Euro éifeachtacht leithdháilte i margadh an tsaothair agus i margadh na dtáirgí ar bhonn anailíse ón gCoimisiún. Cuirfear feabhas ar theacht aniar eacnamaíoch tíre más féidir léi acmhainní a leithdháileadh go héifeachtach i margaí an tsaothair agus na dtáirgí, agus dá bhrí sin is ábhartha an plé sin don limistéar Euro.

Ina theannta sin, thug na hairí éisteacht do chur i láthair ó Christopher Antoniou Pissarides, ollamh le heacnamaíocht i Scoil Eacnamaíochta Londan agus buaiteoir dhuais Nobel. Thug an tOllamh Pissarides caint uaidh ar thionchar na hintleachta saorga agus an uathoibrithe ar mhargadh an tsaothair.

• Éifeachtacht leithdháilte sa limistéar euro – Nóta ón gCoimisiún
• Dúshláin i margadh an tsaothair san Aontas Eorpach – cur i láthair ó Christopher Antoniou Pissarides

An Phortaingéil: An 8ú misean faireachais iarchláir

Cuireadh an Grúpa Euro ar an eolas faoi na príomhthorthaí a tháinig chun cinn tar éis an 8ú misean faireachais iarchláir go dtí an Phortaingéil, a bhí ar siúl ón 5 Meitheamh go dtí an 12 Meitheamh 2018.

Is é príomhchuspóir an fhaireachais iarchláir a mheas an féidir le tír iasachtaí arna ndeonú faoin gclár roimhe sin a aisíoc. Tiocfaidh críoch leis nuair a aisíocfar ar a laghad 75 % de na hiasachtaí.

• Ráiteas ón gCoimisiún Eorpach agus ón mBanc Ceannais Eorpach ar thabhairt i gcrích an 8ú misean faireachais iarchláir chuig an bPortaingéil
• Cúnamh airgeadais don Phortaingéil: Faireachas iarchláir (an Coimisiún Eorpach)

10.30 - Cruinniú de 27 mBallstát

AEA a dhoimhniú - obair leantach ar an gCruinniú Mullaigh Euro, lena n-áirítear saincheisteanna a bhaineann leis an gcúlstop coiteann fioscach

Phléigh na hairí an obair leantach ar Chruinniú Mullaigh Euro an Mheithimh 2018, nuair a comhaontaíodh go ndéanfadh an Grúpa Euro tuilleadh plé faoi gach mír a luadh sa litir ón Uachtarán Centeno an 25 Meitheamh maidir le neartú AEA. Chomhaontaigh an Grúpa Euro go mbreathnófaí níos géire ar na hábhair seo ar bhealach córasach ag ceann de na cruinnithe a bheidh aige amach anseo mar ullmhúchán do Chruinniú Mullaigh Euro mhí na Nollag.

Ag an gcruinniú sin, phléigh an Grúpa Euro go sonrach saincheisteanna a bhain leis an gcúlstop coiteann fioscach don chiste réitigh aonair (SRF). Comhaontaíodh, ag Cruinniú Mullaigh Euro mhí an Mheithimh 2018, go gcuirfeadh SCE an cúlstop coiteann fioscach ar fáil don chiste réitigh aonair agus go n-ullmhódh an Grúpa Euro na téarmaí tagartha maidir leis seo faoi mhí na Nollag 2018.

• An Cruinniú Mullaigh Euro, 29 Meitheamh 2018
• Ráiteas ón nGrúpa Euro agus ó airí ECOFIN maidir le cúlstop an tsásra réitigh aonair, Nollaig 2013
• Conclúidí ón gComhairle maidir leis an Aontas Baincéireachta, Meitheamh 2017
• An sásra réitigh aonair (eolas cúlra)